Datfala war blo Armageddon hem lastfala war between olketa gavman blo man and God. Nomata distaem tu, olketa gavman hia and pipol wea sapotim olketa againstim God, bikos olketa no laek stap anda lo rul blo God. (Sams 2:2) Datfala war blo Armageddon bae finisim for olowe rul blo olketa man.​—Daniel 2:​44.

 Datfala word “Armageddon” hem stap wanfala taem nomoa lo Bible, lo Revelation 16:16. Wanfala profesi lo Revelation hem sei “long datfala ples wea long Hebrew languis olketa kolem Armageddon,” “olketa king evriwea long earth” bae hipap tugeta “for datfala war wea bae kamap long bigfala day bilong Olmaeti God.”​—Revelation 16:14.

 Hu nao bae faet lo Armageddon? Jesus Christ bae leadim wanfala army lo heven, wea bae faetem and winim olketa enemy blo God. (Revelation 19:11-​16, 19-​21) Samfala lo olketa enemy hia hem olketa wea againstim rul blo God, and wea nating showimaot respect for God.​—Esikiel 39:7.

 Waswe, datfala war blo Armageddon bae kamap lo Middle East? Nomoa. Datfala war bae no happen lo wanfala ples nomoa. Datfala war blo Armageddon bae kamap evriwea lo full earth.​—Jeremaea 25:32-​34; Esikiel 39:17-​20.

 Samfala taem olketa Bible savve spellim datfala word Armageddon lo “Har–​Magedon” (Hebrew Har Meghiddohnʹ). Hem minim “Maunten blo Megiddo.” Megiddo hem wanfala taon lo territory blo Israel lo bifor. Olketa history buk storyim samfala bigfala faet wea kamap lo bifor klosap lo datfala taon, and samfala lo olketa faet hia Bible tu storyim. (Jajis 5:​19, 20; 2 Kings 9:​27; 23:29) Nomata olsem, hem hard for Armageddon minim wanfala faet wea bae kamap lo area wea datfala taon Megiddo stap bifor. No eni bigfala maunten lo datfala ples, and tu, nomata datfala full area blo Flat Ples lo Jezreel wea stap klosap Meggido hem no big for fitim evriwan wea bae faet againstim God. Armageddon hem minim war wea bae kamap evriwea lo world taem olketa nation lo earth hipap for againstim rul blo God.

 Wat nao bae happen taem datfala war blo Armageddon hem gohed? Iumi no barava savve hao God bae iusim paoa blo hem lo datfala taem, bat iumi savve hem fit for iusim olketa weapon wea hem iusim bifor, olsem example, olketa hail ston, earthquake, flood, fire and sulfur, laetning, and olketa sik. (Job 38:22, 23; Esikiel 38:19, 22; Habakuk 3:​10, 11; Sekaraea 14:12) Lo datfala taem, samfala enemy blo God bae barava konfius and killim dae each other. Nomata olsem, gogo olketa bae luksavve God nao faet againstim olketa.​—Esikiel 38:21, 23; Sekaraea 14:13.

 Waswe, Armageddon hem end blo world? Armageddon bae no finisim disfala planet earth, bikos earth hem hom blo olketa man for olowe. (Sams 37:29; 96:10; Eklesiastes 1:4) Armageddon bae no distroem olketa man, bat hem bae sevem olketa man, bikos “wanfala big crowd” blo olketa wea worshipim God bae no dae bat gohed laef bihaen Armageddon.​—Revelation 7:​9, 14; Sams 37:34.

 Hem tru, samfala taem lo Bible datfala word “world” hem minim earth, bat samfala taem lo Bible datfala word “world” hem minim nogud pipol wea againstim God. (1 John 2:​15-​17) Taem Bible sei Armageddon hem “end blo world,” datwan no minim earth bae distroe, bat hem minim end blo nogud pipol​—Matthew 24:3, King James Version.

 Wat taem nao Armageddon bae happen? Taem Jesus story abaotem datfala “bigfala trabol” wea bae kamap just bifor datfala war blo Armageddon, hem sei: “No eniwan savve long wanem day and taem nao datwan bae happen. Nomata olketa angel long heven and Son tu bat no savve. Dadi bilong mi long heven nomoa savve.” (Matthew 24:21, 36) Nomata olsem, Bible hem showimaot Armageddon bae happen lo “taem wea [Jesus] hem stap,” wea datwan hem start lo 1914.​—Matthew 24:37-​39.