WASWE, enitaem iu barava laekem tumas wanfala samting?— * Sapos olsem, iu semsem olsem olketa narawan. Bat waswe, hem stret for iu laea for kasem datfala samting?— Nomoa, hem no stret. Man wea duim olsem hem greedy. Iumi bae storyim wei for greedy hem spoelem wanfala man wea nem bilong hem Gehazi. Hem wakaman bilong profet bilong Jehovah, Elisha.

Elisha and Gehazi stap samting olsem wan thousand year bifor Son bilong God, Jesus, hem born long earth. Jehovah iusim Elisha for duim samfala mirakol. Olsem example, Bible storyim wanfala important man long army bilong Syria wea garem rabis sik leprosy. Elisha nomoa savve mekem hem gud bak.

Taem God iusim Elisha for helpem pipol wea sik, Elisha no tekem selen wea pipol laek givim. Iu savve why nao olsem?— Bikos Elisha savve Jehovah nao duim olketa mirakol. Taem Elisha mekem Naaman gud bak, Naaman hapi fogud, so hem laek for givim samfala present long Elisha, olsem gold, silver, and expensive kaleko. Elisha no laek tekem, bat Gehazi nao laekem tumas olketa samting hia.

Bihaen Naaman go, Gehazi kwiktaem go bihaenem hem, bat hem no talem Elisha. Taem hem kasem Naaman, iu savve wanem nao Gehazi talem long hem?— Hem sei: ‘Elisha sendem mi for talem long iu, tufala visitor just kam and hem laekem tufala kaleko mekem hem savve givim long tufala visitor hia.’

Bat Gehazi laea nomoa! No eni visitor hem  kam. Hem talem datwan bikos hem nao laekem olketa kaleko wea Naaman laek for givim long Elisha. Naaman no savve diswan hem laea story, so hem hapi nomoa for givim Gehazi olketa present hia. Naaman givim tu samfala samting moa wea Gehazi no askem. Iu savve wanem nao happen bihaen datwan?—

Taem Gehazi kam bak, Elisha askem hem: ‘Iu stap kam long wea?’

Gehazi sei: ‘No eni ples.’ Bat Jehovah hem mekem Elisha for savve wanem Gehazi hem duim. So Elisha hem sei: ‘Hem no taem for iu tekem eni selen or kaleko!’

Gehazi tekem selen and olketa kaleko wea hem no bilong hem. So God mekem leprosy bilong Naaman for kasem Gehazi. Wanem nao iumi savve lanem from disfala story?— Samting wea iumi lanem, hem nao for no laea.

Why nao Gehazi laea?— Bikos Gehazi hem greedy. Hem laek for garem olketa samting wea no bilong hem so hem laea for kasem datwan. Dastawe hem kasem wanfala rabis sik for full laef bilong hem.

Bat nara samting wea happen long Gehazi hem worse winim datfala leprosy. Iu savve wanem nao datwan?— God no hapi witim Gehazi and no lovem hem nao. Iumi no laek for duim eni samting wea bae mekem God no hapi long iumi! Bat iumi laek for kaen and willing for sharem olketa samting wea iumi garem witim olketa narawan.