God savve lukim evri samting and hem savve duim eni samting lo eni ples wea hem laekem. (Provebs 15:3; Hebrew 4:13) Bat, Bible no sei God stap evriwea insaed evri samting. Bible sei hem samwan wea garem ples for stap.

•   Wanem Bible talem abaotem God: God hem wanfala spirit. (John 4:​24) Iumi olketa man no savve lukim hem. (John 1:​18) Olketa vision wea olketa man lukim abaotem God wea record blo hem stap lo Bible hem evritaem showim God stap lo wanfala ples. No enitaem olketa vision hia showim God stap evriwea.​—Aesaea 6:​1, 2; Revelation 4:​2, 3, 8.

•   Ples wea God stap: Bible sei God “stap long ples blong [hem] long heven.” (Fas Kings 8:​30) Diswan minim God no stap lo earth or lo disfala universe bat hem stap lo heven. Bible storyim wanfala taem wea olketa angel “kam standap front lo Jehovah.” a Diswan showim God stap lo wanfala ples.​—Job 1:6.

Sapos God no stap evriwea, hao, hem lovem mi tu?

 Yes. God hem lovem tumas each wan lo iumi. Nomata hem stap lo heven, God lukim olketa lo earth wea barava laek for obeyim hem and hem duim samting for helpem olketa. (Fas Kings 8:​38, 39; Mektu Kronikols 16:9) Bae iumi storyim samting wea Jehovah duim wea showim hem tingim olketa wea faithful for worshipim hem:

•   Taem iu prea: Semtaem iu prea Jehovah herem iu.​—Mektu Kronikols 18:31.

•   Taem iu depress: “[Jehovah] hemi stap kolsap long olketa pipol wea i sore tumas. Ya, hemi gohed fo sevem olketa pipol wea tingting blong olketa hemi godaon finis.”​—Sams 34:18.

•   Taem iu needim advaes: Jehovah iusim toktok blo hem Bible for “tisim yu olketa stretfala wei.”​—Sams 32:8.

Samfala idea blo pipol wea no stret

 Idea wea no stret: Sams 139:8 hem sei God hem stap evriwea. Hem sei: “Nomata mi goap long heven, bat yu long dea finis. An nomata taem mi dae an godaon insaet long grev, bat yu long dea finis tu.”

 Tru samting: Disfala scripture no storyim ples wea God stap. Hem storyim God savve duim samting for helpem iumi nomata lo eni ples wea iumi stap.