“No warim samting wea bae happen tumoro, leavim go datwan for tumoro nao, bikos evri day bae olketa problem kamap. Tingim nomoa olketa problem wea iufala kasem tuday.”—Matthew 6:34, New World Translation.

 “No wari abaotem tumoro, bikos olketa wari blo tumoro hem for tumoro nao. Olketa trabol for each day hem inaf nao for deal witim lo datfala day.”—Matthew 6:34, New International Version.

 Jesus nao talem datfala toktok. Hem laek helpem olketa wea lisin lo hem for luksavve olketa no need for wari tumas abaotem olketa problem wea bae kamap lo future. Hem encouragem olketa for tingim nomoa abaotem olketa problem wea olketa feisim each day.

 Jesus no minim hem rong for iumi ting abaotem tumoro or plan for samting wea bae happen lo future. (Proverbs 21:5) Bat hem talem datfala toktok for helpem iumi no wari, or stress tumas, abaotem samting wea maet happen tumoro. Kaen wei for wari olsem bae spoelem hapi blo iumi and savve mekem iumi no strong for duim olketa samting iumi need for duim tuday. Wei for wari abaotem olketa problem wea maet happen lo future bae no stretem olketa. And tu, staka taem samting wea iumi wari abaotem hem no happen, or hem no happen olsem hao iumi tingim.

 Disfala toktok blo Jesus lo Matthew 6:34 hem part blo datfala Sermon lo Maunten, wea stap lo Matthew chapter 5 go kasem 7. Lo datfala sermon, Jesus sei wei for wari tumas no savve helpem iumi for hapi or for laef longtaem. (Matthew 6:27) Hem sei tu, taem iumi traem best for evritaem duim wanem God laekem iumi no need for wari tumas abaotem wanem bae happen tumoro. God lukaftarem olketa plant and olketa animal, and tu, hem bae lukaftarem olketa wea worshipim hem.—Matthew 6:25, 26, 28-33.