Waswe, Jehovah tingim iumi or hem no warim nomoa nogud samting wea happen long iumi? Ansa wea Bible talem for datfala kwestin savve barava comfortim iumi. God tingim iumi olketa man and laekem iumi for enjoyim laef. Evriday pipol kasem gud samting from God, nomata olketa wea no tinghae long hem tu. Tingim samting wea aposol Paul talem.—Readim Acts 14:16, 17.

Taem Paul story long pipol long Lystra wea no worshipim God, hem sei: “Start long bifor and kam kasem distaem, [God] letem pipol wea no Jew for followim mind bilong olketa seleva nomoa. Nomata olsem, hem duim olketa gud samting for showimaot gudfala wei bilong hem long iufala. Hem givim rain for iufala and mekem garden bilong iufala barava grow gud. Hem givim staka kaikai and mekem iufala hapi.” Wanem nao olketa savve lanem from samting wea Paul talem?

Pipol long Lystra minim gud samting wea Paul talem. Olketa pipol for wakem garden and land bilong olketa hem gud and garem staka wata. Paul sei God nao givim rain and mekem garden bilong olketa for barava grow gud. So taem olketa harvestim staka kaikai and enjoyim naesfala kaikai, olketa kasem gud samting from God.

Iumi savve lanem olketa important samting abaotem Jehovah God from wanem Paul talem long pipol long Lystra.

Jehovah letem iumiseleva for chus. Long datfala scripture Paul sei, Jehovah letem pipol wea no Jew “for followim mind bilong olketa seleva nomoa.” Jehovah no forcem eniwan for worshipim hem. Hem letem iumiseleva for chusim wanem iumi laek for duim.—Deuteronomy 30:19.

Jehovah laekem iumi for savve long hem. Paul sei Jehovah “showimaot gudfala wei bilong hem.” Wanfala buk hem sei narafala wei for transleitim datwan hem olsem: “Hem showimaot klia long pipol wanem kaen God nao hem.” Olketa samting wea God wakem helpem iumi for luksavve long “olketa wei bilong hem.” Hem givim iumi olketa gud samting, hem garem wisdom and paoa, and hem showimaot love. (Rome 1:20) Iumi savve lanem staka nara samting abaotem Jehovah long Bible tu. (2 Timothy 3:16, 17) Evri samting hia showimaot Jehovah hem laekem iumi for savve long hem.

Jehovah laekem iumi for hapi. Paul sei ‘hem givim staka kaikai and mekem iumi hapi.’ Nomata man wea no worshipim Jehovah tu savve kaikai gogo hem satisfae and hem savve enjoyim laef. Bat God laekem iumi for hapi olowe and no for lelebet taem nomoa. Iumi mas lanem tru samting abaotem God and followim datwan mekem iumi hapi olowe.—Psalm 144:15; Matthew 5:3.

Evriday iumi evriwan kasem gud samting from gudfala wei bilong Jehovah. Waswe, iu laek for lanem moa samting wea bae helpem iu for showimaot iu tinghae long God wea givim iu ‘staka samting’?