SAMTING wea datfala gele talem showimaot olketa nogud samting hem happen long staka gele and woman. Wei wea pipol raf and ting daonem olketa woman hem affectim staka gele and woman evriwea long world. Tingim olketa samting hia.

• Wei for ting daonem woman. Long olketa kantri long Asia staka mami and dadi no laekem olketa gele bat olketa laekem olketa boy. Wanfala UN report long 2011 talem long olketa kantri hia, wei for killim dae baby insaed bele, killim dae olketa baby wea born, and no lukaftarem gud olketa pikinini, datwan mekem samting olsem 134 million woman no laef distaem.

• Woman no kasem gud education. Evriwea long world, big haf long olketa wea no go long skul or kasem nomoa Class 3, hem olketa gele.

• Sexual harassment. Disfala toktok minim tu wei wea man trae forcem woman for duim sex. Winim 2.6 billion woman stap long olketa kantri wea sapos hasband forcem waef bilong hem for duim sex, datwan hem no againstim law.

• Health. Long olketa poor kantri, evri tu minute wanfala woman hem dae bikos taem hem babule or hem bornem pikinini hem kasem medical problem, bat no eni gud medical treatment stap for helpem hem.

• No garem raet for ownim property. Big haf long olketa kaikai wea grow long world, olketa woman nao plantim, bat long staka kantri olketa no garem raet for ownim property or kamap land owner.

Why nao olketa woman kasem olketa nogud samting hia? Samfala pipol followim olketa biliv and idea bilong religion wea sei hem olraet nomoa for treatim nogud olketa woman. Wanfala niuspepa talem toktok bilong wanfala Indian lawyer, Chandra Rami Chopra, wea sei: “Evri rul bilong olketa religion hem semsem long wanfala samting, olketa sapotim wei for ting daonem olketa woman.”

Waswe, iu tu garem sem tingting olsem? Waswe, iu tingse Bible hem olsem olketa nara buk saed long religion, wea sei olketa woman no important? Samfala tingse samfala verse long Bible hem storyim datwan. Bat wanem nao tingting bilong God abaotem olketa woman? Nomata staka pipol garem strong tingting abaotem disfala subject, wei for lukluk gud long wanem Bible talem bae helpem iumi for savve long ansa.