Marit partner bilong iu talem or duim samting wea mekem iu kros. Iu trae for haedem wei wea iu kros, bat hem luksavve long diswan. Hem gohed for ask for faendaot wanem nao hem rong. Datwan mekem iu kros go moa. Taem olsem, hao nao bae iu kontrolem kros bilong iu?

•  Samting for tingim

•  Wanem iu savve duim

•   Wei for kros tumas savve spoelem health bilong iu. Pipol wea duim research sei taem man no kontrolem kros bilong hem, datwan savve mekem hem for hae blood, garem heart problem, depression, and problem long bele tu. And tu, wei for kros savve mekem man no savve sleep gud long naet, wari tumas, garem samfala problem long skin, and stroke. Dastawe Bible sei: “Yu no kros . . . , samting ya i wei fo [spoelem] yu nomoa ya.”​—Sams 37:8.

•   Wei for keepim kros savve spoelem man tu. Sapos iu gohed for keepim kros, hem olsem wanfala sik wea gohed for spoelem insaed body bilong iu. Olsem example, hem savve mekem iu start for garem wei for tok daonem or tok spoelem narawan. Diskaen wei savve mekem hem no isi for olketa narawan stap witim iu and hem savve barava spoelem marit bilong iu.

•   Tingim olketa gudfala wei bilong marit partner. Raetem thrifala naes wei wea iu laekem tumas abaotem marit partner bilong iu. Then taem marit partner bilong iu duim eni samting wea mekem iu kros, tingim bak thrifala wei hia wea iu raetem finis. Maet diswan savve helpem iu for kontrolem kros bilong iu.

   Bible principle: ‘Showimaot iufala garem wei for tinghae.’​—Colossae 3:​15.

•    Traem best for garem wei for forgive. First samting, trae for minim tingting bilong marit partner bilong iu abaotem wanfala samting. Diswan savve helpem iu for minim feeling bilong hem. (1 Peter 3:8) Then, askem iuseleva, ‘Waswe, samting wea hem duim wea mi kros abaotem hem hard tumas for mi forgivim hem nao?’

   Bible principle: “Yu no wari long rong agensim yu.”​—Provebs 19:11.

•    Storyim feeling bilong iu long kaen and gudfala wei. Taem iu story, iusim toktok “mi.” Olsem example, iu savve sei, “Mi wari tumas bikos hem naet nao and maet eni samting kasem iu” winim wei for sei, “Iu nating tingim mi nomoa bikos iu no talem kam wea nao iu long hem.” Taem iu story long kaenfala wei, datwan savve helpem iu for kontrolem kros bilong iu.

   Bible principle: “Toktok bilong iufala mas evritaem kaen and olsem iufala putim solt long hem.”​—Colossae 4:6.

•    Showimaot respect taem iu lisin. Bihaen iu storyim hao iu feel, lisin long marit partner and no katem story bilong hem. Taem hem story finis, repeatim bak wanem hem talem for mek sure iu minim wanem nao hem talem. Wei for just lisin hem barava important bikos hem savve helpem iu for kontrolem kros bilong iu.

   Bible principle: “Evriwan mas willing for lisin, no kwiktaem for toktok.”​—James 1:​19.