MINING BLO OLKETA BIBLE VERSE

Mark 1:15—“Kingdom blo God Hem Stap”

PLAY

“Distaem nao hem taem wea God markem, and Kingdom bilong God hem kam klosap. Iufala mas repent, and biliv long datfala gud nius.”—Mark 1:15, Niu World Bible.

“Taem hem fulfill nao, and kingdom blo God hem stap; repent and biliv lo gospel.”—Mark 1:15, English Standard Version.

Mining blo Mark 1:15

Jesus Christ sei Kingdom blo God a “hem stap,” or “hem kam klosap,” bikos hem nao bae kamap King blo datfala Kingdom, and hem stap witim olketa lo datfala taem.

Jesus no minim datfala Kingdom hem start for rul finis. Lo wanfala taem bihaen, hem talem olketa disaepol datfala Kingdom bae kam lo future. (Acts 1:6, 7) Nomata olsem, Jesus hem kam lo barava year wea olketa Bible profesi sei hem bae kam olsem man wea bae kamap King lo future. b Dastawe Jesus hem sei: “Distaem nao hem taem wea God markem.” Datwan nao taem for Jesus startim ministry blo hem for preachim gospel, or gud nius, abaotem Kingdom.—Luke 4:16-21, 43.

For pipol savve kasem gud samting from datfala gud nius abaotem Kingdom, olketa mas repent, wea minim olketa mas sorre lo olketa sin wea olketa duim bifor and olketa mas duim wanem God laekem. Sapos man hem repent, datwan showimaot hem garem faith lo datfala gud nius abaotem Kingdom wea bae kam lo future.

Nara Information wea Join Witim Mark 1:15

Jesus talem datfala toktok taem hem start for duim ministry blo hem lo Galilee. Lo Matthew 4:17, wea storyim sem toktok blo Jesus, hem sei: “Long datfala taem nao Jesus start for talemaot disfala message” abaotem Kingdom blo God. Kingdom hem main samting wea Jesus story abaotem. Insaed fofala Gospel c Bible story abaotem Kingdom winim 100 taem, and staka taem hem wanfala toktok wea Jesus nao talem. Lo Bible, Jesus story abaotem Kingdom blo God staka taem winim eni nara subject.

Readim Mark chapter 1 witim olketa footnote wea explainim samfala point, olketa cross-reference, olketa piksa, and wanfala map.

a Kingdom blo God hem wanfala gavman lo heven wea God nao startim, and wea bae mekem plan blo God for earth kamap tru. (Daniel 2:44; Matthew 6:10) For moa information, lukim article wea garem title “Wanem Nao Kingdom Bilong God?”

b Jesus mas kamap wanfala king bikos datwan nao wanfala samting wea olketa Bible profesi sei datfala Messiah, or man wea God markem for spesol waka, bae hem duim. For moa information abaotem olketa Bible profesi wea pruvim Jesus nao hem datfala Messiah, lukim article lo English wea garem title “Do Messianic Prophecies Prove That Jesus Was the Messiah?”

c Olketa Gospel hem fofala buk lo start blo olketa Christian Greek Scripture, or wanem staka pipol savve kolem lo Niu Testament. Olketa Gospel story abaotem laef and ministry blo Jesus.