“Iu mas duim samting for olketa narawan acceptim iu, sapos nomoa bae iu no garem eni frens nao, laef bae no eniting nao, and iu bae no garem eni future. No eniwan bae tingim iu and bae iu lonely.”—Carl.

Hao, datwan tumas nao? Maet. Nomata olsem, samfala bae traem eni wei for olketa misstim kaen situation wea Carl storyim. Waswe lo iu? Disfala article bae helpem iu for garem samfala gud idea lo hao for garem olketa frens.

•  Why nao pipol laekem olketa narawan for acceptim olketa?

•  Wanem iu need for savve

•  Wanem olketa nara young wan talem

• Olketa no laekem olketa narawan for les lo olketa. “Lo social media mi lukim piksa blo wanfala grup wea go aot and duim things tugeta, and mi no insaed. Datwan mekem mi ting, ‘Wat nao rong witim mi?’ Mi tingting tumas abaotem hao mi no fitim olketa gogo klosap mi mentol nao.”—Natalie.

  SAMTING FOR TINGIM: Hao enitaem iu feel dat wanfala grup no acceptim iu? Waswe, iu duim eniting for mekem iuseleva kamap part lo datfala grup?

• Olketa no laek for difren. “Parents blo mi no letem mi for garem mobile phone. Taem olketa nara pikinini ask for mobile namba blo mi and mi talem olketa dat mi no garem eni phone, olketa sei: ‘Wat? Iu hao old?’ Taem mi sei mi 13, olketa barava sorre lo mi.”—Mary.

  SAMTING FOR TINGIM: Wanem kaen rul nao parents blo iu putim wea maet mekem iu feel olsem iu difren from olketa narawan? Hao nao iu deal witim datwan?

• Olketa no laekem narawan for bullyim olketa. “Olketa pikinini lo skul les lo eni pikinini wea wei blo hem difren, sapos toktok blo hem difren, or sapos worship blo hem difren. Sapos iu no duim samting for olketa acceptim iu, iu bae olsem wanfala target for olketa.”—Olivia.

  SAMTING FOR TINGIM: Waswe, enitaem olketa treatim iu nogud bikos iu no semsem witim olketa? Hao nao iu deal witim datkaen situation?

• Olketa no laek for lusim frens blo olketa. “Mi trae for change fitim eni grup wea mi joinim. Mi trae for copyim hao olketa toktok. Nomata sapos samting hem nating fani, bae mi laf nomoa. Mi savve join tu taem olketa nara pikinini mekfani lo samwan, nomata mi savve datwan mekem hem feel nogud.”—Rachel.

  SAMTING FOR TINGIM: Waswe, hem important tumas lo iu for olketa narawan wea sem age olsem iu for mas acceptim iu? Waswe, enitaem iu changem wei blo iu for mekem olketa acceptim iu?

• Iu savve kasem nogud samting tu from wei for copyim olketa narawan just for mekem olketa acceptim iu. Why nao olsem? Bikos staka taem hem isi for pipol luksavve sapos iu pretend nomoa. Brian wea 20 years old sei olsem: “Taem mi pretend for duim samting olsem olketa classmate blo mi, olketa just no acceptim mi nao. Mi lanem hao hem best for no copyim olketa narawan, bat duim samting followim wei blo iuseleva bikos pipol bae luksavve sapos iu pretend nomoa.”

  WANFALA IDEA: Ting raonem wanem nao important lo iu. Bible sei: “Luksavve long olketa samting wea barava important.” (Philippi 1:10) So askem iuseleva, ‘Wat nao important, mi laekem for pipol wea standard blo olketa difren from mi for acceptim mi, or for mi duim samting followim wei and tingting blo miseleva?’

  “Wei for trae for laek olsem olketa narawan hem iusles nomoa, hem bae no mekem pipol for laekem iu and hem bae no mekem iu for kamap samwan wea garem gudfala wei.”—James.

• Wei for laekem olketa narawan for acceptim iu savve spoelem wei blo iu. Iu bae kamap samwan wea followim nomoa olketa narawan just for mekem olketa hapi and duim wanem olketa narawan laekem iu for duim. Wanfala young man wea nem blo hem Jeremy sei: “Bifor mi savve duim eni samting nomoa for mekem wanfala grup acceptim mi, nomata datwan spoelem reputation blo mi. Olketa narawan nao kontrolem laef blo mi. Gogo mi kamap olsem robot blo olketa.”

  WANFALA IDEA: Savve lo wanem hem stret and followim datwan, no trae for olsem chameleon, wea hem wanfala lizard wea savve change kala followim environment wea hem stap. Dastawe Bible hem sei: “No duim samting just bikos evri narawan duim datwan.”—Exodus 23:2, Holy Bible—Easy-to-Read Version.

  “Mi trae for laekem sem samting wea olketa laekem, olsem music, game, kaleko, olketa show, hao olketa makeup . . . Mi trae for olsem olketa. Ating olketa luksavve dat mi pretend nomoa. Ating evriwan luksavve lo datwan, miseleva tu. End ap mi sorre and mi lonely, and gogo mi no savve hu nao mi. Mi no savve tu wat nao mi laekem or wat nao mi tingim. Mi lanem hao no evriwan wea iu meetim bae acceptim or laekem iu. Datwan no minim bae iu givap nao for faendem olketa frens, bat iu need for patient and tingim hao hem bae tek taem for iu kamap mature.”—Melinda.

• Taem iu trae for olsem olketa, datwan bae affectim wei blo iu. Wanfala young man wea nem blo hem Chris, sei olsem abaotem wanfala kasin blo hem: “Hem start for duim olketa samting wea hem no duim bifor, olsem for tekem olketa drug, just for olketa fren blo hem acceptim hem. Gogo, hem kamap addict nao, and hem klosap spoelem laef blo hem.”

  WANFALA IDEA: Stap klia lo pipol wea toktok and samting wea olketa duim hem no followim olketa gud standard. Bible sei: “Fren wetem waes man, bae yu waes. Fren wetem krangge man, bae yu safa.”—Provebs 13:20.

  “Samfala taem hem gud for traem best and duim samting for mekem pipol acceptim iu. Bat iu shud no duim datwan sapos hem againstim wanem iu savve hem stret. Pipol wea fit for kamap olketa gud frens for iu bae acceptim iu, nomata hu nao iu.”—Melanie.

  Idea: Taem iu trae for mek fren witim olketa niu pipol, no luk nomoa for olketa wea interest lo sem samting wea iu interest lo hem. Faendem pipol wea iufala garem sem standard lo spiritual saed, lo fasin, and hao olketa ting lo samting.