Nomoa. Bible sei God creatim iumi olketa man and olketa difren “kaen” animal and olketa plant. a (Jenesis 1:12, 21, 25, 27; Revelation 4:11) Bible sei evri pipol lo world kam from laen blo Adam and Eve, wea tufala nao first parents blo iumi. (Jenesis 3:20; 4:1) Bible no sapotim idea wea sei God iusim evolution for creatim olketa difren kaen samting wea laef, wea pipol kolem datwan theistic evolution. Bat tru samting nao, Bible no againstim olketa scientist wea sei wanfala kaen animal or plant savve producem staka difren breed. b Example, pigpig savve garem staka difren kaen breed bat evriwan hem pigpig.

•  Waswe, God iusim evolution?

•  Hao, teaching blo evolution hem stret witim Bible?

•  Waswe lo olketa plant and animal wea savve change for fitim eni environment?

 Pipol wea sei God iusim evolution for creatim olketa samting wea laef garem olketa difren idea abaotem hao hem duim datwan. Datfala Encyclopædia Britannica sei God iusim “natural selection c for chusim olketa plant and animal wea bae gohed laef.”

 Samfala nara idea wea pipol garem:

•   God iusim evolution for mekem evri samting wea laef distaem from tu-thri difren kaen animal and plant wea stap bifor kam yet.

•   Wanfala samting wea laef savve change go lo nara samting wea barava difren. Disfala idea olketa savve kolem macroevolution.

•   God nao mas kosim olketa samting hia for happen.

 Idea blo theistic evolution hem showim story abaotem creation lo Bible buk Genesis hem no barava stret. Bat Jesus sei datfala story lo Genesis hem tru story lo history. (Jenesis 1:26, 27; 2:18-24; Matthew 19:4-6) Bible sei bifor Jesus kam lo earth, hem stap lo heven witim God and hem helpem God for wakem “evri samting.” (John 1:3) So, idea blo pipol wea sei God iusim evolution for creatim evri difren kaen samting wea laef, hem no stret witim olketa teaching lo Bible.

 Bible no storyim hao many breed nao wanfala kaen animal savve producem. Bible no againstim tu hao olketa difren kaen animal and plant wea God creatim savve change for fitim niu environment and garem olketa niu breed wea change lelebet. Nomata samfala tingse diswan sapotim evolution, hem no stret for sei olketa change hia producem wanfala niu plant or animal.