Technology savve helpem or spoelem marit blo iu. Hao nao wei for iusim technology hem affectim marit blo iu?

•  Wanem iu shud savve lo hem

•  Wanem iu savve duim

•  Wanem olketa narawan wea marit talem

•  Samting for storyim

•   Taem man iusim technology lo wisefala wei, datwan savve strongim marit. Olsem example, samfala hasband and waef iusim technology for story lo each other taem tufala duim difren samting lo day.

   “Wei for sendem text message wea sei ‘Mi lovem iu’ or ‘Mi tingim iu’ savve strongim marit.”—Jonathan.

•   Taem man no iusim technology lo wisefala wei, datwan savve spoelem marit. Olsem example, samfala iusim phone or tablet olowe, and hem spoelem taem wea olketa savve spendem witim marit partner blo olketa.

   “Mi savve hasband blo mi bae laek story lo mi staka taem sapos mi no bin iusim phone blo mi.”—Julissa.

•   Samfala pipol sei olketa savve story gud witim marit partner blo olketa and lo semtaem iusim phone or tablet blo olketa. Bat wanfala woman wea studyim wei blo olketa man, Sherry Turkle, sei “hem hard for man duim gud tufala samting lo semtaem.” Nomata pipol tingse hem gud for man duim staka difren samting lo semtaem, datwan hem no tru. Sherry sei “taem iumi trae for duim staka difren samting lo semtaem, iumi no barava duim gud eniwan lo olketa.” a

   ““Taem mi story witim hasband blo mi, mi enjoyim tumas, bat no lo taem wea hem duim staka samting lo semtaem. Taem hem duim olsem, datwan mekem mi tingse hem hapi for iusim phone or tablet blo hem nomoa and no kea sapos mi stap or nomoa.”—Sarah..

 Important samting for tingim: Wei wea iu iusim technology savve helpem or spoelem marit blo iu.

 Chusim olketa samting wea moa important. Bible sei: “Luksavve long olketa samting wea barava important.” (Philippi 1:10) Tingim diswan, ‘Waswe, taem wea mi and marit partner blo mi spendem lo phone or tablet hem spoelem taem wea mifala shud spendem tugeta?’

 “Mi sorre taem mi lukim man and woman gohed iusim phone taem olketa kaikai lo restaurant. Iumi no laek kamap slave lo technology and forgetim samting wea barava important, wea hem nao for iumi fren gud witim each other.”—Matthew.

 Markem haomas taem iu bae spendem lo technology. Bible sei: “Lukluk gud long samting wea iufala duim, mekem iufala wise and no olsem pipol wea no wise. Iusim gud taem bilong iufala.” (Ephesus 5:15, 16) Tingim diswan, ‘Waswe, mi savve markem taem for readim and ansarem olketa message wea no important tumas winim wei for ansarem olketa message semtaem mi kasem?’

 “Samting wea helpem mi hem for putim phone blo mi lo silent and then ansarem olketa message lo taem wea hem fitim mi. No staka taem samwan hem ring kam, sendem message, or e-mail wea barava important tumas for mi mas ansarem stretawe.”—Jonathan.

 Sapos fitim, duim waka blo iu lo waka ples nomoa. Bible sei: “Evrisamting hemi kamap long barava taem blong hem.” (Eklesiastes 3:1) Tingim olketa samting hia: ‘Taem mi lo haos, waswe, mi spoelem taem wea mi garem for famili bikos mi iusim phone for duim waka blo mi? Sapos olsem, hao nao diswan affectim marit blo mi? Wanem nao bae marit partner blo mi talem abaotem diswan?’

 “Bikos lo technology, iumi savve waka enitaem lo day or olowe nomoa. Mi mas trae hard for no chekim phone blo mi olowe and duim samting wea join witim waka taem mi and waef blo mi stap tugeta.”—Matthew.

 Story abaotem technology witim marit partner blo iu. Bible sei: “Man mas no tingim hemseleva nomoa, bat hem mas tingim nara pipol tu.” (1 Corinth 10:24) Story witim marit partner blo iu abaotem hao iutufala iusim technology and wanem samting nao maet iutufala need for changem. Iu savve iusim samting for storyim sekson lo disfala article.

 “Mi and olo blo mi honest lo each other, and mitufala feel free for story sapos narawan iusim tumas phone or tablet blo hem. Mitufala evriwan luksavve diswan savve kamap problem, so mitufala lisin lo tingting blo each other.”—Danielle.

 Important samting for tingim: Mek sure technology mekem laef blo iu isi and no kontrolem iu.