Ansa for Olketa Kwestin Abaotem Jesus Christ

“Long tingting bilong pipol, mi hu nao ia?”—LUKE 9:18.

JESUS askem datfala kwestin long olketa disaepol bilong hem, bikos hem savve pipol garem difren tingting abaotem hem. Bat olketa pipol shud no konfius. Jesus no haed from pipol and hem no haedem olketa samting wea hem duim. Bat hem go stap witim pipol long olketa vilij and olketa taon. Hem preach and teachim pipol long pablik bikos hem laekem olketa for savve tru samting abaotem hem.—Luke 8:1.

Iumi savve lanem tru samting abaotem Jesus from olketa toktok and samting wea hem duim wea stap long Gospel bilong Matthew, Mark, Luke, and John. Fofala Gospel hia nao garem ansa for olketa kwestin wea iumi garem abaotem Jesus. *—John 17:17.

 KWESTIN: Waswe, Jesus hem wanfala man wea stap bifor?

ANSA: Ia. Olketa man wea raetem history long first century olsem Josephus and Tacitus, raet abaotem Jesus, hem wanfala man wea stap bifor. Olketa Gospel nao barava showimaot klia Jesus hem wanfala really man. Fofala buk hia storyim barava ples and taem wea olketa samting happen. Olsem example, for showimaot taem wea Jesus start for duim ministry bilong hem, Gospel bilong Luke storyim sevenfala bigman wea rul long semtaem. Olketa man wea raetem history agree sevenfala man hia laef long datfala taem.—Luke 3:1, 2, 23.

Staka samting hem pruvim Jesus hem wanfala man wea stap bifor. Datfala buk Evidence for the Historical Jesus hem sei: “Staka savveman bae no denyim wanfala man wea olketa kolem Jesus from Nazareth hem stap long first century.”

KWESTIN: Waswe, Jesus hem God?

ANSA: Nomoa. Jesus nating ting long hemseleva olsem hem semsem witim God. Bat evritaem Jesus showimaot hem stap anda long Jehovah. * Olsem example, Jesus sei Jehovah hem “God bilong mi” and ‘hem nomoa trufala God.’ (Matthew 27:46; John 17:3) Man wea stap anda long narawan nomoa savve iusim olketa toktok olsem. Wanfala wakaman savve kolem man wea hem waka for hem, hem “boss bilong mi.” Datwan showimaot datfala wakaman stap anda long boss bilong hem.

Jesus showimaot hem difren from God. Hem sei long olketa wea againstim hem: “Law bilong iufala hem sei, ‘Sapos tufala man talem sem samting, samting wea tufala talem hem barava tru.’ Mi talemaot plande samting abaotem miseleva, and Dadi wea sendem mi kam talemaot sem samting abaotem mi tu.” (John 8:17, 18) For wanfala samting hem tru, tufala man mas talem sem samting. Olsem disfala verse storyim Jehovah and Jesus talem sem samting abaotem Jesus. So masbi Jehovah and Jesus tufala difren. *

KWESTIN: Waswe, Jesus hem wanfala gud man nomoa?

ANSA: Nomoa. Jesus duim staka difren samting mekem olketa samting wea God laekem hem kamap tru. Samfala long olketa hem olsem:

● “Spesol Son bilong God.” (John 3:18) Jesus hem savve ples wea hem kam from. Bifor hem kam long earth hem stap longtaem long heven finis. Hem sei: “Mi kam daon from heven.” (John 6:38) Jesus nao first samting wea God wakem and hem helpem God for wakem evri nara samting. God seleva nao wakem Jesus so hem stret for olketa kolem Jesus “spesol Son bilong God.”—John 1:3, 14; Colossae 1:15, 16.

● “Son bilong man.” (Matthew 8:20) Staka taem wea Jesus story hem kolem hemseleva “Son bilong man.” Datfala toktok stap samting olsem 80 taem long olketa Gospel. Disfala toktok showimaot Jesus hem kamap man, and no God nao kam long earth olsem man. Hao nao gogo spesol Son bilong God hem born  long earth? Jehovah iusim holy spirit for putim laef bilong Son bilong hem long bele bilong Mary, wanfala Jew gele for hem babule. From datwan, Jesus hem perfect taem hem born and no garem sin.—Matthew 1:18; Luke 1:35; John 8:46.

● “Teacher.” (John 13:13) Jesus talemaot klia waka wea God givim hem, hem for ‘teach . . . and for preachim datfala gud nius’ abaotem Kingdom bilong God. (Matthew 4:23; Luke 4:43) Taem Jesus explainim wanem nao Kingdom bilong God and wanem nao datfala kingdom bae duim for mekem samting wea Jehovah laekem for kamap tru, hem barava klia and isi for pipol minim.—Matthew 6:9, 10.

● “Word.” (John 1:1) God iusim Jesus for talemaot toktok bilong hem and wanem for olketa narawan duim. Jehovah iusim Jesus for talemaot message bilong hem long olketa man long earth.—John 7:16, 17.

KWESTIN: Waswe, Jesus nao Messiah wea God promisim?

ANSA: Ia. Olketa profesi long Bible talemaot Messiah or Christ, wea minim man wea God chusim, bae kam. Jesus nao main wan wea bae mekem plan bilong Jehovah kamap tru. Wantaem, wanfala woman long Samaria talem Jesus: “Mi savve Messiah bae kam, wea olketa kolem hem Christ.” Jesus talem stret long hem: “Mi nao datfala man.”—John 4:25, 26.

Waswe, eni pruv stap wea showimaot Jesus nao datfala Messiah? Thrifala samting barava pruvim Jesus hem Messiah, wea hem olsem olketa laen long fingerprint bilong wanfala man nomoa. Tingim thrifala samting hia:

● Famili laen. Bible sei Messiah bae kam from famili laen bilong David wea kam from laen bilong Abraham. (Genesis 22:18; Psalm 132:11, 12) Jesus kam from famili laen bilong tufala evriwan.—Matthew 1:1-16; Luke 3:23-38.

● Olketa profesi wea kamap tru. Olketa Hebrew Scripture garem staka profesi abaotem laef bilong Messiah long earth, olsem taem hem born and taem hem dae. Evri profesi hem kamap tru long Jesus. Samfala long olketa profesi hia hem olsem: Hem born long Bethlehem (Micah 5:2; Luke 2:4-11), God kolem hem kam bak from Egypt (Hosea 11:1; Matthew 2:15), and taem olketa killim hem dae, olketa no brekem eni bon bilong hem (Psalm 34:20; John 19:33, 36). Hem hard for Jesus bihaenem evri samting wea happen long laef bilong hem for fitim evri profesi abaotem Messiah. *

● Samting wea God talem and duim. Long taem wea Jesus hem born, God sendem olketa angel for talem long olketa man for lukaftarem sheepsheep Messiah hem born. (Luke 2:10-14) Taem Jesus duim ministry bilong hem, tu-thri taem God story kam from heven for talem hem hapi long Jesus. (Matthew 3:16, 17; 17:1-5) Jehovah givim paoa long Jesus for duim  olketa mirakol, wea datwan tu pruvim Jesus nao hem Messiah.—Acts 10:38.

KWESTIN: Why nao Jesus mas safa and dae?

ANSA: Jesus no fit for dae from hem no garem sin. And hem no fitim tu for olketa nilam hem long post for dae olsem wanfala criminal, wea datwan hem samting for shame long hem. Nomata olsem, Jesus savve bae hem kasem olketa nogud samting and hem acceptim nomoa.—Matthew 20:17-19; 1 Peter 2:21-23.

Olketa profesi abaotem Messiah sei, Messiah bae safa and dae for kavarem sin bilong pipol. (Isaiah 53:5; Daniel 9:24, 26) Jesus sei hem kam “for givim laef bilong hem, wea datwan hem price for baem bak staka pipol.” (Matthew 20:28) Olketa wea showimaot faith long sakrifaes bilong Jesus savve kamap free from sin and dae and savve laef olowe long Paradaes long earth. *—John 3:16; 1 John 4:9, 10.

KWESTIN: Waswe, iumi savve bilivim Jesus hem laef bak?

ANSA: Ia. Jesus savve hem bae laef bak. (Matthew 16:21) Bat important samting for tingim, Jesus and olketa wea raetem Bible no tingse Jesus bae laef bak seleva nomoa. No eni samting olsem savve happen enitaem. Bat Bible hem sei: “God mekem hem kamap free from dae taem hem mekem hem for laef bak moa.” (Acts 2:24) Sapos iumi biliv God hem stap and hem nao wakem evri samting, then iumi savve bilivim hem nao mekem Son bilong hem laef bak.—Hebrew 3:4.

Waswe, eni pruv stap wea showimaot Jesus hem laef bak? Tingim tufala samting hia.

● Olketa man lukim hem. Aposol Paul sei winim 500 pipol nao lukim Jesus taem hem laef bak, and staka long olketa laef yet taem Paul hem raetem leta bilong hem samting olsem 22 year bihaen Jesus hem dae. (1 Corinth 15:6) Maet iumi no bilivim sapos tu-thri man nomoa lukim hem, bat for 500 pipol lukim hem, datwan mas tru nao.

● Olketa man wea iu savve trustim. Olketa disaepol bilong Jesus nao barava lukim samting wea happen and olketa strong for talemaot Jesus hem laef bak. (Acts 2:29-32; 3:13-15) Olketa disaepol sei hem important for wanfala Christian mas biliv Jesus hem laef bak. (1 Corinth 15:12-19) Olketa disaepol willing for dae winim wei for lusim faith bilong olketa long Jesus. (Acts 7:51-60; 12:1, 2) Waswe, eniwan savve willing for dae for samting wea hem savve hem no tru?

Iumi storyim ansa from Bible for sixfala kwestin abaotem Jesus. Olketa ansa hia showimaot klia hu nao Jesus. Waswe, olketa ansa hia important? Waswe, wanem iumi bilivim abaotem Jesus hem important long iumi?

[Olketa Footnote]