Bae hem hard for olketa man mekem peace kamap lo earth. Kingdom blo God nomoa bae mekem datwan for happen. Datfala Kingdom hem wanfala gavman lo heven wea Jesus Christ nao rulim. Lukim wanem Bible talem abaotem disfala nambawan hope.

1.   God bae “finisim olketa faet long evriples long wol,” and datwan bae fulfillim promis blo hem for “pipol long earth wea mekem God hapi bae garem peace!”—Sams 46:9; Luke 2:14.

2.   Kingdom blo God bae rul from heven ovarem full earth. (Daniel 7:14) From datfala gavman bae rulim full world, wei for mekhae lo kantri bae finis. Wei for mekhae lo kantri hem kosim staka war.

3.   Bible sei Jesus, wea hem ruler lo Kingdom blo God, hem “Bikman fo mekem Piis.” Jesus bae mek sure “ples wea hemi rul ovarem, bae hemi garem piis olowe.”—Aesaea 9:6, 7.

4.   Pipol wea laek gohed for faet bae no savve stap taem Kingdom hem rul, bikos “God hem heitim eniwan wea laek for raf.”—Psalm 11:5, NWT; Provebs 2:22.

5.   God teachim pipol wea worshipim hem for stap gud tugeta and garem peace. Bible hem sei olsem abaotem pipol wea followim wanem God teachim: “Bae olketa hamarem olketa naef fo faet an spia blong olketa fo kamap olsem aean fo digim graon an huknaef fo katem olketa grep. Nao olketa pipol long wol bae i no faetem moa olketa long narafala kantri, an no tisim moa olketa yanga fo faet.”—Aesaea 2:3, 4.

 Distaem, staka million Jehovah’s Witness evriwea raonem world gohed lane from God abaotem wei for stap gud witim narawan and garem peace. (Matthew 5:9) Nomata mifala garem olketa difren languis, difren kala skin, and stap lo winim 230 difren kantri, mifala bae no joinim war for faetem olketa narawan.