Evriwan stap kwaet nao. Maet only samting wea olketa herem hem wind wea blow kam from Arabian desert. Job hem taed and no savve talem eni samting moa lo olketa. Piksarem Job. Hem lukluk strong lo Eliphaz, Bildad, and Zophar, olsem hem laekem olketa for talem nara samting moa. Bat thrifala hia no laek lukluk lo Job bikos olketa kleva toktok and nogud samting wea olketa talem abaotem Job hem fail. (Job 16:3) Job disaed strong for stap faithful.

Datwan hem important samting lo hem. Hem lusim selen blo hem, evri pikinini blo hem dae, olketa fren and neiba no respectim and helpem hem, and health blo hem barava nogud. Skin blo hem garem olketa soa and kamap blak and olketa worm fulap lo olketa soa. And mouth blo hem smel nogud tu. (Job 7:5; 19:17; 30:30) Bat olketa nogud samting wea thrifala man talem mekem Job barava kros. Hem barava laek pruvim hem no wanfala rabis man and sinner olsem olketa talem. Lastfala toktok blo Job mekem thrifala hia stap kwaet. Olketa no savve talem eni rabis toktok moa. Bat Job feel nogud and body blo hem gohed pain. Hem barava needim samwan for helpem hem!

Evri samting hia mekem Job no tingting stret. Hem needim samwan for helpem and stretem hem. Hem needim samwan for encouragem and lukaftarem hem, olsem thrifala man shud duim bat olketa no duim. Waswe, enitaem iu feel olsem iu needim samwan for helpem and comfortim iu? Waswe, enitaem iu feel wikdaon bikos man wea iu tingse hem fren blo iu no helpem iu? Taem iumi lanem hao Jehovah God helpem Job and wanem Job duim, datwan savve encouragem and helpem iumi.

Iumi lanem interesting samting lo buk blo Job. Wanfala nara man hem stap witim olketa tu, datfala young man Elihu. Taem thrifala olo man toktok lo Job, Elihu hem gohed lisin. And hem kros tumas lo wanem olketa talem.

Elihu hem no hapi lo Job. Hem kros tumas bikos wanem olketa man talem mekem Job for sei “hemi wanfala stretfala man, an hemi gohed fo talem dat God nao hemi no stret.” Bat Elihu feel sorre lo Job tu bikos hem lukim hem pain, hem trae for duim stret samting, and hem barava needim kaenfala kaonsel and comfort. Gogo Elihu hem no patient nao witim thrifala laea fren hia! Hem herem olketa tok nogud lo Job and trae for mekem Job no garem faith, tingse hem iusles, and no faithful lo God. And tu, olketa talem olketa laea samting wea mekem hem luk olsem God nao duim olketa rabis samting. Elihu barava laek tok lo olketa nao!—Job 32:2-4, 18.

Elihu sei: “Mi wanfala yang man nomoa, an yufala olo nao, dastawe mi fraet fo talemaot tingting blong mi long yufala.” Bat hem no savve hol bak nao. Hem sei: “I no olketa oloman nomoa hu i waes, an i no olo nomoa hu hemi save long wanem hemi stret.” (Job 32:6, 9) Then Elihu storyim staka samting lo olketa, wea showimaot datfala toktok hem tru. Hao hem story lo Job hem barava difren from Eliphaz, Bildad, and Zophar. Elihu talem Job hem bae no tok daonem hem or mekem hem feel nogud. Hem showimaot respect lo Job lo wei for iusim nem blo hem taem hem story and hem talem Job hem luksavve olketa hia nating respectim hem. a Hem sei: “Plis Job, lisin kam lo mi.”—Job 33:1, 7; 34:7 NW.

Elihu givim disfala kaonsel lo Job: “Mi bin herem wanem yu talem ya. Yu bin talem dat yu stret fogud an yu no sin. An yu bin talem dat yu klin long ae blong God an yu no fit fo panis. Yu bin talem dat God hemi faendem enikaen rison fo panisim yu.” Then Elihu storyim wanem nao problem blo Job. Hem sei: “Job, ating wei blong yu hemi no stret. Yu talem dat laef blong yu hemi stret nomoa long ae blong God.” Elihu mas stretem hem. Hem sei: “Mi talem long yu, yu rong nao ya.” (Job 33:8-12; 35:2) Elihu luksavve Job hem barava kros bikos hem lusim staka samting and olketa laea fren talem olketa barava nogud samting abaotem hem. Bat Elihu warnim Job: “Iu mas lukaot, nogud wei for kros hem mekem iu go rong from stretfala wei blo God.”—Job 36:18 NW.

Important samting nao, Elihu explainim dat Jehovah God hem evritaem duim stret samting. Hem mekhae lo disfala tru samting: “God hu hemi garem evri paoa, hemi no save duim eni ravis samting. . . . Hemi no save spoelem stretfala wei.” (Job 34:10, 12) Elihu helpem Job for luksavve Jehovah showimaot mercy and evritaem duim stret samting. From Job tingim hemseleva, hem talem samfala samting wea no showimaot respect lo Jehovah. Jehovah fit for panisim Job bat hem no duim datwan. (Job 35:13-15) And Elihu no tingse hem savve lo evri samting bat hem hambol and sei: “Yumi kanot save gudfala long paoa blong God.”—Job 36:26.

Nomata Elihu tok stret lo Job, hem kaen lo hem. Hem storyim nambawan hope dat Jehovah bae mekem Job healthy moa. God bae sei lo faithful servant blo hem: “Long taem olsem, bodi blong man ya save kamap gud, an bae hemi strong moa olsem yang man.” Nara kaenfala samting Elihu duim, hem askem Job for story kam and no just talem Job wanem hem shud duim. Hem sei: “Mi laekem toktok blong yu fo somaot dat yu stret nomoa.” (Job 33:25, 32) Bat Job no talem eni samting. Maet hem bikos Elihu hem kaen tumas and encouragem hem dastawe hem no need for mekem excuse for wanem hem talem. Maet Job hem krae taem hem luksavve Elihu tingim hem.

Iumi lanem staka samting from tufala faithful man hia. Iumi lanem from Elihu hao for givim kaonsel and comfortim man wea needim help. Wanfala tru fren bae no hol bak for stretem iu or warnim iu bifor iu duim bigfala mistek nomata sapos datwan hem no isi for hem duim. (Provebs 27:6) Iumi laek for kamap fren olsem wea kaen and encouragem narawan nomata sapos datfala man hem talem samting wea no stret. And taem iumi needim kaonsel, iumi savve tingim example blo Job and hao iumi mas hambol and lisin lo datfala kaonsel. Iumi evriwan needim kaonsel. Wei for acceptim kaonsel savve sevem laef blo iumi.—Provebs 4:13.

Plande taem Elihu story abaotem wind, olketa cloud, thunder, and laetning. Hem sei olsem abaotem Jehovah: “Yufala evriwan mas lisin long voes blong God wea hemi kamaot olsem tanda.” Then Elihu story abaotem wanfala “strong wind.” (Job 37:2, 9 NW) Luk olsem taem Elihu story kam, wind hem kamap big moa gogo wanfala strong wind blow nao. And then seknomoa Jehovah hem toktok!—Job 38:1.

Taem iumi readim buk blo Job, iumi feel hapi taem iumi readim olketa chapter wea storyim wanem Jehovah talem lo Job. Hem olsem wanfala strong wind hem blowim go evri rabis and laea toktok blo Eliphaz, Bildad, and Zophar. Jehovah story firstaem lo Job and then hem story go lo olketa. Hem story stret lo Job bat lo kaenfala wei, olsem wanfala dadi wea stretem son blo hem.

Jehovah luksavve lo pain wea Job feelim. And hem feel sorre lo Job olsem hem feel sorre taem eni pikinini blo hem safa. (Aesaea 63:9; Sekaraea 2:8) Bat hem savve Job mekem problem blo hem worse bikos hem “toktok bat hem no savve lo eni samting.” Jehovah stretem Job lo wei for askem staka kwestin lo hem, olsem “Yu stap long wea, taem mi mekem wol ya? Sapos yu save long olketa samting ya, yu talem kam long mi.” Lo start blo creation, “olketa sta,” wea hem nao olketa angel, olketa hapi tumas and singsing bikos lo wanem Jehovah creatim. (Job 38:2, 4, 7) Bat Job hem nating savve abaotem olketa samting hia.

Jehovah gohed story abaotem creation blo hem. Hem explainim lo Job lelebet samting abaotem science, olsem olketa star, biology, geology, and physics. And Jehovah story abaotem samfala animal wea stap lo datfala area, olsem lion, raven, maunten goat, wild donkey, wild bull, ostrich, horse, falcon, eagle, Behemoth (luk olsem hem hippopotamus), and Leviathan (luk olsem hem crocodile). Tingim privilege wea Job kasem for herem wanfala tok abaotem earth from Creator blo universe! b

Why nao Jehovah tok abaotem olketa samting hia? Hem bikos Job need for hambol. From hem komplen and tingse Jehovah nao spoelem hem, datwan spoelem wei wea hem fren witim Dadi blo hem lo heven and mekem evri samting worse. So Jehovah gohed askem Job wea nao hem taem Jehovah wakem olketa nambawan samting lo universe and sapos Job savve feedim and kontrolem olketa wild animal. Sapos Job no savve kontrolem olketa samting wea Jehovah creatim, hem no garem raet for talem Creator blo hem wanem for duim! Jehovah nao barava savve wanem nao hem need for duim and hao for duim datwan winim wanem Job savve lo hem or minim!

Evri samting wea Jehovah talem showimaot hem barava lovem Job. Hem olsem Jehovah sei lo Job: ‘Son blo mi, sapos mi savve wakem and lukaftarem evri samting hia, waswe, iu really tingse mi no savve lukaftarem iu? Waswe, iu tingse mi bae lusim iu, killim dae olketa pikinini blo iu, tekem olketa samting wea bae mekem iu stap gud, and spoelem health blo iu? Mi nomoa savve mekem iu kasem bak olketa samting wea iu lusim and healim iu!’

Jehovah askem olketa kwestin lo Job for mekem hem tingting, and tufala taem nomoa Job ansa kam. Job no argue or trae for mekem olketa excuse, bat hem hambol and luksavve hem no savve lo staka samting and hem repent from wanem hem talem. (Job 40:4, 5; 42:1-6) Job barava showimaot hem garem strongfala faith bikos nomata wanem samting kasem hem, hem gohed trustim Jehovah. Hem acceptim kaonsel from Jehovah and changem tingting blo hem. So hem gud for iumi tu tingim diswan, ‘Waswe, mi hambol for acceptim kaonsel?’ Iumi evriwan needim datwan. Taem iumi acceptim kaonsel, iumi followim faith blo Job.

Jehovah savve Job hem safa, so hem duim samting for comfortim hem. Jehovah tok olsem lo Eliphaz, wea luk olsem hem nao olo winim nara tufala laea fren: “Mi kros tumas long yu an tufala fren blong yu ya, bikos yufala nating toktru abaotem mi, olsem toktok blong wakaman blong mi Job.” (Job 42:7) Tingim wanem Jehovah talem. Waswe, Jehovah sei thrifala man hia nating talem eni tru samting or evri samting wea Job talem hem stret? Nomoa. c Bat Job hem barava difren from thrifala man hia. Job barava safa bikos olketa pikinini blo hem dae and olketa man talem olketa laea toktok abaotem hem. So iumi luksavve why Job talem samfala samting wea no stret. Bat Eliphaz and tufala fren blo hem nating kasem olketa hard taem olsem Job. Olketa min for tok spoelem Job bikos olketa praod and faith blo olketa wik. Olketa no tok spoelem Job wea innocent nomoa, bat olketa mekem hem luk olsem Jehovah hem wanfala rabis God wea laek spoelem pipol!

So iumi no sapraes Jehovah mekem olketa man hia for givim wanfala expensive sakrifaes. Olketa mas givim sevenfala bull and sevenfala man sheepsheep. Diswan bae kostim staka selen bikos gogo taem olketa Israelite kasem Law blo Moses, bull nao sakrifaes wea hae priest mas offerim sapos sin blo hem mekem full nation guilty. (Levitikas 4:3) Bull hem kostim staka selen winim eni nara animal wea olketa Israelite sakrifaesim followim Law. Nara samting tu, Jehovah sei hem bae acceptim sakrifaes blo thrifala hia only sapos Job prea firstaem for olketa. d (Job 42:8) Masbi wanem Jehovah talem barava comfortim Job and for lukim Jehovah nao stretem evri samting!

Jehovah trustim dat Job bae duim wanem hem askem and diswan bae showimaot Job forgivim olketa. And hem nao wanem Job duim. (Job 42:9) Wanem Job duim showimaot hem faithful lo Jehovah, samting wea moa important winim wanem hem savve talem. And from hem obeyim Jehovah, Jehovah barava blessim hem.

Jehovah “hem lovem [Job] and hem showimaot mercy long hem.” (James 5:11) Lo wanem wei? Jehovah mekem Job healthy moa. Tingim feeling blo Job taem hem lukim body blo hem “kamap gud . . . olsem yang man” olsem Elihu bin talem! Famili and olketa fren blo hem kam for sapotim hem and provaedem wanem hem needim. Jehovah mekem hem kasem dabol lo evri samting wea hem lusim. And wanem nao Jehovah duim for helpem hem for deal witim sorre wea hem kasem from hem lusim olketa pikinini blo hem? Gogo Job and waef blo hem garem tenfala pikinini moa and iumi sure datwan helpem olketa for hapi lelebet nomata olketa still misstim tenfala pikinini wea dae! And Jehovah duim mirakol for mekem Job stap laef nara 140 year moa gogo hem lukim fofala genereson moa lo famili blo hem. Job hapi lo laef gogo “taem hemi dae, hemi barava olo fogud.” (Job 42:10-17) And lo Paradaes, Job and waef blo hem bae lukim famili blo olketa moa witim tenfala pikinini wea dae bikos lo wanem Satan duim.—John 5:28, 29.

Why nao Jehovah barava blessim Job olsem? Bible sei: “Iufala herem finis story abaotem Job. Hem no givap long olketa hard taem wea kasem hem.” (James 5:11) Nomata staka nogud samting kasem Job winim wanem iumi savve tingim, hem “no givap.” Diswan helpem iumi for luksavve Job no just winim olketa hard taem hia bat hem lovem Jehovah and gohed faithful lo hem. Hem no gohed kros or feel nogud, bat hem willing for forgivim olketa wea tok spoelem hem. And hem evritaem tingim nambawan hope blo hem and for gohed faithful lo God.—Job 27:5 NW.

Iumi evriwan mas gohed strong and no givap. Iumi sure Satan bae trae for mekem iumi feel wikdaon olsem hem duim lo Job. Bat sapos iumi no givap, gohed hambol, willing for forgivim olketa narawan, and faithful lo God, iumi tu bae kasem olketa nambawan samting lo future. (Hebrew 10:36) Sapos iumi faithful olsem Job, Satan bae kros tumas lo iumi bat Jehovah wea lovem iumi bae barava hapi lo iumi!