•  Waswe, mi need for lus weight?

•  Wanem nao best wei for lus weight?

•  Hao for duim

•  Wanem olketa nara young wan talem

Samfala teenager sei olketa laek lus weight. Bat . . .

•   Staka tingim tumas lukluk blo olketa winim health blo olketa. Samfala trae for kwiktaem lus weight lo wei for kaikai wanfala taem lo day nomoa or for tekem tablet for helpem olketa katdaon. Bat plande taem hem nogud for duim olsem and samfala taem hem danger tu.

  “Samfala gele no kaikai mekem olketa savve kwiktaem lus weight. Plande taem datwan spoelem body blo olketa and hem tek longtaem tumas for kamap gud moa.”—Hailey.

•   Staka wea wari abaotem weight blo olketa no need for warim datwan. Weight blo olketa hem gud nomoa, bat maet olketa tingse olketa fat bikos olketa comparem olketa seleva witim olketa fren or wanem pipol sei hem stretfala weight.

  “Taem mi 13 years old, mi comparem miseleva witim olketa fren blo mi. Mi tingse bae olketa laekem mi moa sapos mi luk olsem olketa, wea hem nao for mi bon nating olsem olketa.”—Paola.

Bat samfala young wan need for lus weight. Report blo World Health Organization sei . . .

•   Lo world, samting olsem 340 million young wan from 5 go kasem 19 years old, olketa ova weight.

•   Lo 1975, 4-fala lo evri 100 young wan wea age blo olketa from 5 go kasem 19 years old, olketa ova weight. Bat lo 2016, 18 lo evri 100 young wan nao ova weight.

•   Lo staka kantri, namba blo olketa wea ova weight hem winim namba blo olketa wea bon nating.

•   Lo olketa poor kantri, pipol savve ova weight tu bikos olketa no kaikaim healthy kaikai.

Which wan nao bae iu chusim?

1. Kaikai wanfala taem nomoa lo day.

2. Exercise and kaikaim healthy kaikai.

3. Tekem tablet for lus weight.

Stretfala ansa: Namba 2: Exercise and kaikaim healthy kaikai.

Sapos iu kaikai wanfala taem lo day nomoa or stop for kaikaim samfala kaikai, maet iu kwiktaem lus weight. Bat wei for duim olsem no savve mekem iu healthy, and plande taem weight wea iu lusim hem kam bak moa taem iu gohed kaikai olsem iu kaikai bifor.

Bat sapos iu markem goal for kamap healthy bae iu feel gud and luk naes. Doctor Michael Bradley sei: “Best wei for stap healthy hem for . . . changem wanem iu duim wea bae isi for iu followim lo full laef blo iu.” * Why nao olsem? Sapos iu need for lus weight, no tingim tumas wanem iu savve kaikaim and no kaikaim, bat trae for changem samfala wei blo iu for kamap moa healthy.

Bible sei iumi mas “no ova tumas long eni samting wea [iumi] duim,” and datwan minim kaikai tu. (1 Timothy 3:11) Bible sei tu iumi mas no kaikai tumas. (Provebs 23:20; Luke 21:34) Tingim olketa principle hia and trae for followim olketa idea hia for stap healthy:

• Lanem wanem nao healthy kaikai.

  Iu no need for strict tumas lo wanem iu kaikaim, bat taem iu lanem wanem nao healthy kaikai, datwan savve helpem iu for balance lo diet. And wei for garem diet wea no ova tumas bae helpem iu for garem healthy weight.

• Exercise evritaem.

  Trae for tingim samting wea iu savve duim evriday wea hem olsem exercise. Olsem example, winim wei for go lo bas, baeleg. And no spendem 30 minute for storystory nating witim olketa fren bat iusim datfala taem for exercise, olsem for wakabaot fast.

• Trae for kaikaim healthy kaikai.

  Wanfala teenager wea nem blo hem Sophia sei: “Mi trae for mek sure mi garem samfala frut and vegetable lo haos. Then sapos mi hangre mi savve kaikaim datwan winim wei for kaikaim samting wea nogud for body blo mi.”

• Kaikai slow.

  Samfala pipol savve kaikai kwiktaem tumas and no luksavve bele hem full finis! So kaikai slow. Weit firstaem bifor iu gohed kaikai moa. Maet iu no hangre nao olsem iu tingim bifor.

• Careful lo haomas calorie iu kaikaim.

  Readim label wea stap lo kaikai for faendemaot haomas calorie stap insaed datfala kaikai. Samting for tingim: Olketa soft drink, olketa kaikai olsem hot chips, and swit kaikai olsem cake savve garem staka calorie lo hem wea savve mekem man ova weight.

• Mas balance.

  Sara wea 16 years old sei: “From mi ova tumas for kaontem olketa calorie, taem mi lukim kaikai wea stap lo pleit, mi savve tingim nomoa haomas calorie nao stap lo kaikai ia!” No kamap man wea kaontem olketa calorie. Samfala taem iu savve kaikaim olketa swit samting tu.

Idea: Sapos iu wari abaotem weight blo iu, story lo doctor blo iu. Doctor bae tingim health blo iu and helpem iu for savve wanem nao best program for iu followim.