From staka danger stap lo social media, staka parents no letem pikinini blo olketa for iusim datwan. Bat, if iu letem teenager blo iu for iusim social media, hao nao bae iu helpem hem for luksavve lo nogud saed blo datwan and lane for iusim Internet lo wise wei?

Lo disfala article

•  Wat nao important lo teenager blo iu

•  Hao hem affectim feeling blo teenager blo iu

•  Wei blo teenager blo iu taem hem online

•  Samting for storyim

 Wat iu shud savve: From hem isi tumas for addict lo social media, teenager blo iu maet needim help for kontrolem haomas taem hem spendem lo datwan.

 Bible principle: “Luksavve long olketa samting wea barava important.”—Philippi 1:10.

 Samting for tingim: Waswe, wei for iusim social media mekem teenager blo iu no sleep gud, no duim homwok, or no spendem taem witim famili? Olketa wea duim research sei olketa teenager needim samting olsem naen hour for sleep each naet, bat olketa wea spendem samfala hour each day lo social media, luk olsem olketa sleep no winim seven hour each naet.

 Wat iu savve duim: Story raonem wat nao important lo teenager blo iu, and storyim hao hem wise for markem taem wea bae hem spendem lo social media. Mekem olketa rul wea fitim, olsem for no letem pikinini tekem device witim hem lo bed rum lo naet. Goal blo iu hem for helpem teenager blo iu for mekem grow wei for kontrolem seleva wea datwan bae helpem hem taem hem kamap adult.—1 Corinth 9:25.

 Wat iu shud savve: For lukluk lo olketa selfie wea olketa editim and olketa short video wea olketa frens blo olketa postim savve mekem wanfala young wan for feel lonely, wari, and depress.

 Bible principle: ‘Iufala mas lusim wei for jealous.’—1 Peter 2:1.

 Samting for tingim : Hao, social media savve mekem teenager blo iu for comparem lukluk blo hem witim olketa narawan? Hao, teenager blo iu feel dat olketa narawan garem gud laef winim hem and laef blo hem boring nomoa?

 Wat iu savve duim: Story witim teenager blo iu abaotem olketa danger blo wei for comparem hemseleva witim olketa narawan. Tingim hao maet diswan savve affectim olketa gele winim olketa boy, bikos olketa gele savve tingim tumas frenship blo olketa witim narawan and lukluk blo olketa. Iu savve talem teenager blo iu if hem savve stop firstaem for iusim social media for samfala taem. Wanfala young man wea nem blo hem Jacob sei: “Mi deletem social-media app blo mi for lelebet taem. Datwan helpem mi for ting raonem wat nao hem important lo mi and lo olketa narawan.”

 Wat iu shud savve: For joinim social media hem olsem iu putim iu front lo wanfala big crowd. Hem isi for pipol no minim each other and raoa savve kamap.

 Bible principle: “Lusim kaen wei for feel nogud and laek pei bak. Lusim tu, wei for kros, singaot, tok nogud, . . . Bat iufala mas kaen long narawan.”—Ephesus 4:31, 32.

 Samting for tingim: Hao, social media hem mekem teenager blo iu for join insaed lo wei for gossip, raoa, or talem olketa nogud toktok?

 Wat iu savve duim: Helpem teenager blo iu for garem gudfala wei taem hem iusim social media. Datfala buk Digital Kids sei: “Hem waka blo iumi olketa parents for teachim olketa pikinini dat wei for spoelem narawan hem samting wea iumi shud no duim nomata taem iumi online or meetim pipol.”

 Remember, social media hem no samting wea wanfala young wan mas garem and samfala parents no letem teenager blo olketa for iusim. If iu letem teenager blo iu for iusim social media, mek sure hem garem mature tingting for hem savve followim taem wea hem markem finis, keepim wei wea hem fren witim olketa narawan, and stap klia lo eni samting lo Internet wea no fitim.