Bible Questions Answered
Why nao iumi shud prea for Kingdom bilong God for kam?
Waswe, iu laek for savve long samfala samting moa abaotem Kingdom bilong God and wanem datfala Kingdom bae duim?
Kingdom bilong God hem wanfala gavman wea rul long heven. Jesus talem olketa follower bilong hem for prea for datfala Kingdom for kam bikos hem nao bae stretem bak evri samting and bae mekem evriwan long earth for stap gud tugeta. Olketa gavman bilong man no savve stopem pipol for raf long narawan or for duim samting wea no stret, and no savve finisim sik. Bat Kingdom bilong God nomoa bae duim datwan. God chusim Son bilong hem, Jesus, for King long datfala Kingdom. Jehovah chusim tu wanfala sekson bilong olketa follower bilong Jesus for rul witim Jesus long datfala Kingdom.—Readim Luke 11:2; 22:28-30.
Klosap nao Kingdom bilong God bae finisim evriwan wea againstim rul bilong God. So taem iumi prea for Kingdom bilong God for kam, iumi askem God for gavman bilong hem for finisim olketa gavman bilong man.—Readim Daniel 7:13, 14; Revelation 11:15, 18.
Long olketa wanem wei nao Kingdom bilong God bae helpem pipol?
Jesus hem nambawan King bikos hem tingim pipol. Hem garem paoa for helpem pipol wea prea long Jehovah for finisim olketa nogud samting wea olketa kasem.—Readim Psalm 72:8, 12-14.
Olketa wea duim samting followim wanem God laekem and wea laekem Kingdom bilong hem for kam bae kasem gud samting from datwan. Hem bae gud sapos iu lanem wanem Bible talem abaotem Kingdom bilong God.—Readim Luke 18:16, 17; John 4:23.
