Samfala Ask Olsem . . .

Why Nao God Komandim Olketa wea Worshipim Hem for Maritim Nomoa Olketa wea Garem Sem Biliv?

▪ God givim disfala komand for nation bilong Israel abaotem pipol long olketa nara nation: “Iufala mas no maritim olketa. Iufala mas no givim dota bilong iufala long son bilong olketa, and no tekem dota bilong olketa for son bilong iufala.” (Deuteronomy 7:3, 4) Why nao God givim datfala komand?

Jehovah hem luksavve Satan laek for spoelem nation bilong Israel long wei for mekem olketa worshipim olketa false god. So God warnim olketa Israelite abaotem wei wea olketa wea no worshipim Jehovah bae ‘mekem son bilong olketa Israelite for lusim Jehovah and worshipim olketa nara god.’ Jehovah savve datwan bae barava affectim olketa. Sapos nation bilong Israel start for worshipim olketa nara god, Jehovah bae no sapotim and protectim olketa and bae hem isi tumas for olketa enemy finisim olketa. Then bae hem hard nao for Messiah wea God promisim for kamaot from datfala nation. Dastawe Satan hapi sapos olketa long Israel maritim pipol long nara nation.

Jehovah hem lukaftarem evriwan insaed datfala nation bilong Israel, and hem luksavve for olketa hapi, olketa mas fren gud witim hem. Waswe, hem stret for God givim komand for olketa long Israel for no maritim pipol long nara nation? Tingim example bilong King Solomon. Hem savve long warning wea Jehovah talem for no maritim woman long nara nation wea sei: “Olketa bae mekem iufala for worshipim olketa nara god.” From Solomon hem wanfala wise man, maet hem tingse hem no need for obeyim kaonsel bilong Jehovah, so hem no followim datfala kaonsel. Wanem nao happen? ‘Isisi olketa waef bilong hem switim heart bilong hem for worshipim olketa nara god.’ Datwan hem barava nogud samting! Jehovah no hapi nao long Solomon bikos hem no faithful and datwan mekem datfala nation bilong Israel for no garem wan mind nao.—1 Kings 11:2-4, 9-13.

Samfala maet tingse no evriwan savve kasem kaen samting olsem. Olsem example, Mahlon, wanfala man bilong Israel, hem maritim Ruth from nation bilong Moab and bihaen Ruth hem marit nao, hem start for worshipim Jehovah. Bat hem no wise for Mahlon maritim samwan long nation bilong Moab. Bible hem no mekhae long wei wea Mahlon hem maritim wanfala gele from nation bilong Moab. Taem Mahlon hem young yet hem dae nao. Maet Mahlon hem dae bifor Ruth hem start for worshipim Jehovah. Brata bilong Mahlon, Chilion hem maritim Orpah, wea hem from nation bilong Moab tu, and Orpah hem gohed for worshipim “olketa god bilong hem.” Bat Boaz hem maritim Ruth, bihaen Ruth hem worshipim Jehovah nao. Olketa Jew ting long Ruth hem wanfala “nambawan example long samwan wea followim religion bilong olketa Jew.” From Boaz hem maritim samwan wea worshipim Jehovah, tufala kasem gud samting.—Ruth 1:4, 5, 15-17; 4:13-17.

Waswe, hem wise for followim example bilong Mahlon and tingse hem olraet nomoa for no followim kaonsel bilong Jehovah for maritim samwan wea garem sem biliv olsem hem? For garem datfala tingting, hem olsem man wea steal and no eniwan kasholem hem, so hem tingse bae hem olraet nomoa for gohed steal for kasem olketa samting hem needim.

Bible talem olketa Christian distaem for mas maritim nomoa “wanfala disaepol bilong Christ.” Bible hem givim warning for “no join witim olketa wea no biliv.” Datfala kaonsel hem for olketa trufala Christian distaem wea laek for marit. Bat for olketa wea maritim samwan wea no garem sem biliv olsem olketa, Bible givim advaes wea savve helpem olketa. (1 Corinth 7:12-16, 39; 2 Corinth 6:14) Olketa kaonsel olsem showimaot Jehovah God wea startim marit, laekem iumi wea worshipim hem for hapi, nomata iumi singol or iumi marit.