Hu Nao Bae Go lo Heven?
Ansa wea Bible Givim
God chusim smol sekson blo olketa faithful Christian wea bae laef bak lo heven bihaen olketa dae. (1 Peter 1:3, 4) Olketa Christian hia wea God chusim mas gohed garem strongfala faith and duim wanem God laekem taem olketa stap lo earth, mekem olketa no lusim datfala hope for laef bak lo heven.—Ephesus 5:5; Philippi 3:12-14.
Wat nao bae olketa wea go lo heven duim lo there?
Olketa bae kamap olketa king and priest and waka tugeta witim Jesus for 1,000 year. (Revelation 5:9, 10; 20:6) Olketa bae kamap datfala “niu skae,” or gavman lo heven, wea bae rul ovarem datfala “niu earth,” or pipol wea stap lo earth. Olketa ruler hia lo datfala gavman lo heven bae mekem evriwan lo earth kamap raeteous, wea hem nao plan blo God firstaem.—Aesaea 65:17; 2 Peter 3:13.
Haomas pipol nao bae resurrect for go lo heven?
Bible hem sei 144,000 pipol nao bae resurrect for laef lo heven. (Revelation 7:4) Lo Revelation 14:1-3, aposol John storyim wanfala vision wea hem lukim. Hem sei: “Datfala Pikinini Sheepsheep hem standap antap long Maunt Zion. Olketa narawan tu standap witim hem. Namba bilong olketa hem 144,000.” Lo datfala vision, “datfala Pikinini Sheepsheep” piksarem Jesus wea laef bak. (John 1:29; 1 Peter 1:19) “Maunt Zion” piksarem hae position wea Jesus garem and datfala 144,000 wea bae rul witim hem lo heven.—Sams 2:6; Hebrew 12:22.
Bible sei olketa “wea God chusim” for rul witim Christ lo datfala Kingdom hem wanfala “smol sekson.” (Revelation 17:14; Luke 12:32) Datwan showimaot namba blo olketa hem smol taem iumi markem witim full namba blo olketa wea Jesus kolem olketa sheepsheep blo hem.—John 10:16.
Rong tingting wea samfala garem abaotem olketa wea go lo heven
Rong tingting wea samfala garem: Evriwan wea duim gudfala samting bae go lo heven.
Truth: God hem sei big haf blo olketa wea duim gudfala samting bae laef olowe lo earth.—Sams 37:11, 29, 34.
Jesus sei: “No eni man hem go ap long heven.” (John 3:13) Datwan showimaot evriwan wea duim gudfala samting wea dae bifor lo hem, olsem Abraham, Moses, Job, and David, olketa no go lo heven. (Acts 2:29, 34) Bat, olketa hia garem hope for resurrect for laef lo earth.—Job 14:13-15.
Bible sei olketa wea bae resurrect for laef lo heven olketa nao bae “olketa first wan wea laef bak.” (Revelation 20:6) Datwan showimaot samfala narawan moa bae resurrect bihaen. Olketa hia bae resurrect lo earth.
Bible sei taem Kingdom blo God hem rul, “no eniwan bae dae.” (Revelation 21:3, 4) Masbi datfala promis hem story abaotem samting wea bae happen lo earth, bikos no eniwan hem dae lo heven enitaem.
Rong tingting wea samfala garem: Iumi wanwan savve chus sapos iumi bae laef lo heven or lo earth.
Truth: God nao hem disaed hu lo olketa faithful Christian bae kasem “datfala prize for laef long heven wea God givim.” (Philippi 3:14) Wanem iumiseleva laekem hem no affectim wanem God disaedem for iumi.—Matthew 20:20-23.
Rong tingting wea samfala garem: Datfala hope for laef lo earth hem no spesol olsem hope for go lo heven. Lo tingting blo God, olketa wea hem markem for laef lo earth olketa no fit for laef lo heven.
Truth: God kolem olketa wea bae kasem laef olowe lo earth “olketa pipol wea mi siusim,” and olketa wea “mi [Jehovah] nao mi blesim olketa.” (Isaiah 65:21-23) Olketa hia bae garem privilege for mekem plan wea God garem for olketa man firstaem for kamap tru, wea hem nao for perfect pipol for laef olowe lo paradaes earth.—Jenesis 1:28; Psalm 115:16; Isaiah 45:18.
Rong tingting wea samfala garem: Datfala namba 144,000 wea Revelation storyim hem no wanfala really namba, bat hem piksarem samting.
Truth: Hem tru, samfala namba insaed Bible buk Revelation piksarem samting, bat samfala namba lo datfala buk olketa really namba. Olsem example, Revelation story abaotem “twelvfala nem bilong twelvfala aposol bilong datfala Pikinini Sheepsheep.” (Revelation 21:14) Tingim samfala reason why hem stret for sei datfala namba 144,000 tu hem wanfala really namba.
Revelation 7:4 hem sei “namba bilong olketa wea kasem mark [or, God disaed olketa bae laef lo heven], hem 144,000.” Olketa nara verse wea stap raonem datfala verse story abaotem narafala grup wea garem difren hope, wea hem “wanfala big crowd wea no eniwan fit for kaontem.” God sevem olketa wea insaed datfala “big crowd” tu. (Revelation 7:9, 10) Sapos datfala namba 144,000 hem just piksarem wanfala grup wea iumi no savve kaontem, then hem no mek sense for comparem olketa witim datfala nara grup. a
And tu, Bible sei olsem abaotem datfala144,000: “God hem peim olketa from earth and olketa hia firstfala offering.” (Revelation 14:4) Datfala toktok “firstfala offering” hem fitim for storyim datfala smol sekson wea bae rul witim Christ lo heven wea God chusim olketa for rul ovarem pipol blo hem lo earth wea iumi no fit for kaontem.—Revelation 5:10.
a Olsem tu, Professor Robert L. Thomas hem sei olsem abaotem datfala namba 144,000 wea Revelation 7:4 storyim: “Hem wanfala klia namba wea Bible comparem witim grup lo Revelation 7:9 wea namba blo olketa no klia. Sapos iumi sei datfala namba hem no wanfala really namba, then hard for iumi sei eni namba lo datfala buk hem really namba.”—Revelation 1-7: An Exegetical Commentary, page 474.
Iu Laek Lukim Nara Samting?
ESSENTIAL BIBLE TEACHINGS
Wanem Nao Kingdom Bilong God?
Taem Jesus duim ministry bilong hem long earth, main samting wea hem story abaotem nao hem Kingdom bilong God. For staka handred year, olketa disaepol bilong hem prea for datfala Kingdom for kam.
WANEM BIBLE TEACHIM
Traem Bible Course blo Mifala
Duim free Bible study course witim instructor wea bae helpem iu.