Wanem nao iu savve duim sapos son blo iu sei wanfala pikinini lo skul bullyim hem? Waswe, bae iu go story lo teacher and talem hem for mas panisim datfala pikinini? Waswe, bae iu lanem son blo iu hao for faet? Bifor iu disaedem eni samting, tingim samfala tru samting abaotem wanem hem minim for bullyim narawan. a

•  Wanem nao hem minim for bullyim narawan?

•  Hao nao mi savve helpem pikinini blo mi?

 Wanem nao hem minim for bullyim narawan? Wei for bullyim narawan hem minim for evritaem hitim narawan or tok spoelem hem for mekem hem feel nogud. Man wea bullyim narawan min for duim datwan. So no evri nogud samting wea pipol talem or duim hem minim olketa bullyim narawan.

 Why hem important for savve lo diswan: Samfala pipol iusim toktok “bullyim mi” for eni samting wea narawan duim wea mekem olketa feel nogud, nomata sapos datwan hem smol samting nomoa. Bat wei for komplen abaotem olketa smol samting wea happen lo pikinini blo iu no teachim pikinini hao for stretem olketa problem wea kamap, wea hem wanfala samting wea hem need for lanem.

 Bible principle: “Hemi nogud fo yu kros kuiktaem.”​—Eklesiastes 7:9.

 Important samting for tingim: Maet samfala taem iu need for duim samting for stretem problem, bat samfala taem hem gud for givim chance lo pikinini blo iu for lane hao for winim olketa hard taem and for stretem olketa problem wea hem garem witim narawan.​—Colossae 3:​13.

 Bat wanem nao iu savve duim sapos samwan evritaem tok spoelem pikinini blo iu or hitim hem?

•   Patient taem iu lisin lo pikinini blo iu. Trae for savve wanem nao happen and why olketa narawan bullyim hem. Mek sure iu savve lo evri samting wea happen bifor iu duim eni samting. For savve lo full story, maet iu need for story lo teacher blo pikinini blo iu or parents blo datfala pikinini wea bullyim hem.

   Bible principle: “Man hu hemi ansa bifoa hemi lisin, bae hemi krangge an filsem.”​—Provebs 18:13.

•   Sapos samwan really bullyim pikinini blo iu, helpem hem for luksavve wanem hem talem or duim savve stretem problem or mekem problem worse moa. Olsem example, Bible sei: “Tok isi long man wea hemi kros, bae hemi kol moa, tokstrong long hem, bae hemi hot moa.” (Provebs 15:1) Tru tumas, wei for pei bak savve mekem problem worse moa, and maet datfala bully barava duim moa samting lo pikinini blo iu.

   Bible principle: “No changem bak nogud samting wea narawan duim long iufala or tok spoelem man wea tok spoelem iufala.”​—1 Peter 3:9.

•   Explainim lo pikinini blo iu hao wei for no changem bak nogud samting no minim pikinini hem wik, olsem samfala pipol maet tingim. Bat hem showimaot pikinini hem strong bikos hem no letem datfala bully for kontrolem hem. Pikinini blo iu savve winim datfala bully lo wei for no duim kaen samting wea datfala bully duim.

   Hem important tumas for pikinini blo iu tingim diswan sapos samwan lo Internet nao bullyim hem. Sapos pikinini hem kros and gohed sendem message lo man wea bullyim hem, datwan savve mekem bully hia gohed message kam bak, and pipol savve sei pikinini blo iu kamap bully tu! Dastawe samfala taem best samting for duim hem for no message bak. Wei for duim datwan savve mekem datfala bully luksavve wanem hem trae for duim no waka and plande taem hem bae stop for duim datwan.

   Bible principle: “No eni faeawud, faea bae dae.”​—Provebs 26:20.

•   Samfala taem, pikinini blo iu savve stap klia lo pipol and olketa ples wea narawan bae bullyim hem. Olsem example, sapos hem savve wanfala pikinini or grup bae stap lo wanfala ples, hem savve followim difren road mekem hem no kasem olketa.

   Bible principle: “Man garem save, hemi lukim trabol, hem go long sef ples. Man no garem save, hem gohed long trabol, an hemi panis.”​—Provebs 22:3.

 TRAEM DISWAN: Helpem pikinini blo iu for tingim olketa gud samting and nogud samting wea savve happen for each example hia:

•  Wanem nao maet happen sapos hem no lisin lo pikinini wea bullyim hem?

•  Wanem nao maet happen sapos hem no fraet for talem datfala bully for stop?

•  Wanem nao maet happen sapos hem reportim bully hia lo teacher lo skul?

•  Hao nao wei for kaen and for fani savve help?

 Nomata sapos samwan bullyim pikinini blo iu lo Internet or taem hem lo skul, no evri kaen wei for bullyim samwan hem semsem. So trae for helpem pikinini blo iu savve lo best samting for hem duim. Olsem wanfala gud fren, mekem hem luksavve iu bae helpem hem lo hard taem olsem.

 Bible principle: “Fren blong yu, hemi lavem yu olowe. Brata blong yu, hemi helpem yu long hadtaem.”​—Provebs 17:17.