Tufala wea fren gud bae story tugeta, maet long wei for ring, e-mail, visitim each other, iusim video, or raetem leta. So sapos iumi laek for fren gud witim God, iumi mas prea long hem evritaem.

Bat wei for prea long God, hem no semsem olsem wei for story witim samwan wea iumi waka witim or samwan long skul. Taem iumi prea, iumi mas tingim iumi prea long datfala Barava Haefala God long universe. So iumi mas showimaot bigfala respect taem iumi story long hem. And tu, sapos iumi laekem God for herem prea bilong iumi, iumi mas duim samfala samting. Bae iumi storyim thrifala samting.

First samting, iumi mas prea nomoa long Jehovah God, and no long Jesus, olketa saint, or olketa idol. (Exodus 20:4, 5) Bible hem sei: “Long eni samting wea iufala needim, askem God for datwan long wei for prea long hem.” (Philippi 4:6) Mek-tu samting, iumi mas prea long God long nem bilong Son bilong Hem, Jesus Christ. Jesus hem sei: “Mi nomoa road for man go long Dadi long heven.” (John 14:6) And mek-thri samting, iumi mas prea abaotem olketa samting wea followim wanem God hem laekem. Bible sei: “Eni samting wea iumi askem wea followim tingting bilong God, God hem herem iumi.” *—1 John 5:14.

Bat tufala wea fren gud bae no gohed for fren sapos wanfala nomoa hem story evritaem. Taem tufala evriwan story tugeta and lisin long each other, tufala bae hapi. So iumi shud prea, bat iumi shud letem God story long iumi tu and iumi shud lisin long hem. Waswe, iu savve hao nao God hem story kam long iumi?

Distaem, Jehovah God iusim Bible olsem wei for story long iumi. (2 Timothy 3:16, 17) Hao nao hem duim datwan? Tingim diswan, taem iu readim wanfala leta wea iu kasem from fren bilong iu hem olsem datfala fren hem story long iu nomata hem no stap long there witim iu. Long sem wei tu, taem iu readim Bible, hem olsem Jehovah hem story kam long iu. Dastawe, Gina wea iumi storyim long first article hem sei: “Mi luksavve sapos mi laekem God for fren bilong mi, mi mas readim leta bilong hem, wea hem nao Bible.” Hem sei tu, “wei for readim Bible evriday hem helpem mi for fren gud witim God.” Waswe, iu letem Jehovah for story kam long iu long wei for readim Bible evriday? Sapos iu duim datwan, iu bae fren gud witim God.