Man wea showimaot love hem barava tingim olketa narawan. Wanem hem talem and duim showimaot hem lovem olketa, nomata hem mas sakrifaesim samting for duim datwan.

Moses lovem God. Hao nao hem showimaot datwan? Tingim wanem Bible talem long 1 John 5:3. Hem sei: “Samting wea showimaot iumi lovem God, hem taem iumi obeyim olketa law bilong hem.” From Moses lovem God, hem obeyim olketa law bilong hem. Moses obeyim God long evri samting wea God askem hem for duim. Hem go lukim Pharaoh nomata hem no isi for duim datwan. And hem duim isi samting tu olsem for pointim stik go long Red Sea. Nomata God talem hem for duim samting wea isi or hard, Bible sei “hem barava duim evri samting.”—Exodus 40:16.

Moses lovem olketa Israelite tu. Olketa luksavve Jehovah iusim Moses for leadim pipol bilong hem, so taem olketa garem eni problem olketa go lukim Moses. Bible sei: “Start long morning go kasem evening pipol go lukim Moses.” (Exodus 18:13-16) Masbi long end long day, Moses taed tumas bihaen hem herem olketa Israelite storyim problem bilong olketa! Bat Moses lovem olketa and hapi for helpem olketa.

Moses lisin long olketa long famili and prea for olketa. Hem prea tu for olketa wea no kaen long hem! Taem sista bilong hem Miriam komplen abaotem Moses, Jehovah mekem Miriam for kasem leprosy. Moses no hapi taem datwan kasem Miriam, so kwiktaem nomoa hem prea olsem long God: “Plis God! Plis iu healim hem!” (Numbers 12:13) Moses prea for Miriam bikos hem lovem hem!

Iumi savve followim example bilong Moses for lovem God. From iumi lovem God, iumi “barava laek for obeyim” olketa law bilong hem. (Rome 6:17) Taem iumi duim olsem, iumi mekem heart bilong Jehovah hapi. (Proverbs 27:11) Iumiseleva tu kasem gud samting. Tru tumas, sapos iumi worshipim God from iumi lovem hem, iumi bae duim olketa stret samting and hapi for duim olsem!—Psalm 100:2.

Nara samting iumi savve duim for followim example bilong Moses hem for helpem narawan. Taem olketa fren and olketa long famili storyim problem bilong olketa, iumi showimaot iumi lovem olketa taem iumi lisin gud long olketa, trae for minim feeling bilong olketa, and talem olketa iumi tingim olketa.

Iumi savve prea for olketa long famili olsem Moses duim. Taem olketa storyim problem bilong olketa, maet samfala taem iumi feel nogud bikos iumi no savve duim eni samting for helpem olketa. Iumi savve sei, “Sorre tumas, bat samting mi savve duim nomoa hem for prea for iu.” Bat tingim diswan: “Prea bilong man wea raeteous hem garem paoa and hem savve barava helpem pipol.” (James 5:16, The Kingdom New Testament) Maet Jehovah duim samting for olketa bikos iumi prea for olketa. Tru tumas, best samting iumi savve duim for olketa long famili hem for prea for olketa! *

Iumi savve lanem staka samting from Moses! Nomata hem man olsem iumi nomoa, hem garem strong faith, hem hambol, and showimaot love. Sapos iumi barava followim gud example bilong Moses, iumi and olketa narawan bae kasem gud samting.—Rome 15:4.