Piksarem Job. Hem sidaon lo graon, and full body blo hem garem olketa boela lo hem wea pain tumas. Hem stap seleva, hem daonem hed blo hem, and hem no garem eni strong tu for raosem olketa flae wea kam lo hem. Hem sidaon lo asis for showimaot hem sorre tumas, and hem tekem wanfala pis clay pot wea brek for skrasem olketa soa lo body blo hem. Bifor, pipol savve respectim hem tumas, bat distaem olketa barava les lo hem! Olketa fren, neiba, and olketa relative lusim hem. Pipol tok spoelem hem, nomata olketa pikinini tu. Hem tingse God blo hem Jehovah les lo hem tu, bat hem no olsem.—Job 2:8; 19:18, 22.

God sei olsem abaotem Job: “No eni man lo disfala world hem olsem hem.” (Job 1:8 NW) Staka handred year bihaen, Jehovah still ting lo Job olsem wanfala barava raeteous man wea bin stap lo earth.—Esikiel 14:14, 20.

Waswe, iu kasem hard taem or nogud samting happen lo iu distaem? Story blo Job savve barava comfortim iu. Hem savve helpem iu for luksavve tu lo wanfala fasin wea evriwan wea worshipim God need for showimaot, wea hem nao wei for faithful. Man wea faithful lo God hem nating laek lusim God nomata hem kasem olketa hard taem. Hem bae gohed duim wanem God hem laekem. Bae iumi lanem olketa nara samting from Job.

Luk olsem olketa year bihaen Job dae, datfala faithful man Moses raetem story blo Job and wanem hem happen lo hem. God givim holy spirit lo Moses mekem hem savve raetem daon olketa samting wea kasem Job lo earth, and samfala samting wea happen lo heven lo datfala taem tu.

Story blo Job start olsem. Hem hapi and enjoyim laef. Hem rich, and hem stap lo datfala kantri Uz, wea maet hem lo north part blo Arabia. Staka pipol lo there savve gud lo hem and respectim hem. Hem kaen tumas lo olketa wea poor and hem helpem and sapotim olketa wea needim protection. Job and waef blo hem garem tenfala pikinini. Bat samting wea moa important lo Job hem wei wea hem fren witim God. Nomata hem no barava klos relative blo Abraham, Isaac, Jacob, and Joseph, hem trae for duim samting wea Jehovah hapi lo hem, olsem olketa man hia duim. Olsem olketa, Job tu waka olsem wanfala priest for famili blo hem. Hem evritaem bonem olketa sakrifaes lo God for olketa pikinini blo hem.—Job 1:1-5; 31:16-22.

Moses storyim olketa samting hia bat then seknomoa hem storyim samting wea happen lo heven. Iumi savve read abaotem olketa samting hia bat Job no savve wanem hem happen lo heven. Lo datfala taem, olketa faithful angel kam front lo Jehovah and Satan tu kam lo hem. Jehovah savve finis Satan les tumas lo datfala raeteous man Job, so God story lo Satan and talem hem hao Job hem barava faithful man. Satan tok olsem lo God: “Waswe, sapos yu no helpem hem, yu tingse bae hemi tinghae long yu? Nomoa nao. Olowe nao, yu gohed fo lukaftarem hem wetem olketa pikinini blong hem an evrisamting wea hemi onam, an yu gohed fo gadem olketa.” Satan heitim pipol wea gohed faithful. Taem olketa showimaot olketa lovem and worshipim Jehovah God, datwan pruvim hao Satan hem wanfala enemy wea no lovem eniwan. So lo tingting blo Satan, Job worshipim God for olketa selfish reason nomoa. Hem sei sapos Job lusim evri samting, Job bae tok spoelem Jehovah!—Job 1:6-11.

Job no savve hao Jehovah givim bigfala privilege lo hem for pruvim Satan hem laea. Jehovah letem Satan for spoelem evri samting wea Job garem, bat hem mas no duim eni samting lo Job. So Satan start nao. Insaed wanfala day nomoa, olketa barava nogud samting happen. Job herem nius hao olketa animal blo hem dae or olketa narawan tekem. First wan hem olketa buluka and donkey, then olketa sheepsheep, and then olketa camel blo hem. And samting wea moa worse, samfala grup killim dae olketa wakaman wea lukaftarem olketa animal hia. And “fire from God,” wea maet hem laetning nao killim dae wanfala grup hia. Job no garem taem for trae minim wanem hem happen lo olketa wakaman wea dae or hao hem barava poor nao, bikos barava nogud samting hem happen next. Tenfala pikinini blo hem hipap tugeta lo haos blo firstborn, then wanfala big wind hem blow kam and hem foldaonem haos and killim dae evri pikinini blo hem!—Job 1:12-19 NW.

Hem hard for iumi minim feeling blo Job. Hem brekem kaleko blo hem, katem hair blo hem, and foldaon lo graon. Job sei God hem givim olketa samting lo hem and God hem tekem aot olketa samting from hem. Tru tumas, Satan hem kleva and mekem Job tingse God nao kosim olketa nogud samting hia. Nomata olsem, Job no tok spoelem God olsem Satan sei hem bae duim, bat Job sei: “Mi preisim nem blong [Jehovah].”—Job 1:20-22.

Satan hem kros fogud and no laek givap. Taem olketa angel kam front lo Jehovah, Satan kam lo Jehovah moa. Jehovah praisem Job moa for wei wea hem gohed faithful nomata Satan attakim hem. Satan sei lo Jehovah: “Skin sensim skin. Man save lusim evrisamting blong hem fo mekem hem seleva i laef. Bat sapos yu go spoelem bodi blong hem, bae hemi tokspoelem yu nogud long ae blong yu ya.” Lo tingting blo Satan, sapos Job hem barava sik, bae hem tok spoelem God. Jehovah barava trustim Job bae gohed faithful, so hem letem Satan for mekem Job sik nomoa bat no for killim hem dae.—Job 2:1-6.

No longtaem bihaen, Job kasem datfala sik wea iumi storyim lo start blo disfala article. Tingim waef blo hem. Hem barava feel sorre tumas from tenfala pikinini blo hem dae, and distaem hem lukim hasband blo hem barava safa! From hem feel nogud tumas, hem tok olsem lo Job: “Waswe nao, yu gohed fo falom stretfala wei nomoa? Hemi moabeta yu tokspoelem God an yu dae nao!” Hem no kaen toktok wea waef blo Job savve talem. Job luksavve hem tok karangge nomoa. Nomata olsem, Job les for tok spoelem God blo hem. Bible sei hem nating tok nogud.—Job 2:7-10.

Waswe, iu savve hao disfala tru story hem affectim iu? Satan no sei Job nomoa bae no faithful lo God bat olketa man tu bae no faithful. Hem sei: “Man save lusim evrisamting blong hem fo mekem hem seleva i laef.” So lo tingting blo Satan, no eniwan lo iumi savve barava faithful lo Jehovah! Hem tingse iu no barava lovem God and iu bae kwiktaem lusim God for sevem laef blo iu. Hem olsem Satan sei iu selfish olsem hem! Waswe, iu laek pruvim hem laea? Iumi evriwan garem chance for duim datwan. (Provebs 27:11) Bae iumi storyim nara hard samting wea kasem Job.

Bible storyim hao thrifala fren blo Job herem wanem hem kasem Job, so olketa kam for visitim hem and comfortim hem. Nem blo thrifala nao hem Eliphaz, Bildad, and Zophar. Taem olketa stap farawe yet, olketa luk go lo Job bat olketa nating luksavve lo hem nao. Body blo Job hem pain tumas and skin blo hem start for blak nao from datfala nogud sik. Hem nating luk olsem hao olketa rememberim hem. Thrifala act olsem olketa barava sorre lo Job. Olketa krae big and torowem dust lo hed blo olketa. Then olketa sidaon lo graon klosap lo Job for sevenfala day and sevenfala naet, bat olketa no talem eni samting lo Job. Iumi mas no tingse olketa duim olsem for showimaot olketa sorre lo Job. Olketa no showimaot interest lo Job or trae for savve lo wanem hem happen lo hem. Only samting wea olketa savve lo hem, hem wei wea Job pain tumas and datwan hem bikos olketa lukim lo eye blo olketa nao.—Job 2:11-13; 30:30 NW.

Gogo Job nao startim story. Hem start for tok nogud abaotem day wea hem born, and diswan showimaot hem safa tumas. Bat samting wea hem talem showimaot main reason why hem barava feel sorre tumas. Hem tingse God nao kosim olketa nogud samting hia! (Job 3:1, 2, 23) Hem no lusim faith blo hem lo God, bat hem barava needim comfort. Bat taem thrifala start for story kam, Job luksavve hem moabeta for olketa nating story lo hem.—Job 13:5.

Eliphaz, wea maet age blo hem winim tufala narawan and barava winim age blo Job, hem start for story. Gogo, tufala narawan story and wanem tufala talemaot showimaot olketa garem semkaen tingting olsem Eliphaz. Maet samfala samting wea olketa man hia talem hem here stret nomoa, bikos olketa storyim olketa samting wea plande pipol savve talem. Olsem example, olketa sei God hem hae tumas, hem savve panisim olketa nogud pipol, and hem blessim olketa gudfala pipol. Bat wanem olketa storyim showimaot olketa no kaen lo Job. Eliphaz story lo simpol wei bat hem no luksavve lo olketa tru samting. Lo tingting blo hem, God hem gud and hem panisim olketa wea nogud, so masbi Job duim nogud samting dastawe hem panisim hem.—Job 4:1, 7, 8; 5:3-6.

Job nating acceptim wanem olketa talem. (Job 6:25) Bat thrifala tingse Job duim wanfala nogud samting and hem trae for haedem. Lo tingting blo olketa, hem fitim for God panisim hem olsem. Eliphaz accusim Job and sei hem praod, hem rabis man, and hem no tinghae lo God. (Job 15:4, 7-9, 20-24; 22:6-11) Zophar talem Job hem mas lusim olketa nogud wei blo hem and hem mas no hapi taem hem duim sin. (Job 11:2, 3, 14; 20:5, 12, 13) And Bildad talem samting wea nating kaen. Hem sei masbi olketa son blo Job sin dastawe olketa fit for dae olsem!—Job 8:4, 13.

Thrifala man hia duim samting wea moa worse. Olketa sei Job nating faithful lo God, and hem iusles nomoa for man trae for faithful lo God! Taem Eliphaz start for story, hem storyim hao wanfala spirit kam lo hem and mekem hem seksek fogud. Wanfala demon nao story lo hem and samting wea happen mekem Eliphaz for tingse God “no trustim olketa servant blo hem, and hem no trustim olketa angel blo hem tu.” Lo tingting blo hem, olketa man no savve duim eni samting for mekem God hapi! Diskaen tingting hem no stret bikos sapos samwan bilivim datwan, hem savve spoelem faith blo hem lo God! Bildad sei God no kea sapos Job hem faithful, olsem hem no kea sapos wanfala worm hem faithful!—Job 4:12-18 NW; 15:15; 22:2, 3; 25:4-6.

Waswe, enitaem iu trae for comfortim samwan wea barava safa? Hem no isi, iaman? Bat iumi savve lanem staka samting from thrifala wea story lo Job. Iumi lanem wanem iumi mas no talem. Nomata thrifala talem staka toktok wea maet mekem man tingse datwan hem here stret nomoa, olketa nating showimaot olketa tingim Job and olketa nating iusim nem blo Job tu! Olketa nating tingim wei wea Job sorre tumas and hao olketa shud tok kaen lo hem. a So sapos iu laek helpem samwan wea feel sorre, trae for tok kaen lo hem and showimaot iu tingim hem. Storyim samting wea savve encouragem hem and strongim faith blo hem. Helpem hem for trustim God and for bilivim God hem barava kaen tumas, Hem showimaot mercy, and evritaem duim stret samting. Hem nao wanem Job bae duim for olketa fren blo hem sapos olketa kasem sem samting. (Job 16:4, 5) Bat wanem nao Job duim taem olketa gohed kwestinim wei wea hem faithful?

Iumi sorre tumas lo Job. Hem barava feel wikdaon finis taem thrifala hia story longtaem tumas lo hem. Taem olketa start toktok lo hem, Job sei samfala taem hem “tok krangge” and talem olketa toktok bikos hem “filnogud.” (Job 6:3, 26) Iumi minim why hem tok olsem. Hem talem olketa toktok hia bikos hem barava sorre tumas and hem no minim wanem hem happen. From olketa nogud samting seknomoa kasem hem and famili and hem luk olsem samfala samting hem kam from God, Job tingse Jehovah nao kosim. Job no savve lo olketa important samting wea happen, dastawe tingting blo hem no stret.

Bat Job garem strongfala faith lo God and samting wea hem talem showimaot datwan. Hem storyim olketa trufala samting wea savve encouragem iumi distaem. Taem hem story abaotem creation, hem mekhae lo God. Hem storyim olketa samting wea no eni man bae savve lo hem sapos God no putim lo tingting blo hem. Olsem example, hem sei Jehovah “mekem disfala wol stap long ples wea no enisamting i holem hem.” Olketa scientist just savve lo disfala tru samting staka handred year bihaen. b (Job 26:7) And taem Job story abaotem hope blo hem lo future, hem storyim sem hope wea olketa nara faithful man garem. Job bilivim hao sapos hem dae, God bae missim hem, rememberim hem, and mekem hem laef bak lo future.—Job 14:13-15; Hebrew 11:17-19, 35.

Bat waswe lo disfala kwestin abaotem wei for faithful lo God? Eliphaz and tufala fren blo hem sei diswan hem nating important lo God. Waswe, Job acceptim disfala rabis teaching? Nating nomoa! Lo tingting blo Job, wei for faithful hem important lo God. Hem sei olsem abaotem Jehovah: “Hemi lukim wea mi nating duim eni nogud samting.” (Job 31:6) And tu, Job luksavve thrifala hia againstim hem bikos hem faithful lo God. Diswan mekem Job talemaot longfala toktok lo thrifala and olketa no savve talem eni samting lo hem nao.

Job luksavve hem mas gohed faithful lo Jehovah evriday. So hem explainim hao evri samting wea hem duim showimaot datwan. Olsem example, hem no worshipim olketa idol, hem kaen lo olketa narawan and respectim olketa, hem no durong, hem faithful lo waef blo hem, and samting wea moa important, hem barava faithful lo trufala God, Jehovah. Dastawe Job savve sei from heart blo hem: “Go kasem taem mi dae, bae mi no lusim wei wea mi faithful!”—Job 27:5 NW; 31:1, 2, 9-11, 16-18, 26-28.

Waswe, iu garem sem tingting olsem Job and luksavve wei for faithful hem barava important? Job luksavve hem isi for sei iumi faithful, bat iumi mas pruvim datwan lo wanem iumi duim. Iumi showimaot iumi barava lovem God and faithful lo hem taem iumi obeyim hem and duim olketa stret samting, nomata lo olketa hard taem tu. Sapos iumi duim olsem, Jehovah bae hapi lo iumi and iumi bae mekem Satan kros, olsem Job duim. Hem nao nambawan wei for followim faith blo Job!

Bat diswan no end blo story blo Job. Hem forgetim wanem hem barava important and hem trae for defendim wei wea hem raeteous gogo hem no mekhae lo God blo hem. Job needim samwan for stretem tingting blo hem, mekem hem savve garem sem tingting olsem God. And from hem feel sorre tumas and body blo hem pain tumas, hem needim samwan for comfortim hem. Wanem nao Jehovah duim for disfala man wea garem faith lo hem and gohed faithful? Nara article bae kamap wea ansarem olketa kwestin hia.