“Taem Iufala Prea, Iufala Savve Sei: ‘Dadi’”

Taem iu herem word “dadi” wanem nao iu tingim? Waswe, iu tingim man wea lovem famili bilong hem or man wea treatim nogud famili bilong hem? Maet wanem iu tingim hem depend long wei wea dadi bilong iu treatim iu.

STAKA taem Jesus talem toktok “Dadi” taem hem prea long God and taem hem story abaotem God. * Jesus teachim olketa wea followim hem for prea olsem: “Taem iufala prea, iufala savve sei: ‘Dadi bilong mifala.’” (Luke 11:2) Bat wanem kaen dadi nao Jehovah? Hem important for savve long ansa bilong datwan. Why nao olsem? Sapos iumi savve gud long wanem kaen dadi nao Jehovah, iumi bae fren gud witim hem and barava lovem hem.

From Jesus savve gud long Dadi bilong iumi long heven and fren gud witim hem, hem nao savve talem iumi abaotem hem. Jesus sei: “No eniwan savve gud long Son. Dadi long heven nomoa  savve long hem. No eniwan savve gud long Dadi long heven. Son nomoa savve long hem witim olketa narawan tu wea Son hem willing for helpem olketa minim hem.” (Matthew 11:27) So Son nao helpem iumi for savve gud long Dadi.

Wanem nao iumi lanem from Jesus abaotem Dadi bilong iumi long heven? Tingim wanem Jesus talem: “God barava lovem tumas pipol long world dastawe hem givim kam spesol Son bilong hem, mekem evriwan wea showimaot faith long hem no dae bat kasem laef olowe.” (John 3:16) Jesus mekhae long love wea hem main fasin bilong Dadi long heven. (1 John 4:8) Jehovah showimaot love long staka difren wei. Hem showimaot hem hapi long iumi, sorre long iumi, protectim iumi, stretem iumi, and givim samting iumi needim.

Dadi Hapi Long Iumi

Taem dadi and mami talem pikinini tufala hapi long hem, datwan encouragem pikinini bilong tufala. Tingim feeling bilong Jesus taem Dadi bilong hem sei: “Diswan nao Son bilong mi wea mi lovem and wea mi hapi long hem.” (Matthew 3:17) Jesus sei Dadi long heven lovem iumi and hapi long iumi tu. Hem sei: “Dadi bilong mi bae lovem man wea lovem mi.” (John 14:21) Datwan barava comfortim iumi! Bat samwan laek mekem iumi tingse Dadi no hapi long iumi.

Satan laek mekem iumi tingse Dadi bilong iumi long heven no hapi long samting wea iumi duim. Hem laek mekem iumi tingse iumi iusles nomoa. Staka taem Satan mekem man feel olsem taem hem sik, wik, olo, or feel nogud bikos long wik point bilong hem or samting wea narawan duim. Tingim Lucas wea tingse God no hapi long hem. Taem hem young, dadi and mami bilong hem barava change. Tufala no gohed for duim stret samting wea tufala teachim long hem. Maet datwan nao mekem hem hard for Lucas fren gud witim Dadi bilong hem long heven. Staka taem hem no isi for Lucas fren gud witim narawan bikos hem savve duim samting bat no tingting gud firstaem. Waef bilong hem patient long hem and evritaem encouragem hem. Gogo datwan helpem Lucas for kontrolem wei bilong hem. Lucas ting long waef bilong hem olsem “spesol blessing and present from God.” Hem luksavve “Christ Jesus hem kam long world for sevem pipol wea sin.” (1 Timothy 1:15) Lucas sei taem hem ting raonem hao God lovem hem and hapi long hem, datwan mekem hem hapi and satisfae.

Sapos samfala taem iu tingse Jehovah no lovem iu and no hapi long iu, hem gud for readim and ting raonem scripture long Rome 8:31-39. Datwan savve encouragem iu. Aposol Paul sei ‘no eni samting savve stopem iumi for no kasem love bilong God and bilong Lord bilong iumi Christ Jesus.’ *

Dadi Sorre Long Iumi

Taem iumi safa, Dadi bilong iumi long heven hem tingim iumi. God bilong iumi “hem barava kaen tumas.” (Luke 1:78) Jesus tu sorre long pipol olsem Dadi bilong hem. (Mark 1:40-42; 6:30-34) Olketa tru Christian tu trae for followim example bilong Jehovah for sorre long pipol. Olketa followim kaonsel long Bible for “kaen long narawan and sorre long hem.”—Ephesus 4:32.

Tingim experience bilong wanfala man wea nem bilong hem Felipe. Long wanfala day taem hem go for waka, seknomoa hem feelim big pain wea feel olsem samwan busarem baksaed bilong hem. Olketa kwiktaem tekem hem long hospital. For eitfala hour olketa doctor duim staka test gogo olketa sei main tube long heart bilong hem wea olketa kolem aorta hem tear long insaed. Olketa sei hem iusles for operatim hem bikos hem bae dae nomoa insaed 25 minute.

Samfala Christian fren bilong Felipe stap taem olketa doctor talem datwan. From olketa  sorre long hem olketa kwiktaem mekem arrangement for tekem hem go long nara hospital. Stretawe olketa doctor operatim hem and olketa fren bilong hem stap gogo Felipe kamaot from theater. Evriwan hapi bikos Felipe no dae. Taem Felipe ting go bak, hem thankiu long olketa Christian fren bilong hem bikos olketa tingim hem. Bat Felipe luksavve Dadi bilong hem long heven nao mekem olketa for helpem hem. Hem sei: “Hem olsem God standap long saed bilong mi for strongim mi olsem wanfala dadi savve duim.” Tru tumas, staka taem Jehovah iusim olketa wea worshipim hem for helpem iumi for showimaot hem tingim iumi.

Dadi Bilong Iumi Protectim Iumi

Taem smol pikinini savve hem stap long danger, hem savve ran go long dadi bilong hem. Hem savve feel sef taem dadi hagem hem. Jesus trustim Jehovah for protectim hem. (Matthew 26:53; John 17:15) Iumi tu savve trustim Dadi long heven for protectim iumi. Jehovah savve protectim iumi long spiritual wei distaem. Datwan minim hem no letem eni samting spoelem wei wea iumi fren witim hem. Hem provaedem olketa samting wea helpem iumi fren witim hem. Hem provaedem kaonsel long Bible wea protectim iumi. Taem iumi kasem kaonsel olsem, hem olsem Jehovah wakabaot bihaen long iumi and sei: “Diswan nao road for [iu] wakabaot followim.”—Isaiah 30:21.

Tingim Tiago and tufala brata bilong hem Fernando and Rafael. Olketa insaed rock-and-roll music band. Olketa hapi tumas taem olketa chusim olketa for plei long music hall long São Paulo long Brazil wea olketa music star savve plei. Hem luk olsem olketa bae kamap olketa music star. Bat wanfala Christian fren warnim olketa abaotem wei for fren gud witim pipol wea no followim olketa wei bilong God. (Proverbs 13:20) For mekhae long datfala scripture, hem storyim experience bilong brata bilong hem. Hem sei brata bilong hem fren witim olketa wea garem nogud wei and datwan spoelem wei bilong hem. So Tiago and tufala brata bilong hem disaed for no gohed plei long datfala band. Distaem thrifala evriwan duim full-taem Christian ministry. From olketa followim datfala kaonsel long Bible, thrifala sei datwan protectim wei wea olketa fren witim God.

Dadi Long Heven Stretem Iumi

Dadi wea lovem pikinini bilong hem stretem hem bikos hem laekem hem for kamap gudfala man. (Ephesus 6:4) Dadi savve tok stret bat hem no raf taem hem stretem pikinini. Maet samfala taem Dadi bilong iumi  long heven need for stretem iumi. Bat hem evritaem showimaot love and hem no raf. Jesus hem olsem Dadi bilong hem. Nomata olketa disaepol no kwiktaem followim kaonsel bilong hem, hem no raf long olketa.—Matthew 20:20-28; Luke 22:24-30.

Tingim samting wea mekem Ricardo tinghae long wei wea Jehovah stretem hem bikos hem lovem hem. Dadi bilong hem lusim hem and mami taem hem 7 month nomoa. Taem Ricardo hem teenager, hem feel nogud from hem no garem dadi. Hem start for duim olketa nogud samting and konsens bilong hem pokem hem olowe. Hem luksavve samting wea hem duim hem no fitim olketa Christian so hem disaed for story long olketa elder long kongregeson. Nomata olketa elder givim strong kaonsel from Bible, olketa showimaot love taem olketa duim datwan. Ricardo tinghae long datwan, bat from hem no savve forgetim nogud samting wea hem duim, staka taem hem no savve sleep long naet, hem krae, and feel wikdaon. Gogo hem luksavve kaonsel wea hem kasem showimaot Jehovah lovem hem. Ricardo tingim Hebrew 12:6 wea sei: “Jehovah hem stretem man wea hem lovem.”

Hem gud for tingim hao wei for stretem man hem no minim nomoa for panisim or kaonselem hem. Bible sei taem man stretem iumi datwan savve trainim iumi. So taem Dadi bilong iumi long heven stretem iumi, maet for lelebet taem iumi safa from nogud samting wea iumi duim. Bat Bible sei datwan bae lanem iumi for duim stret samting. (Hebrew 12:7, 11) Tru tumas, Dadi bilong iumi stretem iumi bikos hem laekem iumi for kasem gud samting.

Dadi Givim Samting Iumi Needim

Dadi wea lovem famili lukaftarem famili and provaedem wanem olketa needim. Jehovah hem olsem tu. Jesus sei: “Dadi bilong iufala long heven savve iufala needim olketa samting hia.” (Matthew 6:25-34) Jehovah promis olsem: “Bae mi nating lusim iu.”—Hebrew 13:5.

Wanfala woman wea nem bilong Nice luksavve datwan hem tru taem hasband bilong hem lusim waka bilong hem. No longtaem bifor, Nice hem resign from gudfala waka bilong hem mekem hem savve garem moa taem for tufala gele bilong hem and duim moa samting for God. Hao nao bae tufala garem selen? Nice prea long Jehovah. Long next day hasband go bak long ples wea hem waka for tekem samfala samting bilong hem. Hem seke fogud taem boss sei nara waka kamap and hem laekem hem nao for duim! Nomata hem lusim waka bilong hem, next day nomoa hem kasem nara waka. Nice and hasband bilong hem thankiu long Dadi bilong tufala long heven. Experience bilong tufala mekem iumi luksavve Jehovah nating lusim olketa wea faithful long hem.

Tinghae Long Love wea Dadi Showimaot

Tru tumas, no eni toktok fitim bigfala love wea Dadi bilong iumi long heven showimaot! Jehovah hem nambawan Dadi bikos hem showimaot love long staka difren wei! Hem showimaot hem hapi long iumi, sorre long iumi, protectim iumi, stretem iumi, and givim samting iumi needim.

Wanem nao iumi savve duim for showimaot iumi tinghae long love wea Dadi bilong iumi long heven showimaot? Iumi savve traem best for lane abaotem hem and plan bilong hem. (John 17:3) Iumi savve changem wei bilong iumi and duim wanem hem laekem. (1 John 5:3) Iumi savve followim example bilong hem for lovem olketa narawan. (1 John 4:11) Taem iumi duim olsem, iumi showimaot iumi ting long Jehovah olsem Dadi bilong iumi and tinghae long wei wea iumi pikinini bilong hem.

[Olketa Footnote]

[Blurb long page 26]

Sapos iumi savve gud long wanem kaen dadi nao Jehovah, iumi bae fren gud witim hem and barava lovem hem

[Blurb long page 29]

Iumi showimaot iumi ting long Jehovah olsem Dadi bilong iumi and tinghae long wei wea iumi pikinini bilong hem

[Box/Olketa Piksa long page 28]

HAO JEHOVAH SHOWIMAOT LOVE OLSEM DADI

HAPI LONG IUMI

SORRE LONG IUMI

PROTECTIM IUMI

STRETEM IUMI

GIVIM SAMTING