KAVA SUBJECT: WANEM IUMI LANEM FROM MOSES
Hu Nao Moses?
Taem iu herem nem Moses, wanem nao iu tingim?
-
Wanfala baby wea mami bilong hem haedem insaed basket and putim long Nile River.
-
Boy wea no forgetim hem wanfala Israelite nomata hem garem rich living long Egypt and dota bilong Pharaoh lukaftarem hem.
-
Man wea lukaftarem sheepsheep for 40 year long Midian.
-
Man wea story witim Jehovah * front long tree wea fire gohed for bonem.
-
Man wea no fraet for askem king bilong Egypt for letem olketa Israelite kamap free.
-
Man wea obeyim God and talem king Tenfala Trabol bae kasem Egypt bikos hem les for obeyim tru God.
-
Man wea leadim olketa Israelite go aot from Egypt.
-
Man wea God iusim for divaedem Red Sea.
-
Man wea God givim Ten Komandment long hem for givim long olketa Israelite.
MOSES duim evri samting hia and olketa nara samting tu. Dastawe olketa Christian, Jew, and Muslim tinghae tumas long faithful man hia!
Tru tumas, Moses hem profet wea “duim olketa bigfala samting.” (Deuteronomy 34:10-12) Hem willing for God iusim hem for duim staka bigfala samting. Bat Moses hem olsem profet Elijah, wea thrifala disaepol bilong Jesus lukim hem standap saed long Moses long wanfala vision. Moses hem “man wea olsem iumi nomoa.” (James 5:17; Matthew 17:1-9) Moses kasem olketa semkaen problem olsem iumi and hem winim olketa.
Waswe, iu laek savve hao nao hem duim datwan? Tingim thrifala wei bilong Moses and wanem iumi savve lanem from example bilong hem.
^ par. 7 Jehovah hem nem bilong God wea stap long Bible.
