Nomoa. Olketa difren old manuscript wea olketa comparem showim message insaed Bible hem no change nomata olketa man gohed copyim Bible for staka thousand year lo olketa material wea savve rotten.

 Olketa faendem staka thousand old Bible manuscript. Samfala samting lo olketa manuscript hia no semsem, wea datwan showim taem olketa copyim olketa manuscript hia olketa mekem samfala mistek. Staka lo olketa mistek hia hem smol nomoa and no changem mining blo datfala message. Bat, tu-thri lo olketa mistek hia luk olsem samfala pipol lo bifor min for duim for changem message insaed Bible. Bae iumi storyim tufala example:

1.   Lo samfala old Bible transleison, lo 1 John 5:7 hem garem olketa toktok hia: “lo heven, Dadi, Word, and Holy Ghost. Thrifala hia olketa wan nomoa.” Bat, olketa important manuscript showim olketa toktok hia no stap lo olketa original raeting. a Dastawe samfala Bible transleison distaem no garem olketa toktok hia.

2.   Nem blo God hem kamap staka thousand taem insaed lo olketa old Bible manuscript. Bat, staka Bible transleison aotem datfala nem and changem witim olketa title olsem “Lord” or “God.”

 Distaem olketa faendem staka manuscript and datwan mekem hem isi for lukim olketa mistek winim enitaem bifor. b Wanem nao olketa scholar talem abaotem hao Bible hem stret taem olketa comparem olketa manuscript hia?

•   William H. Green, wanfala scholar story olsem abaotem olketa Hebrew Scripture (wea pipol savve kolem lo “Old Testament”): “Hem fitim for sei no eni nara old buk hem olsem Bible wea olketa barava copyim stret lo hem.”

•   Bible scholar F. F. Bruce sei olsem abaotem olketa Christian Greek Scripture, or Niu Testament: “Niu Testament garem staka pruv winim eni nara old buk lo history. Nomata olsem, no eniwan kwestinim sapos olketa buk hia stret or nomoa.”

•   Sir Frederic Kenyon, wanfala man wea savve gud lo olketa Bible manuscript sei, “iumi evriwan fit for sei Bible hem toktok blo God wea tru. Nomata hem stap for staka handred year finis main message insaed hem nating change.”

•   Taem olketa Jew and olketa Christian copyim Bible olketa no aotem olketa story abaotem olketa bigfala sin wea pipol blo God duim. c (Nambas 20:12; Mektu Samuel 11:​2-4; Galatia 2:​11-​14) Olketa keepim tu olketa story abaotem nation blo Israel taem olketa no obeyim God and olketa teaching blo man wea no stret. (Hosia 4:2; Malakae 2:​8, 9; Matthew 23:​8, 9; 1 John 5:​21) From olketa man wea copyim Bible olketa copyim stret, datwan showim olketa tinghae lo holy toktok blo God and iumi fit for trustim Bible.

•   God mek sure olketa man wea copyim Bible olketa copyim stret lo hem. Hem mek sense for hem duim olsem, bikos hem nao leadim olketa man for raetem tingting blo hem insaed Bible. d (Aesaea 40:8; 1 Peter 1:​24, 25) Hem laekem pipol lo bifor and iumi distaem tu for kasem gud samting from message blo hem insaed Bible. (1 Corinth 10:11) Tru nao, “evri samting wea olketa raetem bifor hem for teachim iumi. Hem givim iumi hope bikos olketa Holy Raeting hia helpem iumi for no givap and comfortim iumi.”​—Rome 15:4.

•   Jesus and olketa disaepol blo hem quotem olketa toktok from olketa copy blo olketa Hebrew Scripture and olketa no talem eni samting wea showim olketa daotem olketa copy hia.​—Luke 4:​16-​21; Acts 17:​1-3.