Disfala article ansarem samfala kwestin wea maet iu interest long hem, and hem showim wea insaed Bible nao olketa ansa stap. Olketa Jehovah’s Witness bae hapi for storyim olketa ansa hia witim iu.

1. Why nao Christian hem baptaes?

Bikos diswan nao wei wea man askem God for hem savve fren gud witim Hem. Man savve baptaes bihaen hem lane abaotem God and kamap disaepol bilong Jesus. Dastawe hem no stret for wanfala baby baptaes, bikos baby no savve duim datwan. (Acts 8:12; 1 Peter 3:21) Iumi kamap disaepol bilong Jesus bihaen iumi lanem olketa komand bilong hem and then followim olketa komand hia.—Read Matthew 28:19, 20.

Long taem wea olketa aposol bilong Jesus laef yet, plande pipol wea herem Christian message no delay for lane abaotem God and Jesus. Wanfala man bilong Ethiopia herem Jesus hem dae for sevem pipol. Semtaem nomoa, hem kamap disaepol nao. Distaem tu, plande pipol wea laekem tumas for minim gud Bible, chus for followim Jesus.—Readim Acts 8:26-31, 35-38.

2. Why nao Jesus baptaes?

Taem Jesus hem samting olsem 30 year, John Baptaesa putim hem anda long wata long Jordan River. Datwan showimaot hem disaed for duim wanem God laekem hem for duim. (Hebrew 10:7) For Jesus duim waka bilong Messiah hem mas sakrifaesim laef bilong hem for sin bilong olketa man. Bifor Jesus kam earth, hem stap long heven. Long heven tu Jesus savve lovem and obeyim Dadi bilong hem Jehovah.—Readim Mark 1:9-11; John 8:29; 17:5.

  3. Why nao Christian shud baptaes?

Iumi no olsem Jesus. Iumi born kam long sin. Bat sakrifaes bilong Jesus mekem wei for iumi savve fren gud witim God. (Rome 5:10, 12; 12:1, 2) Iumi savve joinim famili bilong God. (2 Corinth 6:18) Wanem nao iumi mas duim? Iumi mas prea long Jehovah and talem hem iumi givim laef bilong iumi long hem. Iumi mas promis for duim wanem hem laekem for full laef bilong iumi. Bihaen iumi talem datfala promis long God, iumi showimaot iumi givim laef bilong iumi long God long wei for baptaes.—Readim Matthew 16:24; 1 Peter 4:2.

4. Hao nao iu savve redi for baptaes?

Olketa Jehovah’s Witness bae studyim Bible witim eniwan wea laek for fren gud witim God. Taem iu studyim Bible and go long olketa Christian meeting, datwan bae strongim love wea iu garem for God and bae strongim faith bilong iu tu. Hem bae helpem iu for garem gudfala tingting and duim stret samting. Taem faith and love bilong iu kamap strong and iu followim Christian wei, datwan bae helpem iu for no brekem promis bilong iu for worshipim Jehovah for olowe.—Readim John 17:3; Hebrew 10:24, 25.

For kasem moa information, lukim chapter 18 long disfala buk Wanem Nao Really Samting wea Bible Teachim? wea Olketa Jehovah’s Witness pablisim