Ansa for Olketa Bible Kwestin
Waswe, God herem evri prea?
God herem prea bilong pipol long evri ples. (Psalm 145:18, 19) Bible encouragem iumi for prea abaotem evri samting wea iumi warim. (Philippi 4:6, 7) Nomata olsem, God no hapi long samfala prea. Olsem example, hem no hapi long prea wea man baeheartim nomoa and talem evritaem.—Readim Matthew 6:7.
Jehovah no hapi tu long prea bilong pipol wea no followim olketa law bilong hem. (Proverbs 28:9) Olsem example, God les for herem prea bilong olketa Israelite wea killim man dae. Diswan showimaot iumi mas duim stret samting mekem God herem prea bilong iumi.—Readim Isaiah 1:15.
Wanem nao iumi mas duim for God herem prea bilong iumi?
Iumi mas garem faith for iumi prea long God. (James 1:5, 6) Iumi mas bilivim hem stap and hem tingim iumi. Taem iumi studyim Bible iumi bae luksavve God hem stap and tingim iumi, and datwan nao bae strongim faith bilong iumi.—Readim Hebrew 11:1, 6.
Taem iumi prea iumi mas hambol and prea from heart. Nomata Jesus wea hem Son bilong God, hem hambol taem hem prea. (Luke 22:41, 42) So winim wei for askem God for samting iumi laekem, iumi need for readim Bible mekem iumi savve wanem nao God laekem. Then iumi savve askem samting wea followim tingting bilong God.—Readim 1 John 5:14.
