World headquarter blo Olketa Jehovah’s Witness gohed for chek evritaem for faendem wea nao disfala sik novel coronavirus (wea olketa kolem COVID-19) gohed for spred go lo hem. Mifala savve Bible bin profesi abaotem hao lo olketa last day olketa barava nogud sik bae kamap. (Luke 21:11) So taem wanfala sik hem kamap big and gohed for spred, hem wise for duim samting for protectim iumiseleva and olketa narawan.—Proverbs 22:3.

Samfala lo iufala maet laek for savve, hao nao olketa brata and sista blo iumi wea stap lo olketa kantri wea disfala sik hem affectim. Spred blo disfala COVID-19 hem affectim tu olketa branch office and olketa kongregeson lo Italy, Japan, South Korea, and olketa nara kantri. From datwan, samfala branch office mas cancelim olketa tour and olketa guest for no kam insaed branch. Samfala ples, gavman stopem olketa bigfala hipap, so branch mas cancelim olketa circuit assembly. And tu, olketa kongregeson mas changem hao olketa duim ministry and olketa meeting lo samfala area. Nomata olketa hard taem hia kamap, olketa brata blo iumi gohed for strongim olketa seleva lo spiritual wei and for encouragem each other.—Jude 20, 21.

Lo olketa taem olsem, olketa brata blo iumi faendem hao wei for followim olketa Bible principle hem barava help. Olketa point hia savve helpem iu and famili tu sapos sik hia kasem tu ples wea iu stap.

• No Panic. Hem tru, iumi shud barava careful taem wanfala sik hem spred and iumi shud duim samting for protectim iumi, bat, iumi shud no panic from iumi fraet tumas.—Proverbs 14:15; Isaiah 30:15.

• Followim Direction wea Kam from Gavman. Olketa lo gavman savve putim olketa rul for protectim pipol saed lo health. Hem gud for followim and obeyim wanem olketa talem.—Romans 13:1.

• Stap Klin. Hem important for evritaem was hand witim soap and wata or hand sanitizer wea garem alcohol insaed. Iumi mas evritaem klinim tu olketa ples wea iumi savve tasim evritaem, maet insaed lo haos or lo Kingdom Hall. And tu, olketa savve man saed lo health, savve encouragem pipol tu for no sekhand bikos datwan savve isi for spredim sik. From disfala sik Coronavirus, World Health Organization givim olketa nara advaes tu for pablik savve followim.

• Showimaot Love lo Narawan. Iumi evriwan savve hem important for attendim olketa Christian meeting and for preach lo pablik, bat sapos iu sik, hem gud for stap lo haos nomoa nogud datwan bae pas go lo olketa narawan. Datwan showimaot iumi lovem olketa brata and sista blo iumi and olketa neiba tu wea no witness.—Matthew 22:39.

• Followim Change Saed lo Kongregeson Arrangement. Lo samfala ples wea disfala sik hem kasem, branch office savve cancelim olketa kongregeson meeting, assembly and olketa nara spesol meeting for lelebet taem. Hem nao wanem hem happen lo samfala wea COVID-19 kasem finis, olsem lo Italy, Japan, and South Korea. Depend lo situation lo datfala ples, olketa elder savve mek sure olketa pablisa savve kasem recording blo olketa meeting. Olketa pablisa savve tek part lo ministry tu iusim telephone or mobile phone, text message, email, or raetem leta.

Olketa reference lo daon garem olketa principle wea savve iumi for protectim iumiseleva from olketa sik.

• “Protect Yourself From Disease” Awake! No. 6 2016, pages 4-6

• “Ways to Improve Your Health” Awake! June 2015, pages 2-7

• “You Can Improve Your Health: Key 4—Protect Your Health” Awake! March 2011, page 7