“Lo firstaem wea mitufala story witim dota blo mitufala abaotem alcohol, hem 6 year nomoa. Mitufala barava sapraes bikos hem savve lo staka samting abaotem datwan.”​—Alexander.

•  Wanem iu shud savve lo hem

•  Wanem iu savve duim

•  Wanem Bible talem abaotem alcohol

 Hem barava important for story lo pikinini abaotem alcohol. No weit go kasem pikinini blo iu hem teenager. Khamit, lo Russia hem sei: “Mi shud storyim alcohol witim son blo mitufala bifor hem kamap teenager. Taem son blo mi 13 year mi faendemaot hem man for drink and mi just luksavve nao why hem important for storyim datwan witim hem bifor hem teenager.”

 Why nao hem important for tingim diswan?

•   Olketa skulfren, olketa advertisement, and TV savve affectim tingting blo pikinini abaotem alcohol.

•   U.S. Centers for Disease Control and Prevention, sei olketa young wan wea no kasem 18 year nao drinkim 11 percent lo evri alcohol wea pipol peim lo United States.

 Iumi minim why olketa bigman saed lo health encouragem parents for teachim olketa pikinini taem olketa young yet abaotem why alcohol hem savve danger samting. Hao nao iu savve duim datwan?

 Tingim firstaem eni kwestin wea pikinini savve askem. Olketa young pikinini laek for savve lo plande samting, and olketa teenager barava olsem. Dastawe hem gud for redyim firstaem ansa for samting olketa bae askem. Olsem example:

•   Sapos pikinini blo iu ask abaotem teist blo wine, iu savve sei hem test olsem wanfala frut juice wea saoa, and beer savve saoa tumas.

•   Sapos pikinini blo iu laek teistim alcohol, iu savve talem hem alcohol hem strong tumas and no fitim body blo pikinini. Storyim hao alcohol savve mekem man for relax, bat sapos man drink tumas, bae eye blo hem raon, bae hem olobaot, and duim and talem olketa samting wea no fitim.​—Proverb 23:29-​35.

 Savve gud lo diswan. Bible hem sei: “Man hemi savve, hemi tingting fastaem bifoa hem duim samting.” (Provebs 13:16) Taem iu savve abaotem wei wea alcohol hem affectim man, and savve lo olketa law lo kantri abaotem alcohol, iu bae redi for helpem pikinini blo iu.

 Iu nao storyim diswan witim pikinini. Mark, wea hem wanfala dadi lo Britain, hem sei. “Olketa young wan savve konfius abaotem alcohol. Son blo mi hem eit year nomoa and mi laek savve lo tingting blo hem. Mi askem hem sapos hem stret or nomoa for drinkim alcohol. Mi no putim eni hevi lo hem for talem stretfala ansa bikos mi laekem hem for talem tingting blo hem.”

 Samting wea bae barava helpem pikinini for garem stretfala tingting abaotem alcohol hem for storyim datwan winim wanfala taem and lo taem iu storyim datwan, storyim olketa nara samting tu olsem sex education and road safety, fitim age blo hem.

 Showimaot example. Olketa pikinini savve followim tumas samting wea olketa lukim, and research showimaot main wan wea olketa followim nao hem parents blo olketa. Diswan minim, sapos iu drinkim alcohol for mekem iu relax, datwan bae mekem pikinini for tingse alcohol nao best samting for helpem man deal witim hevi. So showimaot gudfala example.