Waswe, iu man for kwiktaem givap? Waswe, iu kasem hard taem bikos . . .

•   samwan wea iu lovem hem dae?

•   iu garem sik wea gohed for longfala taem?

•   natural disaster kasem iu?

 Olketa man wea duim research sei hem no just olketa big problem wea savve mekem man laek givap. Nomata sapos iu stress abaotem olketa smol problem, datwan savve spoelem health blo iu. Dastawe hem important for iu strongim wei wea iu no givap, nomata olketa problem blo iu hem smol or big tumas.

•  Wanem nao hem minim for no givap?

•  Why nao iu need for garem disfala fasin?

•  Wanem nao bae helpem iu for no givap?

•  Wanem olketa nara young wan talem

 Man wea no givap bae savve hao for deal witim olketa change and winim olketa hard taem wea kasem hem. Pipol wea garem disfala wei savve kasem olketa hard taem olsem olketa narawan tu, bat olketa savve winim olketa problem and gohed strong nomata datfala hard taem spoelem olketa.

•   Bikos evriwan kasem olketa problem. Bible sei: “I no olketa hu i save ran kuiktaem nomoa i save winim resis, . . . i no olketa man hu i save tumas nomoa wea i garem hae nem. Hem nao bikos, enikaen samting hemi save kasem evriwan ya long enikaen taem.” (Eklesiastes 9:11) Wanem nao iumi lanem? Olketa gudfala pipol tu safa and plande taem hem no bikos olketa duim eni rong samting.

•   Bikos wei for no givap savve protectim iu. Wanfala man wea givim advaes lo olketa hae skul student sei: “Staka student distaem kam lo office blo mi bikos olketa feel nogud tumas from olketa kasem C lo exam or bikos samwan talem nogud samting abaotem olketa lo social media.” Hem sei nomata olketa problem hia maet smol nomoa, sapos olketa student no savve lane for deal witim olketa, maet gogo olketa savve kasem sik lo tingting or feeling blo olketa. *

•   Bikos wei for no givap bae helpem iu distaem and taem iu adult. Doctor Richard Lerner raet olsem abaotem wei for feel nogud lo samting: “Sapos iu laek garem gudfala laef taem iu adult, iu mas lane for winim olketa hard taem wea kasem iu, markem olketa niu goal, or traem olketa difren samting mekem iu kasem goal blo iu.” *

•   Luksavve hao big nao problem blo iu. Lane for luksavve lo olketa big problem and olketa smol problem. Bible sei: “Krangge man save kros kuiktaem, bat stret man hemi no wari long nogud toktok.” (Provebs 12:16) No evri problem need for barava affectim iu.

   “Lo skul, olketa pikinini komplen abaotem olketa smol samting olsem hem big samting tumas. Then olketa follower blo olketa lo social media bae agree witim olketa and sei hem stret for olketa komplen, bat datwan bae mekem olketa feel nogud go moa. Hem no helpem olketa for luksavve lo olketa big problem and olketa smol problem.”—Joanne.

•   Lane from olketa narawan. Wanfala Bible proverb sei: “Fael sapanem naef. Man sapanem tingting blong nara man.” (Provebs 27:17) Iumi savve lanem olketa gudfala samting from pipol wea no givap taem hard samting kasem olketa.

   “Taem iu story witim olketa narawan, bae iu luksavve olketa kasem staka hard taem, bat distaem olketa olraet nomoa. Askem olketa wanem olketa duim or no duim for deal witim problem blo olketa.”—Julia.

•   Patient. Bible sei: “Nomata trabol hemi kasem gudfala man plande taem, bat hemi save stanap moa.” (Provebs 24:16) Hem tek taem for acceptim nogud samting wea happen, so no sapraes sapos samfala day iu feel sorre. Important samting hem for iu savve “stanap moa.”

   “Taem iu start for gud bak bihaen nogud samting happen lo iu, hem tek taem for heart and feeling blo iu for kamap gud moa. Mi lanem dat iu isisi start for feel gud moa.”—Andrea.

•   Talem thankiu. Bible sei: “Showimaot iufala thankiu long God.” (Colossae 3:15) Nomata sapos problem wea kasem iu hem serious, olketa samting hem stap wea iu savve talem thankiu lo hem. Tingim thrifala samting wea mekem iu tinghae lo laef blo iu.

   “Taem nogud samting happen lo iu, hem isi tumas for sei, ‘Why nao hem kasem mi?’ Important samting wea helpem iu for no givap hem for no tingim tumas olketa problem blo iu bat trae for garem positive tingting and talem thankiu lo wanem iu garem and wanem iu savve duim.”—Samantha.

•   Lane for satisfae nomoa. Aposol Paul sei: “Nomata mi garem samting or nomoa, mi lane for satisfae nomoa.” (Philippi 4:11) Paul no savve kontrolem olketa nogud samting wea happen lo hem bat hem savve kontrolem wanem hem duim. Paul disaed strong for hapi nomoa.

   “Wanfala samting mi lanem abaotem miseleva hem wei wea mi no savve deal witim hard taem lo best wei. Goal blo mi hem for garem positive tingting lo eni samting wea happen. Datwan bae helpem mi and olketa narawan tu.”—Matthew.

•   Prea. Bible sei: “Yufala mas givim go olketa wari blong yufala long [Jehovah], an bae hemi gadem yufala. Hemi no save letem olketa stretfala pipol fo lus.” (Sams 55:22) Prea hem no samting wea iu duim just bikos iu laek feel gud nomoa, bat hem wei for story witim Creator blo iu, wea “tingim” iu.—1 Peter 5:7.

   “Mi no need for stragol seleva. Taem mi prea and talemaot klia olketa problem blo mi and then sei thankiu lo God for olketa blessing, negative tingting wea mi garem hem lus nao taem mi tingim hao Jehovah blessim mi. Prea hem barava important!”—Carlos.