Samfala parents wea tufala evriwan waka savve sendem smol pikinini blo olketa lo ples wea olketa kolem day care. Hem ples wea olsem kindy for olketa smol pikinini wea no redi for go skul yet. Waswe, hem gud for sendem pikinini blo iu lo ples olsem?

•  Olketa kwestin for tingim

•  Wanem iu savve duim

 Waswe, bae day care mekem iu and pikinini blo iu no klos? Maet olsem. Taem pikinini hem smol, brain blo hem kwiktaem lanem samting and hem affectim wei wea hem fren witim narawan. Trae for spendem staka taem witim pikinini blo iu taem hem smol.—Diutronomi 6:6, 7.

•    Parents wea ting for sendem pikinini lo day care shud ting raonem wanem olketa savve duim mekem olketa gohed klos lo pikinini.

 Waswe, bae day care affectim wei wea pikinini lisin lo iu? Maet olsem. Datfala buk Hold On to Your Kids sei: “Taem olketa pikinini wea no skul yet spendem staka taem tugeta, olketa savve followim tingting blo olketa fren blo olketa.”

•    Parents wea ting for sendem pikinini lo day care shud ting raonem sapos pikinini bae gohed lisin lo olketa or nomoa.

 Waswe, bae day care mekem hem moa isi for pikinini lane taem hem start skul? Samfala sei yes. Bat samfala narawan sei hem no really helpem pikinini for lanem samting. Penelope Leach, wanfala doctor wea studyim mind blo olketa pikinini, raet olsem: “No tingse ‘education’ nao hem big samting wea bae helpem pikinini lo laef blo olketa, and no tingse wei for pikinini start skul taem hem young tumas nao hem best samting. Sapos iu bilivim datwan, then maet iu no luksavve lo olketa gud samting wea pikinini blo iu lanem from iu start kam lo taem hem born.”

•   Parents wea ting for sendem pikinini lo day care shud tingting sapos datwan bae helpem pikinini or sapos olketa really need for go lo day care.

 Waswe, hem fitim for iu or marit partner blo iu savve lukaftarem pikinini and no waka? Lo samfala famili, dadi and mami, tufala evriwan waka mekem olketa savve garem staka selen and plande material samting. Waswe, wei for duim olsem hem best samting?

•   Parents wea ting for sendem pikinini lo day care shud ting raonem sapos olketa savve garem simpol laef, mekem wanfala savve lukaftarem pikinini and no waka.

 Bifor iu disaed for sendem pikinini lo day care, iu shud tingting gud firstaem lo olketa gud saed and nogud saed lo day care? Sapos iu duim datwan and iu tingse hem gud samting for duim, wat nao iu shud duim?

 Bible sei “man garem gudfala save, bae hemi tingim wei fo falom.” (Provebs 14:15) So hem gud for tingim datfala principle bifor iu disaed for sendem pikinini lo eni day care.

 Ting raonem olketa difren wei

•   Samfala parents chus for sendem pikinini lo day care wea kamap lo haos blo samwan. Lo ples olsem, maet wan or tu-thri pipol lukaftarem smol grup blo olketa pikinini.

•   Samfala parents askem wanfala relative, or haosgele wea stap witim olketa for lukaftarem pikinini blo olketa.

 Evriwan lo olketa difren wei hia hem garem gud saed and nogud saed. Maet hem gud for story witim olketa nara parents wea bin sendem pikinini lo wanfala day care! Bible sei: “Man hemi herem advaes hemi waes.”—Provebs 13:10.

 Waswe sapos iu disaed for sendem pikinini lo day care center? Sapos olsem . . .

 Faendemaot information abaotem datfala day care

•   Waswe, datfala day care garem license, or followim olketa law wea gavman markem? Waswe, datfala day care garem gud nem and pipol hapi lo hem?

•   Waswe, datfala day care hem klin and sef for olketa pikinini?

•   Wat nao bae pikinini blo iu duim lo there? a

 Faendemaot information abaotem olketa wea waka lo there

•   Olketa wea waka lo there kasem wat kaen training? Waswe, olketa kasem training for teachim olketa smol pikinini, for savve lo first aid, and CPR.

•   Waswe, iu savve chekim history blo olketa wea waka lo there for faendaot sapos eniwan duim criminal fasin bifor?

•   Waswe, olketa olowe garem olketa niu wakaman bikos pipol stop waka lo there? Sapos olsem, then pikinini blo iu bae need for olowe getius lo olketa niu wan wea start waka lo there.

•   Each wakaman hem lukaftarem haomas pikinini? Sapos wanfala wakaman mas lukaftarem staka pikinini, maet datwan minim hem no savve spendem staka taem witim pikinini blo iu. Bat haomas taem hem spendem witim pikinini blo iu bae depend lo age blo pikinini and wat datfala pikinini fit for duim seleva.

•   Sapos iu wari abaotem samting lo day care, waswe, olketa wea waka lo there willing for lisin lo iu? Waswe, olketa willing for storyim samting wea olketa wari abaotem tu?