Hao, Olketa Christian Shud Keepim Sabbath?
Ansa From Bible
Bible showim dat olketa Christian no need for keepim sabbath evri week. Olketa Christian anda lo “law blo Christ,” and datfala law no sei olketa mas keepim Sabbath. (Galatians 6:2; Colossians 2:16, 17) Why nao iumi sure lo datwan? First samting, tingim hao Sabbath start.
Wat nao Sabbath?
Datfala word “sabbath” hem kam from Hebrew word wea minim “for rest; for stop.” Firstaem wea word hia stap insaed Bible hem lo olketa komand wea God givim lo nation blo Israel bifor. (Exodus 16:23) For example, mek-fo komand lo Ten Komandment sei: “Rememberim datfala Sabbath day and keepim day hia holy. Iufala mas duim evri waka blo iufala lo sixfala day, bat mek-seven day hem sabbath for Jehovah, God blo iufala . . . Iufala evriwan mas no duim eni waka.” (Exodus 20:8-10) Sabbath day hem start lo sunset lo Friday go kasem sunset lo Saturday. Lo day hia, olketa Israelite mas no lusim ples blo olketa, no laetem eni fire, no kolektem firewood, or karem eni hevi load. (Exodus 16:29; 35:3; Numbers 15:32-36; Jeremiah 17:21) Eniwan wea brekem law blo Sabbath olketa mas killim hem dae.—Exodus 31:15.
Lo kalenda blo olketa Jew, olketa kolem samfala nara day tu lo sabbath, and mek-7 year and mek-50 year tu olketa kolem lo sabbath. Lo olketa Sabbath year, olketa mas no wakem eni garden lo land blo olketa, and olketa mas no forcem eni Israelite for changem bak kaon blo hem.—Leviticus 16:29-31; 23:6, 7, 32; 25:4, 11-14; Deuteronomy 15:1-3.
Sakrifaes blo Jesus hem finisim Sabbath law
Why nao Sabbath law hem no for olketa Christian?
Sabbath law hem only for datfala nation wea stap anda lo full Law wea God givim lo Moses. (Deuteronomy 5:2, 3; Ezekiel 20:10-12) God no askem eni nara nation for keepim sabbath. And tu, sakrifaes blo Jesus Christ hem mekem olketa Jew “free from Law” blo Moses, insaed diswan hem datfala Ten Komandment. (Romans 7:6, 7; 10:4; Galatians 3:24, 25; Ephesians 2:15) Olketa Christian no followim Law blo Moses bat olketa followim law blo love wea hem winim Law blo Moses.—Romans 13:9, 10; Hebrews 8:13.
Olketa rong idea abaotem Sabbath
Rong idea: God startim Sabbath taem hem rest lo mek-seven day.
Tru samting: Bible sei: “God blessim mek-seven day, and mek holy lo day hia: bikos lo day hia hem rest from evri waka wea hem duim for creatim and wakem samting.” (Genesis 2:3, King James Version) Disfala verse hem story abaotem wanem God duim lo mek-seven day blo creation, hem no story abaotem law for olketa man followim. Bible no storyim eniwan wea keepim sabbath bifor taem blo Moses.
Rong idea: Olketa Israelite stap anda lo Sabbath law bifor olketa kasem Law blo Moses.
Tru samting: Moses tok olsem lo olketa Israelite: “Jehovah, God blo iumi, hem mekem wanfala covenant witim iumi lo Horeb,” wea diswan hem area raonem Maunt Sinai. Insaed lo disfala covenant hem Sabbath law. (Deuteronomy 5:2, 12) Samting wea olketa Israelite duim and wat God talem lo olketa abaotem Sabbath showim dat hem niu samting lo olketa. Sapos olketa anda lo Sabbath law taem olketa stap lo Egypt, hao, bae God sei dat Sabbath bae remindim olketa lo taem wea hem sevem olketa from Egypt? (Deuteronomy 5:15) Why nao God mas talem olketa for no kolektem manna lo mek-seven day? (Exodus 16:25-30) And why nao olketa no savve wat for duim lo first man wea brekem Sabbath law?—Numbers 15:32-36.
Rong idea: Sabbath hem covenant wea no savve change so olketa Christian mas keepim.
Tru samting: Samfala Bible transleison sei Sabbath hem wanfala “covenant wea no savve change.” (Exodus 31:16, King James Version) Bat, Hebrew word wea olketa transleitim lo “no savve change” savve minim tu “stap go kasem enitaem lo future,” and no stap for olowe. For example, Bible iusim sem word for story abaotem waka blo olketa priest lo Israel, wea God finisim samting olsem 2,000 years ago.—Exodus 40:15; Hebrews 7:11, 12.
Rong idea: Olketa Christian mas keepim Sabbath bikos Jesus tu keepim.
Tru samting: Jesus keepim Sabbath bikos hem wanfala Jew, wea hem stap anda lo Law blo Moses from taem wea hem born. (Galatians 4:4) Bihaen Jesus dae, hem finisim Law covenant hia, wea Sabbath tu insaed.—Colossians 2:13, 14.
Rong idea: Aposol Paul wea hem Christian hem keepim Sabbath.
Tru samting: Paul go insaed lo olketa sinagog lo Sabbath, bat no for joinim olketa Jew for keepim datwan. (Acts 13:14; 17:1-3; 18:4) Hem duim nao wat pipol savve duim lo datfala taem, and hem preachim gud nius insaed lo olketa sinagog, bikos lo dat taem pipol savve invaetem man wea visit for story lo olketa wea hipap for worship. (Acts 13:15, 32) Paul preach “evriday,” no lo Sabbath day nomoa.—Acts 17:17.
Rong idea: Sabbath blo olketa Christian hem lo Sunday.
Tru samting: Bible no talem eni komand for olketa Christian for keepim Sunday, first day blo week, for rest and worship. For olketa first Christian, Sunday hem olsem eni nara day blo week nomoa. The International Standard Bible Encyclopedia sei: “Start lo mek-4 century nao pipol start for keepim Sunday olsem sabbath, taem Constantine [king blo Rome wea acceptim apostate teaching] mekem law wea sei olketa mas no duim samfala waka lo Sunday.” a
Bat, waswe lo olketa scripture wea showim dat Sunday hem wanfala spesol day? Bible sei aposol Paul kaikai witim olketa nara Christian “lo first day blo week,” lo Sunday, and diswan hem fitim nomoa bikos Paul bae lusim olketa lo next day. (Acts 20:7) Olsem tu, samfala kongregeson kasem encouragement for keepim lelebet selen “lo first day blo each week,” for relief waka, bat diswan hem idea nomoa for man savve budget followim. Olketa bae keepim olketa contribution hia lo haos, and no givim lo ples blo olketa for meeting.—1 Corinthians 16:1, 2.
Rong idea: Hem rong for markem wanfala day evri week for rest and worship.
Tru samting: Bible sei diswan hem disison blo each Christian.—Romans 14:5.
a Lukim tu New Catholic Encyclopedia, Second Edition, Volume 13, page 608.
Iu Laek Lukim Nara Samting?
OLKETA KWESTIN WEA STAKA PIPOL ASKEM
Waswe, Olketa Jehovah’s Witness Christian?
Ting raonem olketa reason why mifala olketa tru Christian, and hao mifala difren from olketa nara religion wea olketa sei olketa tu Christian.
ESSENTIAL BIBLE TEACHINGS
Waswe, God Acceptim Evri Difren Kaen Wei for Worship?
Staka pipol bilivim nomata wanem religion iu chusim hem olraet nomoa.
ABAOTEM MIFALA
Askem Samwan for Visit
Discussim wanfala Bible kwestin, or lanem moa samting abaotem Olketa Jehovah’s Witness.