•   Iu no laek plan bat just duim samting nomoa, bat marit partner blo iu laek planim evriting.

•   Iu man wea kwaet, bat partner blo iu laekem tumas for story witim pipol.

 Hao, marit partner blo iu garem wanfala wei wea iu no laekem? Sapos iu tingim datwan olowe, hem savve spoelem marit blo iu. Tru tumas, Bible sei “man talem trabol moa, hemi lusim fren.”—Provebs 17:9.

 Trae for no argue abaotem wei blo marit partner blo iu, bat trae for tingim gud saed blo hem.

Lo disfala article

•  Tingim gud saed blo datfala wei blo marit partner

•  Wat olketa wea marit talem

•  Samting for storyim

 Nomata iu no laekem wanfala wei blo marit partner, maet datfala wei blo hem klosap olsem wanfala wei wea iu laekem tumas. Tingim thrifala example:

 “Hasband blo mi savve slow tumas for duim samting or for hem redi bifor mifala go samwea. Bat datfala wei blo hem mekem hem savve patient witim narawan, and witim mi tu. Samfala taem mi no laekem wei wea hem slow tumas, bat mi tingim hem samting wea mi lovem abaotem hem tu.”—Chelsea.

 “Waef blo mi savve planim evri sismol samting. Hem laekem evri samting for mas plan gud, and datwan savve mekem mi wiki lo hem. Bat mi tingim tu, wei blo hem olsem minim hem evritaem prepare gud.”—Christopher.

 “Hasband blo mi no savve interest lo olketa samting, and mi savve wiki lo datwan. Bat lo semtaem, wei wea hem isisi nomoa hem samting wea mekem mi for laek frenim hem. Mi laekem wei blo hem for no panic taem olketa samting happen wea savve mekem man stress.”—Danielle.

 Olsem Chelsea, Christopher, and Danielle lanem, plande taem wik point blo marit partner hem join witim gudfala wei blo hem. Dastawe, olsem man hard for aotem wan saed lo coin and keepim saed wea hem laekem, hard for man lusim wik point blo hem bat keepim nomoa gudfala wei blo hem.

 Hem tru, samfala wei blo iumi no garem gud saed lo hem. Olsem example, Bible sei samfala pipol “man fo kros.” (Provebs 29:22) Sapos olsem, kaen man olsem shud duim best blo hem for “lusim kaen wei for feel nogud and laek pei bak” and “lusim tu, wei for kros, singaot, [and] tok nogud.” a—Ephesus 4:31.

 Bat sapos iu just no laekem wanfala wei blo marit partner, followim disfala advaes lo Bible: “Nomata sapos eniwan long iufala hem feel nogud long narawan, hem mas no kros.”—Colossae 3:13.

 And tu, trae for tingim gud saed lo wei blo hem, samting wea mekem iu laek frenim hem. Wanfala hasband wea nem blo hem Joseph sei: “Sapos iumi tingim olowe datfala wei blo marit partner wea iumi no laekem, hem olsem iumi lukim nomoa sharp saed lo diamond bat no lukim wei wea diamond hem luk naes tumas.”

 First samting, iutufala savve ting raonem olketa kwestin hia seleva. Then iutufala savve storyim ansa blo iutufala tugeta.

•   Waswe, marit partner blo iu garem wanfala wei wea mekem iu laek argue witim hem? Sapos olsem, wat nao datwan?

•   Hao, datfala wei blo hem serious samting, or hem just samting wea iu no laekem nomoa?

•   Waswe, iu savve tingim gud saed blo datfala wei blo hem? Sapos olsem, wat nao datwan, and why nao iu tinghae lo datfala wei blo marit partner blo iu?