Man wea hambol hem no bighed or praod. Hem no tingse hem gud winim narawan. Hem luksavve hem no perfect and hem no fit for duim samfala samting.

Moses no praod taem hem kasem paoa ovarem pipol. Staka taem man wea kasem paoa hem savve kwiktaem showimaot sapos hem hambol or praod. Robert Ingersoll, wea raetem buk long mek-19 century storyim hao man savve showimaot sapos hem hambol long wei wea hem iusim paoa wea hem kasem. Moses showimaot nambawan example long wei for hambol taem hem kasem paoa. Wanem nao hem duim?

Jehovah givim bigfala paoa long Moses for leadim olketa Israelite. Nomata olsem, Moses hem no praod. Olsem example, hem hambol taem hem deal witim olketa dota bilong Zelophehad wea ask abaotem samting wea dadi bilong olketa ownim taem hem dae. (Numbers 27:1-11) Datwan hem serious samting for Moses disaedem bikos wanem hem disaedem bae olketa nara woman tu followim.

So wanem nao Moses duim? From hem leadim olketa Israelite, waswe, hem tingse hemseleva fit for disaedem samting for olketa dota bilong Zelophehad? Waswe, hem depend long savve bilong hemseleva or tingse hem savve finis long tingting bilong Jehovah?

Maet man wea praod bae duim datwan. Bat Moses no duim olsem. Bible sei: “Moses storyim case bilong olketa long Jehovah.” (Numbers 27:5) Tingim, nomata Moses leadim olketa Israelite for samting olsem 40 year finis, hem no depend long savve bilong hemseleva bat hem depend long Jehovah! Tru tumas, Moses hem hambol.

Moses no tingse hemseleva nomoa shud kasem paoa from God. Hem hapi taem Jehovah markem olketa nara Israelite tu for kamap profet. (Numbers 11:24-29) Taem dadi-in-law bilong Moses talem hem for chusim samfala man for helpem hem for duim samfala waka, hem hambol and followim wanem hem talem. (Exodus 18:13-24) And bifor Moses dae, hem askem Jehovah for markem wanfala man for changem hem nomata hem strong yet. Taem Jehovah chusim Joshua, Moses barava sapotim Joshua nomata Moses olo winim hem. Moses encouragem olketa Israelite for obeyim Joshua taem hem leadim olketa go long Promis Land. (Numbers 27:15-18; Deuteronomy 31:3-6; 34:7) Tru tumas, Moses tinghae long privilege wea hem garem for leadim olketa Israelite and helpem olketa for worshipim Jehovah. Nomata hem garem bigfala paoa, hem tingim olketa narawan firstaem.

Iumi mas no praod bikos long paoa wea iumi kasem or savve wea iumi garem. Tingim diswan: Sapos iumi laek duim gud waka bilong Jehovah, samting wea important nao hem for hambol and no savve wea iumi garem. (1 Samuel 15:17) Sapos iumi hambol, iumi bae traem best for followim disfala advaes long Bible: “Trustim Jehovah long full heart bilong iu and no depend long savve bilong iuseleva.”—Proverbs 3:5, 6.

Example bilong Moses helpem iumi for no tinghae tumas long position or paoa wea iumi garem.

Waswe, iumi kasem gud samting taem iumi followim example bilong Moses for hambol? Ia! Sapos iumi hambol, pipol bae laekem iumi. Bat important samting nao, Jehovah God wea showimaot disfala naes wei bae hapi long iumi tu. (Psalm 18:35) Bible sei: “God hem againstim olketa wea praod tumas, bat hem kaen tumas long olketa wea hambol.” (1 Peter 5:5) Datwan showimaot hem important tumas for iumi hambol olsem Moses!