Mi born long Santo Domingo long Dominican Republic. Mifala fofala pikinini long famili and mi nao lastborn. Dadi and mami bilong mi skul gud and tufala laekem mifala pikinini for fren witim pipol wea honest and garem gudfala wei. Fofala year bifor mi born, dadi and mami meetim olketa Mormon missionary. Tufala barava tinghae long wei wea olketa young man hia luk klin, werem naes kaleko, and garem gudfala wei. So dadi and mami disaed for famili bilong mifala joinim Church of Jesus Christ of Latter-day Saints, wea hem nao Mormon Church. Mifala nao wanfala long olketa first famili long Dominican Republic for joinim olketa.

Taem mi growap, mi enjoyim wei for joinim olketa program bilong church and mi tinghae long wei wea olketa Mormon mekhae long famili laef and for garem gudfala wei. Mi hapi mi wanfala Mormon and mi garem goal for kamap missionary bilong church.

Taem mi 18 year, famili bilong mi go stap long America mekem mi savve go long wanfala gud university. Samting olsem 1 year bihaen, aunty and uncle bilong mi wea Jehovah’s Witness kam visitim mifala long Florida. Tufala invaetem mifala for go witim tufala long wanfala Bible program bilong Olketa Jehovah’s Witness. Mi tinghae tumas taem mi lukim evriwan luk long Bible and raetem olketa note. So mi ask for baero and pepa and mi tu raetem olketa note.

Bihaen long datfala program, aunty and uncle bilong mi sei tufala savve helpem mi for lanem samfala samting long Bible bikos mi laek for kamap missionary. Mi ting hem gudfala idea bikos mi savve gud long Book of Mormon bat mi no savve gud long Bible.

Taem mi story witim aunty and uncle long telephone abaotem Bible, tufala evritaem encouragem mi for comparem wanem mi bilivim  witim wanem Bible teachim. Tufala laekem mi for faendemaot wanem Bible teachim.

Mi bilivim staka teaching bilong Mormon Church, bat mi no sure sapos olketa teaching hia kam from Bible. Aunty bilong mi sendem kam Awake! magasin bilong November 8, 1995, wea Olketa Jehovah’s Witness pablisim. Hem garem samfala article wea storyim teaching bilong Mormon Church. Mi sapraes bikos mi luksavve mi no savve long staka teaching bilong Mormon Church. Datwan mekem mi for lukluk long Web site bilong Mormon Church for chekim sapos samting wea Awake! magasin talem hem tru and mi luksavve wanem datfala magasin talem hem stret. And taem mi visitim olketa museum bilong Mormon Church long Utah, datwan pruvim sem samting tu.

Long tingting bilong mi, Book of Mormon and Bible agree witim each other. Bat taem mi start for readim Bible and trae for minim, mi luksavve olketa teaching bilong Mormon Church no semsem witim wanem Bible talem. Olsem example, long Ezekiel 18:4, Bible sei soul savve dae. Bat long Book of Mormon long Alma 42:9 hem sei: “Soul no savve dae.”

Nara samting tu, olketa Mormon mekhae long kantri and mi feel nogud long datwan. Olsem example, olketa Mormon sei garden bilong Eden stap long Jackson County long Missouri long America. And olketa leader bilong church teachim hao long future God bae iusim gavman bilong America for rulim full earth.

Datwan mekem mi for tingim wanem nao bae happen long kantri bilong mi and long olketa nara kantri. So long wanfala evening taem wanfala young Mormon wea kasem training for kamap missionary ringim mi, mi storyim datwan long hem. Mi askem hem sapos hem bae willing for faetem olketa Mormon long nara kantri. Mi seke tumas taem hem sei hem bae duim datwan! Mi barava lukluk gud moa long olketa teaching wea mi bilivim and mi story tu witim olketa leader bilong Mormon Church. Olketa sei no eniwan savve yet long ansa long olketa kwestin bilong mi, bat long future nao bae mi just savve.

Mi no hapi long wanem olketa talem, so mi ting raonem gud why nao mi laek kamap missionary bilong Mormon Church. Mi luksavve mi laek duim missionary waka bikos mi laek helpem pipol and bikos mi laekem olketa for respectim mi. Bat mi nating savve gud long God. Staka taem bifor, mi lukluk insaed Bible bat mi no really tinghae long Bible. Mi no savve long plan bilong God for earth and olketa man.

Taem mi study witim Olketa Jehovah’s Witness, mi lane abaotem nem bilong God, wanem nao happen taem man dae, waka wea Jesus duim for mekem plan bilong God kamap tru, and staka nara samting. Gogo mi savve gud long Bible wea hem nambawan buk and mi hapi for storyim tru samting wea mi lanem long olketa narawan. Mi savve God hem stap, bat distaem mi savve prea long hem olsem best fren bilong mi. Mi baptaes and kamap wanfala Jehovah’s Witness long July 12, 2004, and bihaen sixfala month, mi duim full taem waka for preachim gud nius long pipol.

Mi waka for faevfala year long hedquarter bilong Olketa Jehovah’s Witness long Brooklyn long New York. Mi barava enjoyim waka for printim Bible and olketa Bible pablikeson wea helpem staka million pipol evriwea long earth and mi enjoyim tu wei for helpem pipol savve long God.