Olsem first article hem storyim, main samting wea Jesus duim nao hem for “preachim gud nius abaotem Kingdom bilong God.” (Luke 8:1) Hem baeleg for staka handred kilometer for kasem olketa difren ples long Israel for teachim pipol abaotem Kingdom bilong God. Fofala Gospel story abaotem ministry wea Jesus duim, and winim 100 taem nao datfala word Kingdom hem kamap long fofala Bible buk hia. Jesus nao main wan wea iusim datfala toktok long olketa Gospel. Bat luk olsem, hem mas storyim staka samting moa abaotem Kingdom bilong God winim datwan!—John 21:25.

Taem Jesus stap long earth, why nao Kingdom hem important long hem? Wanfala reason hem bikos Jesus savve God markem hem for King long datfala Kingdom. (Isaiah 9:6; Luke 22:28-30) Bat diswan hem no minim Jesus tingim paoa wea hem bae kasem or laek for mekhae long hemseleva. (Matthew 11:29; Mark 10:17, 18) Main reason Kingdom bilong God hem important long Jesus long datfala taem and long distaem tu, * hem bikos long wanem datfala Kingdom bae duim for olketa wea hem lovem, olsem Dadi bilong hem and olketa wea faithful for followim hem.

Jesus barava lovem Dadi bilong hem long heven. (Proverbs 8:30; John 14:31) Hem tinghae long olketa naesfala wei bilong Dadi olsem wei wea Hem showimaot love, wei wea Hem tingim pipol, and wei wea Hem duim stret samting. (Deuteronomy 32:4; Isaiah 49:15; 1 John 4:8) Masbi Jesus barava no laek for herem olketa laea story abaotem Dadi bilong hem, olsem wei wea God no tingim pipol wea safa and God laekem iumi for safa. Hem nao wanfala reason why Jesus laek for talemaot “datfala gud nius abaotem Kingdom.” Hem savve datfala Kingdom bae helpem pipol for savve long tru samting abaotem Dadi bilong hem. (Matthew 4:23; 6:9, 10) Hao nao Kingdom bae duim datwan?

Jehovah bae iusim datfala Kingdom for duim staka samting for helpem olketa man. “Hem bae draem evri tias” long eye bilong olketa wea faithful long hem. Jehovah bae finisim olketa samting wea mekem man for krae and datwan minim “no eniwan bae dae and no enitaem bae pipol sorre or krae or feelim pain tu.” (Revelation 21: 3, 4) God bae iusim Kingdom for finisim wei for safa. *

Dastawe Jesus laekem tumas for story abaotem Kingdom long pipol! Hem savve datfala Kingdom bae mekem pipol luksavve Dadi bilong hem garem bigfala paoa and Hem tingim pipol. (James 5:11) Hem savve tu datfala Kingdom bae helpem olketa wea hem lovem.

Jesus stap for plande year witim Dadi bilong hem long heven bifor hem kam long earth. God iusim Son for wakem evri samting long heven, olsem olketa star and galaxy, and evri samting long earth wea hem naes tumas, olsem olketa plant and olketa animal. (Colossae 1:15, 16) Bat long evri samting wea tufala wakem, Jesus hapi tumas long olketa man.—Proverbs 8:31.

Evri samting wea Jesus duim long ministry bilong hem showimaot hem lovem pipol. Hem talem stret hem kam long earth for “talemaot gud nius” long olketa wea kasem hard taem. (Luke 4:18) Jesus no talem nomoa hem bae helpem pipol, bat hem duim samting wea showimaot hem lovem olketa. Olsem example, taem staka pipol hipap for herem Jesus story, hem “barava sorre tumas long olketa, and hem healim olketa wea sik.” (Matthew 14:14) Wanfala man wea leprosy kaikaim full body bilong hem askem Jesus for healim hem. Jesus showimaot hem lovem pipol taem hem sei: “Mi barava laek for duim datwan. Iu gud bak nao.” (Luke 5:12, 13) Taem Jesus lukim Mary hem krae from brata bilong hem Lazarus hem dae, Jesus “hem barava sorre tumas” and “hem krae nao.” (John 11:32-36) Then Jesus duim wanfala mirakol. Hem mekem Lazarus laef bak nomata hem dae finis for fofala day!—John 11:38-44.

Jesus hem savve olketa wea hem healim bae sik moa and olketa wea hem resurrectim bae dae moa. Bat Jesus savve tu Kingdom bilong God bae finisim olketa samting hia. Dastawe Jesus no duim olketa mirakol nomoa, bat hem “preachim datfala gud nius abaotem Kingdom” tu. (Matthew 9:35) Olketa mirakol wea Jesus duim long datfala taem showimaot wanem hem bae duim taem Kingdom bilong God rulim full earth. Tingim olketa samting wea Bible promisim wea bae happen long datfala taem.

•  Olketa problem saed long health bae finis.

  “Long datfala taem, olketa wea blind bae lukluk, and olketa wea earpas bae herehere. Long datfala taem, man wea kripol bae jampjamp olsem wanfala deer, and man wea no savve toktok bae hapi tumas bikos hem savve toktok nao.” And tu, “no eniwan bae sei: ‘Mi sik.’”—Isaiah 33:24; 35:5, 6.

• No eniwan bae dae moa.

  “Olketa wea raeteous bae stap long earth, and olketa bae stap for olowe.”—Psalm 37:29.

  “Hem bae finisim dae for olowe, and Jehovah wea hem Lord bilong evri samting bae draem tias long eye bilong evriwan.”—Isaiah 25:8.

• Olketa wea dae bae laef bak.

  “Taem bae kam wea evriwan wea stap insaed long grev bae herem toktok bilong hem and laef bak.”—John 5:28, 29.

  “God bae mekem pipol . . . laef bak.” —Acts 24:15.

• Evriwan bae garem haos and waka for duim.

  “Olketa bae wakem olketa haos and stap insaed, and olketa bae plantim olketa grape planteison and kaikaim frut bilong olketa. Olketa bae no build and narafala man nao stap insaed, olketa bae no plant and narawan nao kaikaim. . . . Pipol wea mi chusim bae enjoyim wanem olketa seleva garem.”—Isaiah 65:21, 22.

•  Bae no eni war.

  “Hem bae finisim olketa war long full earth.”—Psalm 46:9.

  “Pipol long wanfala kantri bae no tekem sword bilong olketa and go faetem pipol long narafala kantri, and olketa bae no lanem moa hao for faet.”—Isaiah 2:4.

• No eniwan bae hangre.

  “Olketa samting bae grow gud. God bilong iumi bae blessim iumi.”—Psalm 67:6.

  “Olketa wheat bae barava grow gud. Olketa maunten bae fulap long datwan.” —Psalm 72:16.

• No eniwan bae poor.

  “Gogo God bae tingim olketa wea poor.” —Psalm 9:18.

  “Hem bae helpem olketa wea poor wea singaot for help. Hem bae helpem tu olketa man nating and olketa wea no garem eniwan for helpem olketa. Hem bae sorre long olketa man nating and olketa wea poor, and hem bae sevem olketa.”—Psalm 72:12, 13.

Taem iu ting raonem olketa promis hia abaotem Kingdom, waswe, iu minim why nao datfala Kingdom hem important long Jesus? Taem Jesus stap long earth, hem barava laek for story abaotem datfala Kingdom long pipol wea interest, bikos hem savve God bae iusim datwan for finisim evri nogud samting wea happen distaem.

Waswe, olketa samting wea Bible talem abaotem datfala Kingdom hem here gud long iu? Sapos olsem, hao nao iu savve lanem samfala samting moa abaotem Kingdom? And wanem nao iu savve duim for mek sure iu bae kasem olketa blessing taem Kingdom hem rul? Next article bae storyim ansa for olketa kwestin hia.