Waswe, God savve finisim dae? Barava nao! No eni “enemy” and dae tu hem strong winim “Olmaeti God”! (1 Corinth 15:26; Exodus 6:3) God garem paoa for finisim dae taem hem mekem pipol laef bak and hem promis for duim datwan long niu world wea bae kam. * Wanem nao mekem iumi savve God bae duim datwan? Jesus, Son bilong God talem samting wea mekem iumi garem hope.—Readim Matthew 22:31, 32.

Jesus story olsem long olketa Sadducee wea no bilivim man savve laef bak: “Hao, iufala no readim samting wea God talem long iufala abaotem taem wea olketa wea dae finis bae laef bak? Hem sei: ‘Mi nao God bilong Abraham and God bilong Isaac and God bilong Jacob.’ Hem God bilong olketa wea laef, hem no God bilong olketa wea dae finis.” Jesus storyim taem wea God story witim Moses from fire wea gohed bonem wanfala tree long samting olsem 1514 B.C.E. (Exodus 3:1-6) Long tingting bilong Jesus, taem Jehovah sei long Moses “Mi nao God bilong Abraham and God bilong Isaac and God bilong Jacob,” datwan showimaot promis wea Jehovah talem for pipol laef bak bae kamap tru. Hao nao olsem?

Tingim taem wea Jehovah story witim Moses. Long datfala taem, Abraham dae 329 year finis, Isaac dae 224 year finis, and Jacob dae 197 year finis. Nomata olketa dae finis, long tingting bilong Jehovah hem God bilong olketa yet. Hem storyim thrifala hia olsem olketa laef yet. Why nao olsem?

Jesus explainim olsem: “Hem [Jehovah] God bilong olketa wea laef, hem no God bilong olketa wea dae finis.” Samting wea Jesus talem helpem iumi for minim important samting abaotem hope for olketa man laef bak. Sapos man no savve laef bak, datwan minim Abraham, Isaac, and Jacob bae dae for olowe nao. Sapos thrifala no laef bak, bae Jehovah hem God bilong olketa wea dae finis. Datwan bae minim Jehovah no savve finisim dae and no fit for mekem olketa wea faithful for laef bak.

So wanem nao tingting bilong Jehovah abaotem Abraham, Isaac, Jacob, and olketa nara faithful man wea dae finis? Jesus sei: “Long tingting bilong hem, evriwan hia laef nomoa ia.” (Luke 20:38) Tru tumas, plan bilong Jehovah for mekem olketa wea faithful wea dae finis for laef bak bae kamap tru, dastawe hem ting long olketa olsem olketa laef nomoa. (Rome 4:16, 17) Jehovah bae no forgetim olketa hia go kasem taem wea hem bae mekem olketa laef bak.

Waswe, iu laek lukim olketa wea iu lovem wea dae finis? Sapos olsem, no forgetim hao Jehovah garem paoa for mekem pipol laef bak. No eni samting savve stopem hem for duim datwan. Hem bae gud sapos iu lane abaotem promis hao pipol bae laef bak and abaotem God wea bae duim datwan! Sapos iu duim olsem, iu bae fren gud witim Jehovah, “God bilong olketa wea laef.”