KAVA SUBJECT | HAO FOR DEAL WITIM WARI
Anxieties Are Everywhere!
“Taem mi go for baem kaikai long stoa, olketa bisket nomoa stap bat hem expensive tumas! Long next day, no eni kaikai stap long datfala stoa.”—Paul, Zimbabwe.
“Hasband bilong mi sei hem bae lusim mi and olketa pikinini. Hao nao bae mi deal witim datwan? Wanem nao bae happen long olketa pikinini bilong mi?” —Janet, United States.
“Taem olketa siren krae for givim warning olketa rocket bae bosta, mi ran for haed and leidaon long floor. Nomata bihaen tu-thri hour, hand bilong mi seksek yet.” —Alona, Israel.
Distaem pipol savve wari tumas bikos evri samting ‘hem barava difren and hem hard tumas.’ (2 Timothy 3:1) Staka kasem hard taem saed long selen, hasband and waef divorce or separate, war, nogud sik, or disaster. And tu, maet iumi savve wari abaotem olketa samting olsem: ‘Waswe, disfala boela long body bilong mi bae gogo hem cancer?’ ‘Sapos world hem gohed for olsem, hao nao bae laef bilong olketa granpikinini bilong mi?’
Hem normal nomoa for iumi wari abaotem samfala samting. Olsem example, iumi savve wari abaotem wanfala exam, or for duim gud interview for wanfala waka. And taem iumi fraetem eni danger samting, datwan helpem iumi for no kasem eni nogud samting. Bat wei for wari tumas or wari olowe savve spoelem man. Long wanfala research wea olketa duim long winim 68,000 pipol, olketa faendemaot pipol wea wari olowe nomata long smol samting nomoa, olketa bae no laef longtaem. Dastawe Jesus sei: “Hao, wei for wari savve mekem eniwan long iufala savve addim go maet wanfala minute moa long laef bilong hem?” Tru nao, wei for wari no mekem man laef for longfala taem. Dastawe Jesus sei for iumi “no wari” tumas. (Matthew 6:25, 27) Bat wanem nao savve helpem iumi for no wari tumas?
Iumi mas garem gudfala tingting, garem strongfala faith long God, and garem hope for future. Nomata iumi no kasem hard taem distaem, maet iumi kasem long future. So iumi bae storyim hao wei for followim olketa samting hia helpem Paul, Janet, and Alona for no wari tumas.
