For staka year finis pipol tok daonem Olketa Jehovah’s Witness bikos olketa no acceptim blood transfusion. Olketa no acceptim blood bikos Bible sei for “stap klia long blood.” Bat samfala taem olketa doctor no agree witim datwan and sei disison for no acceptim blood hem putim laef bilong sikman long danger.​—Acts 15:29.

Bat long olketa year wea just go pas, staka savveman long medical storyim olketa reason for no iusim blood for treatim man bat for iusim olketa nara treatment.

Spring 2013 issue bilong Stanford Medicine Magazine, wea hem wanfala pablikeson bilong Stanford University School of Medicine, storyim wanfala spesol report wea garem title “Against the Flow​—What’s Behind the Decline in Blood Transfusions?” Sarah Williams nao raetem datfala article and hem sei: “Long tenfala year wea go pas, research wea olketa duim showimaot hem barava kamap wei bilong olketa hospital evriwea long world for iusim blood taem olketa operate and long ward. Bat staka taem olketa patient no needim blood hia.”

Hem storyim Patricia Ford, M.D., wea hem startim and lukaftarem datfala Center for Bloodless Medicine and Surgery long Pennsylvania Hospital. Doctor Ford hem sei: “Long tingting bilong staka doctor pipol bae dae sapos olketa short long blood. Olketa tingse blood nao best wei for sevem laef bilong pipol. Maet datwan hem tru samfala taem, * bat klosap evritaem olketa patient no needim blood for sevem laef bilong olketa.”

Doctor Ford hem treatim samting olsem 700 Jehovah’s Witness evri year. Hem sei: “Tingting bilong staka doctor wea mi story long olketa hem no stret . . . bikos olketa tingse staka patient bae dae sapos olketa no kasem blood transfusion . . . Maet bifor mi garem sem tingting tu. Bat kwiktaem mi start for luksavve plande long olketa patient hia needim nomoa samfala simpol treatment wea no needim blood.”

Long August 2012, datfala journal Archives of Internal Medicine storyim wanfala study wea olketa duim long pipol wea heart attak. Olketa duim disfala study for 28 year. Wanem olketa faendem nao, Olketa Jehovah’s Witness gud bak kwiktaem winim olketa patient wea kasem blood transfusion. No staka Witness dae bihaen long operation, and no staka Witness garem nara health problem wea kamaot from treatment wea olketa kasem. Namba bilong olketa Witness wea laef yet 20 year bihaen long treatment hem semsem witim namba bilong olketa wea kasem blood transfusion.

Wanfala article long The Wall Street Journal wea olketa pablisim long April 8, 2013, hem sei: “Wei for operate and no iusim blood olketa duim for staka year finis long olketa patient wea no laekem blood bikos long biliv bilong olketa. Distaem, staka hospital no iusim blood . . . Olketa doctor wea operate sei wei for no iusim blood hem cheap winim for iusim blood bikos hem expensive for baem, keepim, testim, and iusim blood. Olketa sei tu, staka patient wea blood transfusion olketa kasem nara sik from datfala blood wea savve mekem olketa stap longtaem insaed hospital.”

Dastawe, Robert Lorenz, wea hem medical director for blood management long Cleveland Clinic, hem sei: “Maet iu tingse iu helpem patient taem iu givim hem blood transfusion, bat from evri research hia, luk olsem iu just mekem hem worse nomoa.”