Hem no wanfala sin for man drinkim lelebet alcohol. Bible sei wine hem wanfala present from God wea savve mekem man hapi. (Sams 104:14, 15; Eklesiastes 3:​13; 9:7) And tu, Bible storyim hao hem gud for man drinkim lelebet wine for helpem hem taem hem garem samfala sik.​—1 Timothy 5:​23.

 Taem Jesus stap long earth samfala taem hem savve drinkim wine. (Matthew 26:29; Luke 7:​34) Wanfala mirakol bilong Jesus wea staka pipol savve abaotem, hem taem wea hem mekem wata for kamap wine long wanfala marit feast.​—John 2:​1-​10.

Olketa wea ova tumas long alcohol kasem nogud samting

 Bible sei hem olraet for drinkim lelebet wine, bat hem sei tu hem wanfala sin for man ova tumas long alcohol or for hem drunk. So sapos wanfala Christian chus for drinkim alcohol hem shud no ova tumas. (1 Timothy 3:8; Titus 2:​2, 3) Bible storyim samfala reason why iumi shud no ova tumas long alcohol.

•   Hem mekem man no savve tingting stret. (Provebs 23:29-​35) Samwan wea drunk bae hard for followim komand long Bible wea sei “givim body bilong iufala olsem wanfala sakrifaes wea laef and holy and wea God savve hapi long hem. Long wei olsem, bae iufala worshipim God witim gudfala tingting.”​—Rome 12:1.

•   Taem man hem ova tumas long alcohol hem savve mekem hem duim olketa krangge samting or olketa samting wea no stret.​—Hosia 4:​11; Ephesus 5:​18.

•   Hem savve mekem man kamap poor or barava sik.​—Provebs 23:21, 31, 32.

•   God no hapi long man wea ova tumas for drinkim alcohol or wea drunk.​—Provebs 23:20; Galatia 5:​19-​21.

Wanem nao showimaot man hem ova tumas long alcohol or hem drunk?

 Man hem ova tumas long alcohol taem datfala alcohol affectim tingting bilong hem mekem hemseleva or narawan stap long danger. Bible storyim hao man savve drunk nomata hem no hafded. Bible hem sei man hem drunk taem hed bilong hem spin, hem no savve wakabaot stret, hem savve tok kros, or hem no savve toktok klia. (Job 12:25; Sams 107:27; Provebs 23:29, 30, 33) Nomata man hem no drunk, wei for “drink tumas” savve mekem hem “no garem stretfala tingting” and for kasem nogud samting.​—Luke 21:34, 35.

Taem wea hem no fitim for drink alcohol

 Bible showimaot samfala taem hem no fitim for olketa Christian for drinkim alcohol, olsem:

•   Sapos datwan bae mekem narawan for stambol.​—Rome 14:21.

•   Sapos datwan againstim law bilong kantri wea iu stap.​—Rome 13:1.

•   Sapos man no savve kontrolem haomas alcohol hem drinkim. Sapos man hem addict long alcohol or hem wei bilong hem for laek drinkim tumas alcohol, hem mas no drinkim alcohol nao.​—Matthew 5:​29, 30.