Nomoa, Kingdom blo God hem no samting wea stap lo heart blo olketa Christian. a Bible storyim tru ples wea Kingdom hem stap. Hem sei datfala Kingdom hem “kingdom blo heven.” (Matthew 4:​17, King James Version) Tingim wanem Bible storyim wea showimaot datfala Kingdom hem wanfala gavman wea rul lo heven.

•   Kingdom blo God garem olketa ruler blo hem, pipol wea hem rul ovarem, olketa law, and plan for mekem will blo God kamap lo heven and lo earth.​—Matthew 6:​10; Revelation 5:​10.

•   Gavman blo God, datfala Kingdom, bae rul ovarem “pipol blong evri kantri, an evri kala, an evri langguis” lo earth. (Daniel 7:​13, 14) Hem no olketa man wea givim paoa lo datfala Kingdom for rul, bat God nao duim datwan.​—Sams 2:​4-6; Aesaea 9:7.

•   Jesus talem olketa faithful aposol blo hem dat olketa bae join witim hem lo Kingdom blo heven and “sidaon lo olketa throne.”​—Luke 22:28, 30.

•   Kingdom hem garem olketa enemy, bat hem bae finisim olketa.​—Sams 2:​1, 2, 8, 9; 110:​1, 2; 1 Corinth 15:25, 26.

 Bible no teachim dat Kingdom blo heven hem stap lo heart, olsem hem rul from heart blo man. Bat hem sei datfala “message abaotem Kingdom” or datfala “gud nius abaotem Kingdom” savve affectim heart blo iumi and shud duim olsem.​—Matthew 13:19; 24:14.

Wat nao disfala toktok “kingdom blo God hem insaed lo iufala” minim?

 Samfala pipol konfius abaotem wea nao Kingdom hem stap bikos lo hao samfala Bible transleison transleitim Luke 17:21. Olsem example, King James Version sei “kingdom blo God hem insaed lo iufala.” For minim stret disfala verse, iumi mas ting raonem olketa nara verse raonem.

 Jesus hem story lo olketa Pharisee, wea olketa nao olketa bigman blo Jew religion wea againstim hem and wea join witim olketa narawan for killim hem dae. (Matthew 12:14; Luke 17:20) Hao, hem mek sense for sei Kingdom hem samting wea stap lo heart blo olketa hia wea nating laek lisin lo Jesus? Jesus talem olketa: “Iufala savve laea tumas and duim enikaen rabis samting nomoa.”​—Matthew 23:27, 28.

 Olketa nara transleison transleitim stret toktok blo Jesus lo Luke 17:21 olsem: “Kingdom blo God hem stap witim iufala.” (Mifala nao mekem italic; Contemporary English Version) “Kingdom bilong God hem stap midolwan long iufala.” (Niu World Bible) Kingdom blo heven hem stap “witim” or “midolwan” lo olketa Pharisee, bikos Jesus hem standap front lo olketa and hem nao man wea God markem for rul olsem King.​—Luke 1:​32, 33.