•  Hao, iu savve duim staka samting lo semtaem?

•  Samfala giaman tingting

•  Wanfala wei wea moabeta

•  Wanem olketa nara young wan talem

 Waswe, iu savve hao for duim staka samting lo semtaem? Plande pipol wea iusim technology start taem olketa young pikinini sei olketa savve duim staka samting lo semtaem winim olketa wea start for iusim technology taem olketa adult. Bat waswe, datwan hem tru?

 TRU or FALSE?

•   Taem iu duim staka samting lo semtaem, iu sevem taem.

•   Sapos iu practice for duim staka samting lo semtaem, bae hem kamap moa isi.

•   Young pipol savve duim staka samting lo semtaem winim olketa olo.

 Sapos iu ansa “tru” lo eni point hia, maet giaman tingting nao trikim iu.

 Hao, iu tingse iu savve duim tufala samting lo semtaem? Maet iu savve duim olsem sapos iu no need for tingting tumas abaotem wanfala lo tufala samting hia. Olsem example, sapos iu lisin lo music taem iu klinim rum blo iu, maet rum blo iu luk olraet bihaen.

 Bat taem iu trae for duim tufala samting lo semtaem wea iu mas tingting gud lo tufala, then luk olsem bae iu no duim gud tufala evriwan. Maet dastawe wanfala young woman wea nem blo hem Katherine sei taem iu duim staka samting lo semtaem, “iu spoelem evriwan.”

 “Mi gohed story witim wanfala boy then mi kasem text message wea mi mas ansarem. Mi trae for duim tufala evriwan lo semtaem. Bat from mi duim olsem, mi no herem staka samting wea datfala boy storyim and mi no spellim stret klosap evri word lo text message blo mi.”—Caleb.

 Sheery Turkle, wea savve tumas lo technology sei: “Taem iumi trae for duim staka samting lo semtaem,. . . wanem hem happen nao iumi no duim gud eniwan. Wei for duim staka samting lo semtaem mekem iumi tingse iumi duim staka waka, bat really samting nomoa, iumi duim datwan worse.” *

 “Taem mi story witim samwan, mi tingse mi savve textim narawan lo semtaem. Batawea, wanem hem happen nao, mi talem lo man hia samting wea mi shud textim, and mi start textim samting wea mi shud talem lo datfala man!”—Tamara.

 Pipol wea trae for duim staka samting lo semtaem mekem laef blo olketa moa hard. Olsem example, hem savve tek moa taem for duim homwok blo olketa. Or olketa no duim gud homwok blo olketa so olketa mas duim moa. Nomata wanem, olketa garem lelebet free taem nao for duim wanem olketa laek duim!

 Dastawe Thomas Kersting, wea hem wanfala mental doctor and counselor lo skul sei: “Brain blo iumi hem olsem wanfala cupboard wea iumi putim olketa idea and tingting blo iumi lo olketa difren file. Sapos iumi duim staka samting lo semtaem, brain blo hem olsem datfala cupboard wea evri file hem olobaot and nating organize gud.” *

 “Taem iu trae for duim staka samting lo semtaem, iu forgetim olketa important samting. From datwan, maet iu need for waka hard go moa and iusim moa taem for duim samting. Iu tingse iu savve sevem taem bat iu spoelem nomoa.”—Teresa.

•   Trainim iuseleva for duim wanfala samting nomoa. Maet hem no isi for duim datwan especially sapos iu bin duim staka samting lo semtaem, olsem for textim fren blo iu taem iu trae for duim homwok. Bat Bible talem iumi for “luksavve long olketa samting wea barava important.” (Philippi 1:10) No evri samting wea iumi duim hem important. So disaedem which wan nao hem moa important and trae for duim datfala samting gogo iu finisim.

   “Sapos iu trae for tingim staka samting lo semtaem, iu olsem wanfala smol pikinini wea laek duim wanem hemseleva laekem. Samfala taem iu mas talem no lo pikinini, olsem iu mas talem brain blo iu for no tingim tumas samting lo semtaem.”—Maria.

•   No letem nara samting disturbim iu. Taem iu study, waswe, iu laek for chekim phone blo iu? Putim phone blo iu lo nara rum. Offem TV, and no ting abaotem social media! Bible sei: “Iufala mas iusim gud taem wea iufala garem.”—Colossae 4:5.

   “Mi lukim hem gud tumas sapos mi just duim wanfala samting nomoa. Mi hapi taem mi finisim wanfala waka and then startim next wan. Hem mekem mi feel satisfae.”—Onya.

•   Lisin gud taem samwan story witim iu. Sapos iu lukluk lo phone blo iu taem samwan story witim iu, iu no showimaot respect lo hem and bae hem spoelem story blo iutufala. Bible sei iumi mas treatim narawan olsem iumi laekem olketa for treatim iumi.—Matthew 7:12.

   “Lo samfala taem wea mi story witim sista blo mi, hem gohed textim samwan or duim nara samting lo phone blo hem. Mi feel nogud taem hem duim datwan! Bat for tok stret, samfala taem mi tu duim sem samting!”—David.