MINING BLO OLKETA BIBLE VERSE

Romans 10:13—“Kol Go lo Nem blo Lord”

PLAY

“Eniwan wea prea long Jehovah for helpem hem, bae hem sev.”—Rome 10:13, Niu World Bible.

“Eniwan wea kol go lo nem blo Lord bae hem sev.”—Romans 10:13, King James Version.

Mining blo Romans 10:13

God hem no favorim eniwan, and hem mekem wei for evriwan savve sev and laef olowe, nomata wanem kantri olketa kam from, kala skin blo olketa, or living blo olketa. Bat, for iumi sev and laef olowe, iumi mas kol go, or prea, lo nem blo Jehovah, wea hem nao nem blo Olmaeti God. a—Psalm 83:18, NW.

Lo Bible, datfala toktok “kol go lo nem blo Jehovah” hem no minim nomoa for savve lo nem blo God and for iusim taem iumi worshipim hem. (Psalm 116:12-14, NW) Hem minim tu for trustim God and depend lo hem for helpem iumi.—Psalm 20:7; 99:6.

Nem blo God hem barava important lo Jesus Christ. Firstfala toktok lo datfala Lord’s Prea hem olsem: “Dadi bilong mifala long heven, mifala laekem nem bilong iu for holy.” (Matthew 6:9) Jesus showimaot tu iumi mas savve gud lo Jehovah, obeyim hem, and lovem hem sapos iumi laek for kasem laef olowe.—John 17:3, 6, 26.

Hao nao iumi savve datfala “Lord” wea Romans 10:13 storyim lo King James Version hem Jehovah? Iumi savve datwan bikos datfala verse hem quotem Joel 2:32. Lo olketa oldfala copy blo datfala Bible buk Joel lo Hebrew languis, wea hem nao languis olketa raetem lo hem firstaem, Joel 2:32 hem iusim nem blo God, no datfala title “Lord.” b

Nara Information wea Join Witim Romans 10:13

Lo Romans chapter 10, Bible sei man mas garem faith lo Jesus Christ sapos hem laek for fren witim God. (Romans 10:9) For sapotim datfala point, Aposol Paul quotem samfala toktok from Old Testament. Man savve showimaot hem garem faith taem hem “talemaot” faith blo hem, wea insaed diswan hem for talemaot datfala message abaotem Christ lo olketa wea no biliv. Datwan savve givim chance lo olketa narawan tu for garem faith wea savve lead go lo laef olowe.—Romans 10:10, 14, 15, 17.

Readim Romans chapter 10 witim olketa footnote wea explainim samfala point, and olketa cross-reference.

a Nem blo God hem stap samting olsem 7,000 taem lo olketa oldfala Bible manuscript. Lo Hebrew languis, nem blo God hem garem fofala leta, wea olketa kolem lo Tetragrammaton. Staka taem pipol savve transleitim datwan olsem “Jehovah” lo English. Nomata olsem, samfala Bible savveman laek for iusim disfala word “Yahweh” taem olketa transleitim datfala Hebrew nem.

b Luk olsem olketa Christian wea raetem olketa Bible buk savve iusim nem blo God taem olketa quotem olketa “Old Testament” verse wea garem datfala nem. The Anchor Bible Dictionary hem sei: “Samfala pruv hem stap wea showimaot datfala Tetragrammaton, wea hem nem blo God, Yahweh, hem stap lo samfala ples or lo evri ples lo N[ew] T[estament] wea quotem O[ld] T[estament] taem olketa raetem NT firstaem.” (Volume 6, page 392) For moa information, lukim “Nem Bilong God Long Olketa Greek Scripture” lo Appendix 1 blo Niu World Bible, Matthew—Revelation. Appendix C2 lo study edition blo New World Translation of the Holy Scriptures lo English hem garem list blo olketa Bible transleison wea iusim nem blo God lo Romans 10:13.