Long Bible buk bilong Ruth, hem no talem nem bilong wanfala man wea no laek duim samting followim wanem Law bilong Moses talem. (Ruth 4:1-12) Waswe, diswan minim taem Bible no talem nem bilong samfala hem from olketa no important or olketa duim nogud samting?

Nomoa. Tingim nara example. Taem Jesus laekem olketa disaepol for redyim Pasova kaikai, hem talem olketa for ‘go long taon and bae olketa meetim wanfala man.’ Jesus no talem nem bilong datfala man. (Matthew 26:18) Waswe, diswan minim man hia duim nogud samting or hem no important? Nomoa, hem wanfala disaepol bilong Jesus. Long datfala story hem no important for savve long nem bilong hem, dastawe Bible no talem datwan.

Bible talem tu nem bilong samfala wea duim barava nogud samting and hem no talem nem bilong samfala narawan wea faithful long God. Olsem example, staka pipol savve long nem bilong firstfala woman, Eve, nomata hem selfish and no obeyim God wea datwan mekem Adam for sin. From datwan iumi evriwan distaem kasem nogud samting. (Rome 5:12) Bat Bible no talem nem bilong waef bilong Noah nomata hem woman wea tingim olketa narawan and willing for sapotim hasband bilong hem for duim important waka. Datwan no minim hem no important long Jehovah or hem duim nogud samting.

Bible no talem nem bilong samfala tu wea duim important samting followim plan bilong Jehovah. Tingim smol Israelite gele wea waka long haos bilong Naaman, wea hem bigman long army bilong Syria and hem garem leprosy. Hem no fraet for talem waef bilong Naaman abaotem profet bilong Jehovah long Israel wea savve mekem Naaman gud bak. (2 Kings 5:1-14) Jephthah, wanfala judge long Israel garem dota wea showimaot hem garem strongfala faith tu. Hem willing for no marit and for no garem pikinini mekem hem savve duim wanem dadi bilong hem promisim long Jehovah. (Judges 11:30-40) Bible no talem nem bilong samfala man wea raetem winim 40-fala psalm and samfala profet wea faithful for duim olketa important assignment.—1 Kings 20:37-43.

Nara example long samfala wea Bible no storyim nem bilong olketa, hem olketa faithful angel. Nomata plande handred million angel nao stap, Bible talem nem bilong tufala nomoa, Gabriel and Michael. (Daniel 7:10; Luke 1:19; Jude 9) Evri narawan Bible no talem nem bilong olketa. Olsem example, Bible storyim Manoah, dadi bilong Samson wea askem wanfala angel olsem: “Hu nao nem bilong iu, mekem mifala savve mekhae long iu taem samting wea iu talem hem kamap tru?” Wanem nao angel talem? Hem sei: ‘Why nao iu laek savve long nem bilong mi?’ Datfala angel hem hambol from hem savve pipol shud mekhae long God nomoa.—Judges 13:17, 18.

Bible no explainim why nem bilong samfala stap and nem bilong samfala narawan no stap. Bat iumi savve lanem staka samting from olketa wea faithful for worshipim God nomata Bible no talem nem bilong olketa.