PIPOL long East Africa savve gud long datfala toktok. Maet staka pipol long olketa difren ples tu garem sem tingting abaotem wei for kaonem selen. Waswe, iu tu ting olsem abaotem wei for kaonem selen? Nomata maet iu ting hem olraet for iu kaonem selen from eni fren bilong iu or loanim selen from bank, waswe, hem wisefala samting for duim? Wanem nao samfala nogud samting wea savve kamaot from wei for kaonem selen?

Narafala toktok bilong samfala long Africa showimaot main problem wea savve kamaot from diswan. Hem sei: “For kaonem selen and for givim kaon savve spoelem wei for fren.” Nomata man plan for changem bak selen wea hem kaonem, samfala samting savve happen wea hem no expectim. Olsem example, sapos man no changem bak kaon long taem wea hem talem, maet man wea givim kaon savve feel nogud. Gogo, tufala hia savve feel nogud long tufala, and famili bilong tufala savve feel nogud tu. From olketa nogud samting hia savve kamap, taem iumi garem problem saed long selen, iumi shud no kwiktaem for kaonem selen, bat hem shud last samting wea iumi ting for duim.

Wei for kaonem selen savve spoelem tu wei wea man fren witim God. Hao nao olsem? First samting, Bible sei man wea les for changem bak kaon bilong hem, hem wanfala wicked man. (Psalm 37:21) Bible sei tu “Man wea garem kaon hem servant bilong man wea givim datfala kaon long hem.” (Proverbs 22:7) Man wea kaonem selen mas luksavve hem no free go kasem taem wea hem changem bak kaon bilong hem. Narafala toktok long Africa hem olsem: “Sapos iu tekem leg bilong wanfala man, eni ples wea hem talem iu for go, iu mas go nao.” Diswan minim man wea garem bigfala kaon hem no free for duim wanem hemseleva laekem.

So hem barava important for changem bak eni kaon wea iu garem. Sapos iu no duim olsem, olketa problem savve kamap. Olsem example, olketa wea garem bigfala kaon savve wari fogud, no sleep gud, mas waka ovataem, hasband and waef savve raoa, maet marit bilong tufala brekdaon, and maet olketa go long kot or go long prison tu. Hem wise for followim disfala toktok long Rome 13:8: “Iufala mas no kaonem samting wea iufala no fit for peim bak, bat samting wea iufala mas duim nao hem for lovem narawan.”

Hem important for iumi tingting gud firstaem bifor iumi kaonem selen. Man wea wise bae ask olsem: “Waswe, mi really need for kaonem disfala selen? Waswe, mi mas kaonem selen mekem mi savve provaedem samting wea famili bilong mi needim? Or waswe, mi greedy bikos mi laek for kasem samting wea mi no garem inaf selen for peim? Staka taem hem gud for satisfae nomoa witim wanem iu garem winim wei for garem kaon.

Hem tru, samfala taem maet wanfala samting hem happen, and bae iu need for kaonem selen. Sapos iu disaed for kaonem selen, iu mas traem best for duim stret samting. Wanem nao iu mas duim?

First samting, no mekius long narawan bikos iumi tingse hem rich. Iumi shud no expectim man wea iumi tingse hem rich for mas helpem iumi saed long selen. And tu, iumi mas honest and changem bak eni selen wea iumi kaonem long hem. No jealous long olketa wea iumi tingse olketa garem staka selen.—Proverbs 28:22.

Mek-tu samting, mek sure iumi kwiktaem changem bak selen wea iumi kaonem. Sapos man wea iu kaon long hem no markem taem for iu changem bak datfala selen, iu nao mas markem taem for duim datwan, and iu mas changem bak long datfala taem. Taem iu kaonem selen long eniwan, iu shud raetem wanfala agreement and iutufala saenem datwan, mekem iutufala evriwan savve gud long wanem nao iutufala agree long hem. (Jeremiah 32:9, 10) Sapos hem fitim, hem gud for iuseleva nao go givim bak datfala selen long hem mekem iu savve talem thankiu long hem. Wei for evritaem changem bak kaon bilong iu bae mekem iu stap gud witim man wea iu kaon long hem. Long Sermon long Maunten, Jesus sei: “Sapos iu sei iu bae duim samting, iu mas duim datwan. Sapos iu sei iu bae no duim samting, then no duim datwan.” (Matthew 5:37) Nara samting tu, hem gud for evritaem tingim datfala Golden Rul wea sei: “Samting wea iufala laekem pipol for duim long iufala, sem samting nao iufala mas duim long olketa.”—Matthew 7:12.

Wanfala Bible principle savve helpem iumi for no kaon tumas. Hem sei: “Iumi savve kasem barava gud samting from wei for faithful long God sapos iumi satisfae nomoa long wanem iumi garem.” (1 Timothy 6:6) Sapos iumi satisfae nomoa long wanem iumi garem, iumi bae no kasem olketa nogud samting wea savve kamaot from wei for garem kaon. Nomata olsem, from staka pipol long world laek kasem samting kwiktaem, hem isi for iumi tu garem kaen tingting olsem. Dastawe hem important for iumi followim olketa Bible principle long diswan.

Olsem example, tingim samting wea happen long wanfala hasband and waef wea stap long Asia. Taem tufala just marit, tufala lukim olketa narawan baem haos, so tufala tu laek for baem haos. So tufala disaed for iusim selen wea tufala keepim, selen wea tufala loanim from bank, and selen wea tufala kaonem from olketa relative for baem wanfala haos. Bat gogo tufala faendem hem hard for changem bak kaon bilong tufala evri month. Tufala mas waka ovataem, and no garem taem nao for spendem witim olketa pikinini bilong tufala. Datfala hasband hem sei: “Bigfala hevi, wari, and wei wea mi no sleep gud hem mekem mi feel olsem mi no wei nao.”

Gogo, tufala ting raonem 1 Timothy 6:6 and datwan mekem tufala disaed for salem haos bilong olketa. Hem tekem olketa tufala year for salem haos and changem bak evri kaon bilong olketa. Wanem nao tufala lanem from samting wea kasem tufala? Tufala sei: “Wei for garem tingting bilong God abaotem olketa material samting hem savve protectim iumi.”

Staka pipol nao savve long datfala toktok wea iumi storyim long start bilong article. Nomata olsem, datwan no stopem pipol for kaon. Bat olketa Bible principle wea iumi storyim long disfala article hem helpem iumi for luksavve iumi wise sapos iumi tingting gud firstaem bifor iumi kaonem selen.