HELP FOR FAMILI
Hao for Helpem Pikinini Kasem Gud Mark Long Skul
Sapos pikinini bilong iu hem les for skul and hem no savve study and duim homwok bilong hem, wanem nao bae happen? Hem bae no kasem olketa gud mark long skul and wei bilong hem bae start for nogud. Wanem nao iu savve duim for helpem pikinini bilong iu for kasem gud mark long skul?
Samting for tingim
Wei for putim hevi long pikinini hem savve mekem problem kamap moa worse. Wei for putim hevi long pikinini savve mekem hem wari taem hem go long skul and taem hem stap long haos! From pikinini wari tumas, maet hem laea, haedem mark wea hem kasem, saenem nem bilong iu long report bilong hem, or no go skul. Problem bae kamap worse nomoa for hem.
Wei for givim reward maet no helpem pikinini. Wanfala dadi wea nem bilong hem Andrew sei: “For helpem dota bilong mifala kasem gud mark long report, mifala talem hem bae mifala givim reward long hem, bat datwan mekem dota bilong mifala tingim nomoa reward wea hem bae kasem. Taem hem kasem low mark long report, hem feel nogud bikos hem no kasem reward and no bikos hem kasem low mark.”
Wei for blamem teacher bae no helpem pikinini. Maet pikinini bilong iu tingse hem no need for waka hard for kasem gudfala mark long skul. Maet hem start for blamem tu olketa narawan for olketa mistek bilong hem and expectim olketa narawan for stretem olketa problem bilong hem. Wei for duim olsem maet mekem pikinini bilong iu for no lanem wanfala important samting wea bae helpem hem taem hem finis skul, hem nao for acceptim responsibility for wanem hem duim.
Wanem iu savve duim
Kontrolem feeling bilong iu. Sapos iu feel kros, weit firstaem bifor iu story witim pikinini bilong iu abaotem mark bilong hem long skul. Wanfala dadi wea nem bilong hem Brett sei: “Mi and waef bilong mi luksavve best taem for story long pikinini hem taem mifala no kros and savve tingim feeling bilong hem.”
Bible principle: “Willing for lisin, no kwiktaem for toktok, and no kwiktaem for kros.”—James 1:19.
Luksavve long wanem nao kosim problem. Plande taem pikinini kasem nogud mark long skul bikos olketa nara pikinini bullyim hem, hem go long niu skul, hem wari abaotem olketa exam, problem kamap long famili, hem no sleep gud, hem no garem gudfala schedule, or hem no savve tingting abaotem wanfala subject for longfala taem. No tingse pikinini bilong iu lesy nomoa.
Bible principle: “Man hemi lisingud, bae laef blong hem hemi gud.”—Provebs 16:20.
Mekem area long haos wea bae helpem pikinini for lane. Mekem schedule for pikinini duim homwok and study. Garem wanfala area long haos wea pikinini savve duim homwok bilong hem and no eni samting disturbim hem (olsem TV and mobile phone). Mekem schedule wea pikinini savve duim homwok for lelebet taem, then brek, then duim for lelebet taem moa, mekem hem savve tingim subject wea hem studyim and no olketa nara samting. Hector, wanfala dadi long Germany, sei: “Sapos pikinini bae garem exam, mifala savve reviewim lelebet information abaotem datfala subject each day winim wei for duim last minute.”
Bible principle: “Evrisamting hemi kamap long barava taem blong hem.”—Eklesiastes 3:1.
Encouragem pikinini for lane. Sapos pikinini bilong iu luksavve skul savve helpem hem distaem, bae datwan mekem hem laek for lane. Olsem example, wei for savve long maths savve helpem pikinini for no weistim selen wea hem kasem.
Bible principle: “Kasem waes an kasem gudfala save. . . . Tinghae long waes toktok.”—Provebs 4:5, 8.
Traem diswan: Helpem pikinini bilong iu long homwok bilong hem, bat no duim for hem. Andrew sei: “Dota bilong mifala depend long savve bilong mifala nomoa and hem no trae for faendem ansa seleva.” Teachim pikinini bilong iu hao for duim homwok bilong hem.