Lanem Wanem Bible Talem
Wanem Nao Bae Happen Long Judgment Day?
Disfala article storyim samfala kwestin wea maet iu tu laek for savve long ansa bilong olketa, and hem showim iu wea insaed Bible nao iu savve faendem ansa. Olketa Jehovah’s Witness bae hapi for storyim olketa ansa hia witim iu.
1. Wanem nao Judgment Day?
Olsem datfala piksa long raet saed showim, plande pipol tingse long Judgment Day staka billion wea dae finis, soul bilong olketa bae kam front long throne bilong God and hem bae judgem olketa followim wanem olketa duim. Samfala hia bae kasem reward long heven and olketa narawan bae safa long hell. Bat Bible sei disfala Judgment Day hem for stretem evri nogud samting wea pipol kasem. (Psalm 96:13) God markem Jesus nao for Judge and for stretem evri samting.—Readim Isaiah 11:1-5; Acts 17:31.
2. Hao nao Judgment Day bae stretem evri samting?
Taem firstfala man Adam disaed for againstim God, datwan mekem evriwan for sin, safa and dae. (Rome 5:12) For stretem datfala nogud samting, Jesus bae mekem plande billion pipol wea dae finis for laef bak. Buk bilong Revelation storyim diswan bae happen long datfala wan thousand year rul bilong Christ.—Readim Revelation 20:4, 11, 12.
Jesus bae judgem olketa no followim wanem olketa duim bifor olketa dae, bat followim wanem olketa duim taem God openem “olketa scroll” wea Revelation chapter 20 storyim. (Rome 6:7) Aposol Paul sei, “pipol wea raeteous and pipol wea no raeteous” olketa nao bae laef bak and garem chance for lane abaotem God.—Readim Acts 24:15.
3. Wanem nao bae happen long Judgment Day?
Olketa wea dae finis and no savve abaotem Jehovah God and worshipim hem bae garem chance bihaen olketa laef bak for changem wei bilong olketa and duim gud samting. Sapos olketa duim gud samting taem olketa laef bak, olketa “bae kasem laef olowe.” Bat samfala hia bae no laek for lane abaotem Jehovah and olketa “bae kasem judgment.”—Readim John 5:28, 29; Isaiah 26:10; 65:20.
Long datfala Judgment Day wea bae gohed for wan thousand year, Jehovah bae mekem evri man wea obey for perfect. (1 Corinth 15:24-28) Datwan hem nambawan hope for evriwan wea obeyim God! Long lastfala test wea bae kam, God bae aotem Satan from prison, wea hem stap insaed for wan thousand year. Long datfala taem Satan bae trae for mekem pipol againstim Jehovah, bat olketa wea no saedem Satan bae stap olowe long earth.—Readim Isaiah 25:8; Revelation 20:7-9.
4. Nara taem for judgem evriwan bae kamap, wanem nao datwan?
Bible storyim nara ‘taem wea God bae judgem pipol,’ wea datwan bae finisim disfala rabis world bilong Satan. Datwan bae seknomoa happen, olsem datfala Flood long taem bilong Noah wea finisim evri nogud pipol. Klosap nao God bae finisim “pipol wea no obeyim hem” and bihaen datwan wanfala niu world bae kamap “wea evri samting bae raeteous.”—Readim 2 Peter 3:6, 7, 13.
Iu Laek Lukim Nara Samting?
ESSENTIAL BIBLE TEACHINGS
Wanem Nao Kingdom Bilong God?
Taem Jesus duim ministry bilong hem long earth, main samting wea hem story abaotem nao hem Kingdom bilong God. For staka handred year, olketa disaepol bilong hem prea for datfala Kingdom for kam.
ESSENTIAL BIBLE TEACHINGS
Why Nao God Wakem Earth?
Earth fulap witim staka samting wea luk naes tumas. God putim earth lo barava stret distance from sun, hem putim moon mekem earth stedy lo stretfala angle, and mekem earth for tane lo barava raet speed. Why nao God duim bigfala waka for creatim disfala earth?
ABAOTEM MIFALA
Askem Samwan for Visit
Discussim wanfala Bible kwestin, or lanem moa samting abaotem Olketa Jehovah’s Witness.
