▪ Long last year, samfala pipol tingse disfala earth bae finis long October 21, 2011. Harold Camping, wanfala man for toktok long radio long America, hem sei Judgment Day bae happen long May 21, 2011. Hem sei long datfala day wanfala big earthquake bae kasem full world, and then faevfala month bihaen, long October 21 nao bae earth hem finis. Bat earth hem nating finis nomoa.

For tok stret, disfala earth bae no finis enitaem. God wea wakem disfala earth bae no letem datwan for happen. Bible hem sei olsem abaotem God: “Iu wakem earth for hem stap for olowe.”—Psalm 119:90.

Nomata olsem, samfala no agree witim diswan bikos olketa sei fire bae bonem disfala earth. Olketa sei 2 Peter 3:7, 10 nao talem datwan. Scripture hia sei: “God hem markem skae and earth wea stap distaem for mas finis long fire and for stap go kasem taem wea God bae judgem and finisim pipol wea no obeyim hem . . . Nomata olsem, day bilong Jehovah bae kam olsem man for steal. Skae bae finis kwiktaem witim bigfala noise. Olketa samting long skae and long earth bae melt bikos olketa barava hot tumas. Earth and olketa samting wea olketa man duim long hem bae showaot.” Waswe, aposol Peter minim fire nao bae bonem really skae and really earth?

Nomoa. Why nao olsem? For savve long stretfala mining bilong olketa verse hia, iumi mas markem wanem Peter storyim long disfala leta witim olketa narafala part bilong Bible. Sapos really skae and really earth nao bae bone, then hem olsem God bae bonem staka billion star and evri planet long full universe just bikos earth, wea hem wanfala planet nomoa, hem garem wicked pipol insaed. Sapos iu garem wanfala planteison kokonat and wanfala kokonat tree hem no grow gud, waswe, bae iu bonem full planteison nao? Datwan hem no mek sense! Semsem tu witim Jehovah. Hem bae no finisim full universe just bikos samfala wea stap long earth bighed for againstim hem.

Nara samting tu, datkaen tingting wea pipol garem hem no fitim samting wea Jesus Christ talem taem hem sei: “Olketa wea hambol bae hapi, bikos God bae givim earth long olketa.” (Matthew 5:5; Psalm 37:29) Waswe, wanfala dadi wea lovem famili bilong hem bae wakem naes haos for olketa stap insaed bat then hem bonem bihaen? (Psalm 115:16) Hem hard tumas! Jehovah hem wakem evri samting and hem Dadi wea lovem iumi tu.—Psalm 103:13; 1 John 4:8.

Peter iusim datfala word “earth” for piksarem pipol wea stap long earth, and long verse 7 and 10 hem minim pipol wea duim nogud samting. Peter hem sei disfala samting wea bae happen hem olsem samting wea happen long Flood long taem bilong Noah. (2 Peter 3:5, 6, Holi Baebol Long Solomon Aelan Pijin) Long datfala taem, olketa pipol wea duim nogud samting nomoa finis. Earth and raeteous Noah witim famili bilong hem olketa no finis. Hem semsem tu witim datfala word “skae.” Peter iusim for piksarem samting. Long verse 7 and 10, “skae” hem piksarem olketa gavman wea rulim pipol. So pipol wea duim nogud samting and olketa nogud gavman nao bae finis, and Kingdom bilong God long heven nao bae rul.—Daniel 2:44.

So waswe, disfala earth bae finis? Nomoa. Pipol wea duim nogud samting nao bae finis. Disfala earth and olketa man wea obeyim God bae stap for olowe.—Proverbs 2:21, 22.