Elijah herem disfala nius: King Ahab hem dae nao. Masbi datfala olo profet holem beard bilong hem and lukluk strong nomoa long wan ples, and tingim bak staka year wea hem mas deal witim datfala nogud king. Staka hard samting nao Elijah mas deal witim! Staka taem Ahab and queen bilong hem, Jezebel, mekem hem fraet and lukaotem hem for killim hem, gogo hem klosap dae tu. King Ahab nating duim eniting for stopem Jezebel for givim order for killim dae staka profet bilong Jehovah. And tu, from King Ahab and Jezebel tufala greedy, tufala planim dae bilong Naboth, wea innocent and no duim eni nogud samting, and olketa son bilong hem. So, Elijah talemaot judgment message bilong Jehovah againstim Ahab and famili bilong hem. Toktok bilong God hem kamap tru. Ahab hem dae barava olsem hao Jehovah hem talem.​—Fas Kings 18:4; 21:​1-​26; 22:37, 38; Mektu Kings 9:​26.

Nomata olsem, Elijah savve hem mas gohed and no givap. Jezebel hem laef yet, and gohed for forcem famili bilong hem and datfala nation for duim olketa nogud samting wea hem laekem. Staka samting bae no isi for Elijah deal witim, and hem garem big waka yet for teachim fren bilong hem, Elisha, wea bae changem hem. So bae iumi storyim thrifala last assignment bilong Elijah. Taem iumi lukim hao faith helpem hem for no givap, maet iumi tu, savve wanem for duim for strongim faith bilong iumi, long olketa hard taem distaem.

Bihaen Ahab dae, son bilong hem and Jezebel, Ahaziah, kamap king long Israel. Winim wei for duim stret samting, hem followim tu nogud wei bilong parents bilong hem. (Fas Kings 22:52) Ahaziah worshipim Baal olsem tufala. Eniwan wea worshipim Baal savve duim olketa nogud samting. Hem nao for encouragem olketa jury man and woman for stap long temple and for sakrifaesim tu olketa pikinini. Waswe, eni samting bae mekem Ahaziah for change and leadim pipol from olketa nogud samting hia wea mekem olketa for no faithful long Jehovah?

Seknomoa nogud samting kasem datfala young king wea praod. Hem foldaon long ruf long haos bilong hem and garekil nogud. Nomata hem klosap dae, hem no luk long Jehovah for helpem hem. Bat hem sendem samfala man bilong hem for go long Ekron long Philistine for askem god Baal-zebub for savve sapos bae hem kamap gud or nomoa. Jehovah no hapi long datwan and sendem wanfala angel go long Elijah for hem stopem olketa man hia. Elijah sendem olketa go bak long king witim wanfala strong message. Ahaziah duim bigfala sin taem hem duim samting wea mekem hem luk olsem Israel no garem God. Jehovah sei Ahaziah bae no savve go aot from bed bilong hem.​—Mektu Kings 1:​2-4.

Ahaziah no laek repent and tok strong olsem: “Man ya hemi luk hao?” Olketa man bilong hem sei hem werem wanfala kaleko bilong wanfala profet, and semtaem nomoa Ahaziah sei: “Elaeja ya.” (Mektu Kings 1:​7, 8) Hem important for savve Elijah garem simpol laef, and waka bilong Jehovah nao main samting long hem, dastawe taem olketa storyim kaleko wea hem werem, olketa kwiktaem savve long hem. No eniwan savve talem toktok olsem abaotem Ahaziah and parents bilong hem bikos olketa greedy tumas. Example bilong Elijah helpem iumi for followim kaonsel bilong Jesus for garem simpol laef, and main samting long laef hem for duim wanem Jehovah laekem.​—Matthew 6:​22-​24.

Ahaziah laek for pei bak, so hem sendem 50 soldia and komanda bilong olketa for kasholem Elijah. Taem olketa faendem Elijah “sidaon antap long wanfala maonten,” a datfala komanda singaot and sei king talem for iu “mas kamdaon.” Datwan minim for olketa leadim hem for killim hem dae. Tingim datwan! Nomata olketa savve Elijah hem “man blong [“tru,” NW] God,” olketa soldia hia tingse hem stret for mekem hem fraet and sei for killim hem dae. Samting wea happen hem barava difren! Elijah sei long datfala komanda: “Sapos mi man blong God tru, faea bae hemi kamdaon from heven, an bonem yu wetem olketa soldia blong yu.” God duim samting! “Faea hemi kamdaon an bonem komanda ya wetem olketa soldia blong hem.” (Mektu Kings 1:​9, 10) Datfala nogud samting wea kasem olketa soldia hia showimaot Jehovah evritaem duim samting long pipol wea ting daonem and no respectim olketa wakaman bilong hem.​—Fas Kronikols 16:21, 22.

Ahaziah sendem nara komanda witim 50 soldia moa. Datfala komanda barava worse winim first wan. Hem nating lane from samting wea happen long 51 man wea dae finis, nomata maet asis bilong olketa still stap yet long datfala maunten. And tu, hem orderim Elijah olsem datfala first komanda wea no showimaot respect for “kamdaon,” bat hem talem tu for Elijah mas “kwiktaem”! Hem krangge tumas! So hem and olketa man bilong hem tu fire bonem olketa and dae. Datfala king tu duim samting wea krangge go moa. Hem nating feel sorre, and sendem nara grup bilong olketa soldia moa. Bat disfala mek-thri komanda hem wise. Hem hambol and begim Elijah for sorre long hem and olketa man bilong hem mekem olketa no dae. Elijah, man bilong God, followim example bilong Jehovah for showimaot mercy taem hem duim samting wea datfala hambol komanda askem. Angel bilong Jehovah talem Elijah for go witim olketa soldia hia. Elijah obey and go talem moa long datfala nogud king judgment message bilong Jehovah againstim hem. Ahaziah hem dae olsem God talem. Hem rul for tufala year nomoa.​—Mektu Kings 1:​11-​17.

Hao nao Elijah gohed faithful nomata pipol wea stap raonem hem olketa bighed and praod? Datfala kwestin hem barava fitim distaem, iaman? Waswe, enitaem iu feel nogud from samwan wea iu tinghae long hem no laek for followim gudfala advaes and gohed nomoa for followim samting wea gogo hem spoelem hem? Hao nao iumi savve gohed faithful taem samting olsem happen? Maet iumi lanem samting from ples wea Elijah stap taem olketa soldia faendem hem. Hem stap “antap long wanfala maonten.” Iumi no sure long reason why Elijah long there, bat from hem man for prea, hem savve for stap long kwaet ples olsem givim hem chance for prea long God and fren gud witim hem. (James 5:​16-​18) Iumi tu savve markem taem for story seleva witim God, prea long nem bilong hem, and talemaot olketa problem and wari bilong iumi long hem. Taem iumi duim olsem, datwan bae helpem iumi for gohed faithful nomata pipol raonem iumi duim krangge samting wea savve spoelem olketa seleva.

Hem kasem taem nao for Elijah givim waka bilong hem long narawan. Tingim wanem hem duim. Taem hem and Elisha lusim taon long Gilgal, Elijah talem Elisha for weit, and hemseleva bae go long Bethel, wea hem samting olsem 11 kilometer from there. Bat Elisha hem sei: “Olsem [Jehovah] hemi laef an yu tu yu laef, mi talem stret, bae mi no lusim yu.” Bihaen tufala kasem Bethel, Elijah talem Elisha hemseleva nomoa bae go long Jericho, wea hem samting olsem 22 kilometer from Bethel. Elisha talem sem samting wea hem talem firstaem. Taem tufala long Jericho, sem samting happen moa bifor tufala go long Jordan River, wea hem samting olsem 8 kilometer from Jericho. Elisha no changem tingting bilong hem. Hem sei bae hem no lusim Elijah!​—Mektu Kings 2:​1-6.

Elisha showimaot wanfala important fasin. Hem nao love. Ruth showimaot diskaen love for Naomi, hem kaen love wea hem evritaem faithful and no savve let go. (Rut 1:​15, 16) Evriwan wea worshipim God mas garem datfala fasin distaem winim enitaem bifor. Olsem Elisha, waswe, iumi luksavve why iumi mas garem datfala fasin?

Masbi Elijah barava hapi taem hem lukim young fren bilong hem lovem hem. From Elisha lovem and faithful long Elijah, hem garem privilege for lukim last mirakol bilong hem. Long saed long Jordan River, wea ran strong and deep long samfala ples, Elijah hitim wata witim longfala kaleko bilong hem. Then wata hem divaed! “Fiftifala profet” tu lukim disfala mirakol, luk olsem hem samfala long olketa wea kasem training for leadim tru worship. (Mektu Kings 2:​7, 8) Masbi Elijah nao trainim olketa. From samfala year bifor Elijah tingse hem nomoa wanfala faithful profet wea stap. Start long datfala taem, Jehovah blessim Elijah from hem faithful, and hem lukim pipol bilong God duim stret samting moa.​—Fas Kings 19:10.

Bihaen olketa katkros long Jordan, Elijah sei long Elisha: “Bae [Jehovah] hemi tekem mi goap. Sapos yu garem enisamting wea yu laekem mi fo duim fo yu fastaem, hemi gud fo yu talem long mi nao.” Elijah savve hem kasem nao taem for hem go. Hem no jealous long olketa privilege and position wea young fren bilong hem bae kasem. Bat Elijah willing for helpem hem long eni samting. Diswan nomoa Elisha askem: “Disfala paoa blong spirit blong yu, plis yu mekem mi garem dabol long hem.” (Mektu Kings 2:9) Taem hem askem datwan, hem no minim for Elijah dabolem paoa bilong holy spirit and givim long hem winim Elijah. Bat wanem hem askem, hem olsem tufala part long evri samting wea firstborn garem raet for kasem. Diswan hem followim law wea sei for firstborn kasem big part or dabol long olketa samting, fitim niu responsibility bilong hem olsem hed long famili. (Diutronomi 21:17) From Elisha kasem waka bilong Elijah, hem luksavve hem mas no fraet olsem Elijah mekem hem duim gud waka bilong God.

Elijah hambol and leavim datwan long hand bilong Jehovah. Sapos Jehovah letem Elisha for lukim taem God tekem datfala olo profet, Elijah, then ansa bilong God for samting wea Elisha askem hem yes. And then nomoa, taem tufala gud fren hia “gohed fo wakabaot an toktok,” wanfala interesting samting hem happen!​—Mektu Kings 2:​10, 11.

Wanfala difren kaen laet hem shaen long skae and muv kakam klosap. Maet iumi tingim saond bilong big wind wea seknomoa blow kam, witim wanfala samting wea braet tumas hem hariap kam for tufala man hia and separatem tufala, wea maet mekem tufala sapraes fogud. Samting wea tufala lukim hem wanfala chariot, wea braet olsem fire wea laet. Elijah savve hem kasem taem for hem go nao. Waswe, hem go insaed datfala chariot? Bible no talem. Bat hem feel olsem samting liftim hem gogo ap long air and datfala big wind karem hem nao!

Elisha lukluk and sapraes fogud. From hem lukim disfala nambawan mirakol, Elisha savve Jehovah bae dabolem paoa bilong spirit wea stap long Elijah and givim long hem. Bat from Elisha sorre tumas hem no laek for tingim datwan. Hem no savve wea nao gud fren bilong hem go, bat hem savve bae hem no lukim hem moa. Hem krae and sei: “Fata blong mi! Fata blong mi! Mi lukim kaat fo faet an olketa man i raed long olketa hos blong Israel.” Hem lukluk taem man wea helpem hem lus insaed olketa cloud, then Elisha brekem kaleko bilong hem from hem sorre tumas.​—Mektu Kings 2:​12.

Taem Elijah gogo ap long skae, waswe, hem herem young fren bilong hem krae for hem and maet hemseleva tu krae lelebet? Nomata wanem happen, hem savve for garem gudfala fren olsem nao helpem hem for gohed faithful taem hem kasem samfala hard taem. Iumi savve lane from example bilong Elijah and fren witim pipol wea lovem God and wea traem best for duim wanem hem laekem!

Wea nao Elijah go? Samfala religion teachim hem go ap long heven for stap witim God. Bat hem hard for olsem. Staka handred year bihaen, Jesus sei taem hem stap long heven, no eniwan go ap long heven. (John 3:​13) So taem Bible sei: “Strongfala win i kam tekem Profet Elaeja goap long heven,” iumi laek for savve, hem wanem kaen heven? (Mektu Kings 2:​11) Taem Bible storyim “heven” hem no minim nomoa ples wea Jehovah stap, bat hem savve minim tu skae wea cloud hem stap and olketa bird flae long hem. (Sams 147:8) So datfala heven or skae nao Elijah go ap long hem. So olsem wea nao hem go?

Jehovah sendem datfala profet wea hem lovem long wanfala niu assignment, long kingdom bilong Judah. Bible sei Elijah hem still waka long there, maet for winim sevenfala year. Long datfala taem, nogud King Jehoram nao rulim Judah. Hem maritim dota bilong Ahab and Jezebel, so nogud wei bilong olketa hem no finis yet. Jehovah talem Elijah for raetem wanfala leta wea talemaot Judgment message againstim Jehoram. Olsem Jehovah talem, hao Jehoram dae hem barava nogud tumas. Worse samting nao, Bible sei: “Taem hemi dae, no eniwan hemi sore long hem.”​—Mektu Kronikols 21:12-​20.

Datfala nogud man hem barava difren from Elijah! Iumi no savve hao or wanem taem nao Elijah hem dae. Bat iumi savve Elijah no dae olsem Jehoram, wea no eniwan sorre for hem taem hem dae. Elisha barava missim fren bilong hem. Masbi olketa nara faithful profet tu missim hem. Jehovah barava tinghae long Elijah, bikos samting olsem 1,000 year bihaen, long vision wea lukluk bilong Jesus hem change, Jehovah mekem olketa aposol for lukim samwan olsem Elijah. (Matthew 17:​1-9) Waswe, iu laek for lane from Elijah and garem strongfala faith mekem iu no givap nomata iu kasem hard taem? So, no forget for fren witim olketa wea lovem God, for mekem waka bilong Jehovah nao main samting long laef, and for evritaem prea from heart. Hem gud for Jehovah lovem iu tu long heart bilong hem for olowe!